અમરેલીનું વીજપડી ગામ ભારે જળસંકટનો સામનો કરી રહ્યું છે. ગામનાં તમામ બોર ખાલી થઈ ગયાં છે. તો નર્મદાનું પાણી પણ સમયસર મળતું નથી. પાંચથી છ દિવસે પાણી મેળવતા આ ગામે તંત્રને અનેક રજૂઆતો કરી છતાં પાણીની સમસ્યા ઠેરની ઠેર છે.
પાણી માટે રોજ અહીં મસમોટી લાઈનો લાગે છે અને વિદ્યાર્થીઓને પણ ભણવાનું એક બાજુ મૂકી પાણીની લાઈનમાં ઊભું રહેવું પડે છે. અહીં રોજબરોજ પાણીનાં આવા જ પોકાર છે. લોકો કામધંધે પછી જાય છે પણ એ પહેલાં ચિંતા કરે છે પાણીની. અમરેલીનાં વીજપડી ગામની અહીં વાત કરવામાં આવી છે. જ્યાં સવાર પાણીની મોકાણ સાથે જ ઊગે છે.
અહીં નર્મદાનું પાણી ચાર-પાંચ દિવસે માંડ લોકોને વત્તા ઓછું મળી રહ્યું છે ત્યારે અહીં એક માત્ર પાણીનો સહારો અહીનો સ્થાનિક ટાંકો છે જેમાંથી લોકો પાણી ભરવા મસ મોટી લાઈનો લગાવે છે અને રોજે રોજ બેડા યુદ્ધ અહી ખેલાતું હોય છે. તો વીજપડીની પાણી સમસ્યાને લઈને વિદ્યાર્થીઓ ભણી શકતાં નથી. જ્યારે વિકલાંગોને પણ પાણી ભરવા નીકળવું પડે તેવી સ્થિતી છે.
પાણી ભરવા માટે ગામની મહિલાઓ જ નહીં પણ પુરૂષોએ પણ જોતરાવું પડે છે. વીજપડીમાં પાણીની લાઈનો લગાવવી તે જીવનનો એક ભાગ બની ગયું છે. બહેરા તંત્રનાં કાને અનેકવાર રજૂઆત કરવામાં આવી તેમ છતાં તંત્ર તેનું પાણી બતાવવામાં વામણું પૂરવાર થયું છે. અમરેલી જીલ્લાનાં 18 હજારની વસ્તી ધરવતા વીજપડી ગામમાં હાલ પાણીની ભયંકર સમસ્યા છે. અહીં ગામનાં તમામ બોર ખાલી થઇ જતાં હાલ લોકોને નર્મદાનાં પાણીનો સહારો લેવો પડી રહ્યો છે. ત્યારે નર્મદાનું પાણી અનિયમિત છે. જે પાંચ છ દિવસે આવતું હોવાથી આખું ગામ હાલ પાણીનાં પોકાર પાડી રહ્યું છે. તંત્ર વીજપડીની પાણી સમસ્યા ઉકેલવા નક્કર કંઈક કરી તેવી લોકોની માંગ છે.