ગુજરાતનાં ઘણા ખરાં વિસ્તારની પાણી સમસ્યા આજે એવી તો વકરી ગઈ છે. લગ્ન કરવા પણ મુશ્કેલ બની ગયાં છે. જો કન્યા લગ્નનાં દિવસે પણ પાણી ભરે તો જ તેનાં લગ્ન પાર પડે અને આ હકીકત ગુજરાતનાં છોટા ઉદેપુર જિલ્લા પાયકોઈ ગામમાં બની છે. જ્યારે કન્યાએ પીઠી ચોળેલી હાલતમાં પાણી ભર્યા ત્યારે તે પોતાનાં લગ્નનાં અરમાન પૂરા કરી શકે.
લગ્ન એટલે કન્યાનાં મનમાં અનેક અરમાનો હોય પણ અહીં આ કન્યાને પોતાનાં અરમાન પૂરાં કરતાં પહેલાં પાણી ભરવું જરૂરી બન્યું છે. શરીરે પીઠી ચોળી છે. પણ ઘરમાં પાણી ન હોવાંથી આ કન્યા પાણી ભરવા નીકળી પડી છે. જો પાણી ઘરમાં નહીં આવે તો તેનાં લગ્ન કરવા મુશ્કેલ છે. કારણ કે ઘરમાં ઢગલો મહેમાન છે પણ પાણી ટીપુંય નથી. આથી ઘરની લાજ રાખવા માટે કન્યા ખુદ પાણી ભરવા માટે લાઈનમાં ઊભી છે અને એ પણ પોતાનાં લગ્નનાં દિવસે જ. પાણી ભરતી અહીં દુલ્હન છોટા ઉદેપુરનાં નસવાડી તાલુકાનાં પાયાકોઈ ગામની છે.
દુલ્હનનાં લગ્ન હોવાં છતાંય ઘરે આવનાર મહેમાનો માટે પીવાનાં બે બેડાં પાણી લેવા જવા માટે કન્યા મજબૂર બની છે. ત્યારે તેમનાં સગાં વ્હાલા અને ગ્રામજનો પણ દીકરીની આ વ્યથાથી વ્યથિત જોવાં મળ્યાં. એક તરફ ઉનાળાની કાળઝાળ ગરમી અગનગોળા વરસાવી રહી છે અને બીજી તરફ પાણી માટે મહિલાઓ વલખાં મારી રહી છે. છોટા ઉદેપુર જીલ્લાનાં પાયાકોઈ ગામની વાત કરીએ તો ગામની વસ્તી લગભગ 400 જેટલી છે અને ગામમાં 6 જેટલાં હેન્ડડપંપ અને બોર છે પરંતુ તેમાંથી પણ કોઈ મોટર પણ કાઢી લઈ ગયાં છે. જ્યારે ગામમાં આવેલા હવાડા પણ સાવ ખાલીખમ જોવાં મળે છે.
ગામનાં લોકોને પ્રસંગ આવતા પહેલાં પાણીની ચિંતા સતાવતી હોય છે અને પ્રસંગનાં દિવસે કુવામાં પાણી ઓછું થઈ જાય તો બહારગામથી ટેન્કરમાં વેચાતું પાણી લાવીને પ્રસંગ પૂરો પાર પારવો પડે છે. પાયાકોઈ ગામ એક જુથ ગ્રામ પંચાયતનું ગામ છે, જ્યાં પાણી માટેની કોઈ સુવિધા આજ દીન સુધી કરવામાં આવી નથી, ગામમાં પાણીની લાઇન નાખી છે. પરંતુ આ પાઇપલાઇન પાણીની ટાંકીનાં અભાવે શોભાનાં ગાંઠીયા જેવી થઈ ગઈ છે અને ઉનાળાની કાળઝાળ ગરમીમાં લોકોને પાણી માટે વલખાં મારવાનો વારો આવી ગયો છે.