જળસંકટ / બેટ દ્વારકાનાં બેહાલ! ચો તરફ દરિયો છતાં પીવાનાં પાણી માટે પ્રજા લાચાર

સહેલાણીઓથી ઊભરાતું બેટ દ્વારકા પાણીની વિકટ પરિસ્થીતિનો સામનો કરી રહ્યું છે. 10 હજારથી વધુ વસ્તી ધરાવતું બેટ દ્વારકા સમગ્ર ભારતમાં ભગવાન દ્વારકાધીશનાં મંદિર અને હનુમાનજીનાં મંદિરનાં કારણે વિખ્યાત છે. દરિયા વચ્ચે આવેલાં બેટ-દ્વારકામાં બારેમાસ પ્રવાસીઓનો ઘસારો રહેતો હોય છે પરંતુ પાણીની તંગીને લઈને પ્રવાસીઓ પણ પરેશાન છે.

બેટ દ્વારકાની પાણી સમસ્યાથી મહિલાઓ ખૂબ જ ત્રસ્ત છે. સ્થાનિક મહિલાઓમાં પાણીને લઈને ભારે રોષ જોવાં મળી રહ્યો છે. છેલ્લાં ત્રણ-ત્રણ મહિનાથી પાણી માટે બેટ દ્વારકાની મહિલાઓ પાણી માટે ટળવળે છે. એમાં પાછો રમઝાન માસ શરૂ થતાં તેમની મુશ્કેલી ઓર વધી જશે. અહીં બેટ દ્વારકાનો કુવો કે જેમાં પાણી તો કહેવા માત્રનું જ છે. તમને અહીં જે પાણી દેખાશે તે અત્યંત ગંદુ છે. તેમ છતાં આવું પાણી પીને બેટ દ્વારકાનાં લોકો જીવી રહ્યાં છે.

બેટ દ્વારકા એક એવો ટાપું છે જ્યાં ચારે તરફ દરિયાનું પાણી છે અને વચ્ચે માનવ વસવાટ કરેલા આ ટાપુ ઉપર 10 હજારથી વસ્તી ધરાવતા આ ટાપુ ઓખા નગરપાલિકાની હદમાં આવતો આ વિસ્તાર છે. અહીં પાલિકા દ્વારા જાણે ભેદભાવભરી નીતિ અપનાવવામાં આવતી હોય તેમ એક એક મહિને પાણી ના મળતા લોકોની મુશ્કેલી દિવસે ને દિવસે વધી રહી છે. કેટલાંક લોકો તો પાણીને અભાવે હિજરત કરવાનું પણ વિચારી રહ્યાં છે.

આમ, બેટ દ્વારકાની ચારે તરફ દરિયાનું પાણી છે. પરંતુ પીવાનાં પાણી માટે પ્રજા તરસી રહી છે. તેમ છતાં સરકારી તંત્રનું પાણી હલતું નથી. બેટ દ્વારકાની પાણી સમસ્યાને લઈને પ્રવાસીઓ પણ દૂર થઈ રહ્યાં છે. ત્યારે વિકસતાં ગુજરાતની આ વ્યથા કથા સરકારને સંભળાવશે ખરી?