મજબૂરી / ગુજરાતના આ ગામમાં પરિવાર મુકાયો સંકટમાં, દીકરીના લગ્નમાં જાન આવે તો...

આ દ્રશ્યો જોઈને તમને લાગતું હશે કે શરીર પર શણગાર અને પીઠી ચોળીને કોઈ નવોઢા બનવા જઈ રહેલી આ દીકરી શું ખરેખર પાણી ભરવા જઈ રહી છે. માથે બેડું અને ધોમધખતા તાપના પ્રકોપમાં એ ખરેખર પાણી ભરવા જ જઈ રહી છે. આવતીકાલે એટલે કે સોમવારે તેના લગ્ન છે, પરંતુ છોટાઉદેપુરના જાંબુઘોડા ગામમાં જ્યાં આ દીકરી રહે છે ત્યાં જાનને સાચવી શકાય તેટલું પણ પાણી નસીબ નથી. લગ્નની શરણાઈઓ વાગે તે પહેલા બેડામાં પાણી ખખડવું જરૂરી છે નહીં તો જાન પીવે શું અને ખાય શું.

આ આદિવાસી ગામમાં હેન્ડપંપ તો છે પરંતુ એક કલાકે 10 લોકો પાણી પી શકે એટલું પણ પાણી આવતું નથી. ભૂગર્ભમાં જળ તો છે પરંતુ ગામનો બોરવેલ ટૂંકો પડે છે. ચૂંટણી મૌસમમાં કે સરકારો બની જાય તેવી સ્થિતિમાં પણ કોઈ નેતા કે વ્યવસ્થાને ઈચ્છા થતી નથી કે તેમના બોરવેલને ઉંડા કરાવે અને ગામની તરસને છીપાવે.

જે દીકરીના લગ્ન હોય તેના માતા-પિતા ચિંતા સિવાય બીજું કરી પણ શું શકે, કે તેની દીકરીની વિદાયમાં પાણી કોઈ અવરોધ ન બને.