જળસંકટ / સરકારનાં દાવા પોકળ: ભર ઉનાળે જ ઉત્તર ગુજરાતનાં આ ગામમાં લોકો ટળવળે છે પાણી વિના

રાજ્યમાં પીવા માટે ભરપુર પાણી છે. આવાં સરકાર દાવાઓ કરે છે. પરંતુ હકીકતમાં સ્થિતિ કેવી છે. જો કે પાણી માટે ટાંકો છે પરંતુ પાણી નથી. પશુઓ માટે અવેડો પરંતુ તેમાં ધૂળ ઉડી રહી છે. જાણે વગળો વેરાન બની ગયો છે. ત્યારે જ તો સરકાર દાવા કરે છે કે, ભરપુર પાણી છે. પરંતુ કેવું પાણી. જેમની ભણવાની ઉંમર છે તે બાળાઓનાં કોમળ હાથ આજે પાણી માટે પાવડા પછાડી રહ્યાં છે.

કુવો ખોદી રહી છે. જ્યારે નાની બાળાઓ જોખમી રીતે કુવામાંથી પાણી સિંચી રહી છે. કુવો પણ કેવો. તો કે ન તો તેનાં કાંઠે કોઈ પથ્થરનું બાંધકામ છે અને ન તો તેની આસપાસ સુરક્ષાની કોઈ દિવાર. માત્ર માટીની ભેખળ છે. જે ગમે ત્યારે ઢસી શકે છે અને ગમે ત્યારે મોટી દુર્ઘટના સર્જાઈ શકે છે.

કેવી અજીબ આ ઘટના છે. એક તરફ ખુદ મુખ્યમંત્રી જ ગત દિવસે એવું કહી ગયાં કે રાજ્યમાં પીવાનું પાણી ભરપુર છે. પરંતુ આ દાવો કેટલો ખોખલો છે. તે પાટણ જિલ્લાનાં અંતરિયાળ એવા છાણસરા ગામનાં અહીં દ્રશ્યો પરથી ફલિત થાય છે. છાણસરા ગામમાં પાણીની આ સમસ્યા આજકાલથી નથી. પરંતુ છેલ્લાં 15 વર્ષથી છે. ગામમાં પાણીનો બોર અને ટાંકી પણ સરકારે બનાવ્યાં છે. પરંતુ તે બસ શોભાનાં ગાંઠીયા સમાન છે.

કારણ કે, પૈસાનો ખર્ચ બતાવવા માટે ટાંકી અને બોર તો બનાવી દીધો. પરંતુ ટાંકીમાં આજ સુધી પાણીનું ટીપું પણ નથી આવ્યું. રજૂઆતો તો અનેક કરી પરંતુ કોઈએ સાંભળ્યું નહીં. ગામમાં પાણીનો બીજો કોઇ સોર્સ નથી. જેથી મહિલાઓ અને નાની બાળકીઓએ ગામનાં તળાવમાં વીરડા ખોદીને પાણી નિકાળવું પડી રહ્યું છે. જોખમ ઉઠાવવું પડી રહ્યું છે. ત્યારે તેઓ અનેક વેદનાઓનો સામનો કરી રહ્યાં છે.

મહિલાઓ અને બાળાઓ જોખમી રીતે પાણી તો મેળવી રહી છે. પરંતુ તે પાણી પણ કેવું તો કે ડોળું. જો કે અહીં આ ડોળું પાણી પીવું પણ એક મજબૂરી છે. કારણ કે, ગામમાં બીજો કોઈ પાણીનો સોર્સ જ નથી અને જો ટેન્કર મંગાવે તો ટેન્કર ચાલક 800 રૂપિયા લે છે. જે કોઈ કાળે પોસાય તેમ નથી.

મહિલાઓનો રોષ અહીં વ્યાજબી છે. કારણ કે, પાણી માટે આખો દિવસ વીરડા ગોંદવા પડે છે. જેનાં કારણે તેઓ કામ પર પણ નથી જઈ શકતી. તો બાળાઓ ભણવા માટે નિશાળે નથી જઈ શકતી. આવી સ્થિતિ આજે ગુજરાતમાં પેદા થઈ છે. ચૂંટણી ટાણે તો ખુબ મોટા-મોટા વાયદા કર્યા. પરંતુ હવે ચૂંટણી પતી ગઈ છે. તો એક પણ નેતા ફરકતો પણ નથી.

ત્યારે આશા રાખીએ કે, મિટિંગો પર મિટિંગો કરી. માત્ર સુફિયાણી વાતો કરનારા નેતાઓ જરા આ ગામ અને તેની આસપાસનાં વિસ્તારો પર પણ જરા ધ્યાન આપે. જેથી કરીને સરકાર અને તેનાં તંત્રનાં વાંકે ખાલી પડેલી પાણીની ટાંકીઓ ખાલી ન રહે અને મહિલાઓ અને બાળાઓએ પાણી માટે રઝળપાટ ન કરવી પડે.