પહેલા શહેરીજનોએ `ભાદરવો ભરપૂર' એવું માત્ર વાતોમાં સાંભળ્યું હતું. પરંતુ હવે ભાદરવો ભરપૂર એટલે શું તેનો અર્થ શહેરીજનોને સમજાવા લાગ્યો છે. વાત મહાનગર અમદાવાદની કરીએ તો અહીં વરસાદે શહેરને બાનમાં લીધું છે. પૂર્વ અમદાવાદ હોય કે પશ્ચિમ અમદાવાદ હોય શહેર પાણી પાણી થઈ ગયું છે.
ઊનાળામાં ખૂબ તપેલા અમદાવાદ શહેરને વર્ષારાણી ભાદરવામાં તપાવવા માગતી નથી. એટલે જ શહેરને ભાદરવામાં `પૂર'નો અનુભવ થઈ રહ્યો છે. અમદાવાદને છેલ્લાં 24 કલાકથી વરસાદે જાણે બાનમાં લીધું છે. શું પૂર્વ અમદાવાદ કે શું પશ્ચિમ અમદાવાદ. શું ગલી કે શું નગરમાર્ગો સર્વત્ર પાણી પાણી જ જોવા મળી રહ્યું છે.
વેજલપુરની સોસાયટીમાં ઘૂસી ગયા પાણી
શહેરમા વરસી રહેલા અવિરત વરસાદને કારણે અનેક સોસાયટીઓમાં પાણી ભરાઈ ગયા છે. વેજલપુર વિસ્તારની શ્રીનંદનગર સોસાયટીના લોકોના ઘરમાં પાણી ઘૂસી જતા લોકો મુશ્કેલીનો અનુભવ કરી રહ્યા છે. સોસાયટીમાં લોકો પંપ મૂકીને પાણી ઉલેચવાની કામગીરી કરી રહ્યાં છે. સ્થાનિક લોકોનું કહેવું છે કે વર્ષોથી વેજલપુરમાં આ સ્થિતિ છે પરંતુ સમસ્યાનું કોઇ નિરાકરણ આવતું નથી.
જીવરાજ પાર્ક નજીક 3 ફૂટ જેટલા પાણી ભરાયા
સોસાયટીઓ પાણીમાં ગરકાવ છે તો રોડ અને રસ્તાની કેવી હાલત હશે તે જાણવા કલ્પના કરવાની કોઈ જરૂર નથી. જીવરાજ પાર્ક વિસ્તારના રસ્તા પર 3 ફૂટ જેટલા પાણી ભરાયા છે. રસ્તા પર પાણી ભરાતાં વાહન ચાલકોને મુશ્કેલી પડી રહી છે.
અમદવાદ શહેરમાં કદાચ ઘણા વર્ષો બાદ ભાદરવા મહિનામાં આ પ્રકારનો વરસાદ લોકોએ અનુભવ્યો હશે. ભાદરવો મહિનામાં સામાન્ય રીતે આકરો તાપ પડતો હોય છે. પરંતુ આ વર્ષે તો ભાદવામાં હેલી અને શહેરમાં રોડ પર પૂર સર્જાયા છે. શહેરમાં મેઘરાજાની તોફાની બેટિંગના કારણે ઠેકઠેકાણે વૃક્ષો પણ ધરાશયી થઈ ગયા છે..
જજીસ બંગલો વિસ્તારમાં વૃક્ષ ધરાશાયી
શહેરના જજીસ બંગલો વિસ્તારમાં મૂશળધાર વરસાદના કારણે રોડ પર વૃક્ષ ધરાશાયી થઈ જતાં વાહન વ્યવહાર અટવાઈ ગયો હતો. તો ભયાવહ વરસાતનું બીજું રૌદ્ર સ્વરૂપ પણ અમદાવાદમાં આકાશી વીજળી સ્વરૂપે જોવા મળ્યું. શહેરમાં સતત વરસતા વરસાદ વચ્ચે ઘટાટોપ વાદળો વચ્ચે ચમકતી વીજળી સાઉથ બોપલ સ્થિત સારથ્ય બિલ્ડિંગ પર ત્રાટકી હતી. જેના કારણે બિલ્ડિંગના કેટલાક હિસ્સાને નુકસાન થયું હતું.
હેલમેટ સર્કલ પાસે પાણી ભરાતા ટ્રાફિક જામ
તો આ તરફ અવિરત વરસી રહેલા વરસાદને કારણે અમદાવાદના પશ્ચિમ વિસ્તારમાં પાણી ભરાવાની સમસ્યા સર્જાઈ છે. પ્રહલાદનગર અને બહેરામપુરામાં રોડ પર પાણી ભરાયા છે. જેના કારણે લોકોને મુશ્કેલીનો સામનો કરવો પડી રહ્યો છે. તો પાણી ભરાવાના કારણે ટ્રાફિક જામની પણ સમસ્યા સર્જાઈ છે. હેલમેટ સર્કલ પાસે પાણી ભરાઇ જતાં વાહન વ્યવહાર અને પગપાળા જતા લોકોને હાલાકી વેઠવી પડી હતી. હેલ્મેટ સર્કલ પર ઘૂંટણસમા પાણી ભરાઈ ગયા હતા. જેના કારણે નાગરિકોમાં તંત્ર સામે રોષ પણ જોવા મળી રહ્યો હતો.
રસ્તાઓ થયાં પાણીમાં ગરકાવ
ભાદરવાના આ ભરપૂર વરસાદે શહેરના વિસ્તારો વચ્ચેનો ભેદ ભૂંસી નાખ્યો છે. પૂર્વ અમદાવાદ હોય કે પશ્ચિમ અમદાવાદ દરેક વિસ્તારમાં પાણી ભરાઈ ગયા છે. જૂના અમદાવાદમાં છીપા સોસાયટીથી ચંડોળા તળાવ જતા રસ્તાઓ પાણીમાં ગરકાવ થઇ ગયા છે.
તો શાહઆલમ વિસ્તારમાં દરગાહમાં પણ પાણી ભરાઈ ગયા છે. .અમદાવાદના પૂર્વ વિસ્તારમા સરસપુર વિસ્તાર ઠેર ઠેર પાણી થઈ ગયા છે. લોકોના ઘરમાં પાણી ઘુસી ગયા છે. જેના કારણે લોકોને હાલાકીનો સામનો કરવાનો વારો આવ્યો છે. અવિરત વરસાદથી કંટાળીને લોકો હવે કહેવા લાગ્યા છે. મેઘો હવે ખમૈયા કરે તો સારું.