અમદાવાદઃ શહેરનાં વસ્ત્રાપુર વિસ્તારમાં મોડી રાત્રે અજાણ્યા શખ્સે બંગલાની કમ્પાઉન્ડ દીવાલ કૂદીને મોબાઈલ ચોરી કરી હતી.જયારે આ ઈસમ કમ્પાઉન્ડની દીવાલ કૂદીને મોબાઈલ લઇ જઈ રહ્યો હતો ત્યારે તે સમગ્ર ઘટના સીસીટીવીમાં કેદ થઇ ગઈ હતી.
વસ્ત્રાપુર પોલીસ રિક્ષાચાલક અને અજાણ્યા ઈસમ વિરુદ્ધમાં ગુનો નોંધી તપાસ હાથ ધરી છે. વસ્ત્રાપુર વિસ્તારમાં આવેલ સુદર્શન બંગલોઝમાં રહેતા અભિષેક સી. રાજપૂતે વસ્ત્રાપુર પોલીસ સ્ટેશનમાં ચોરીની ફરિયાદ કરી છે.
અભિષેક તેના માલિક અને કપડાનો ધંધો કરતા ધરમવીરસિંહ કર્નલની દુકાનમાં નોકરી કરે છે અને તે દુકાનની બહાર રાત્રે સૂઈ જાય છે તેમજ બંગલાની રખેવાળી કરે છે. ધમરવીરસિંહની દુકાન સુદર્શન બંગલોઝમાં આવેલી છે. ફરિયાદમાં જણાવ્યાં મુજબ તેમનાં ધરમવીરસિંહ બંગલોઝમાં ઉપરનાં માળે રહે છે અને નીચે કપડાનો ધંધો કરે છે. ગઈ કાલે રાત્રે તેમના બંગલાની બહાર અભિષેક સૂતો હતો ત્યારે અજાણ્યો શખસ રિક્ષામાં બેસીને બંગલાની રેકી કરતો હતો.
દરમિયાનમાં એક શખ્સ બંગલોઝની કમ્પાઉન્ડ દીવાલ કૂદીને આવ્યો હતો અને અભિષેકના મોબાઈલની ચોરી કરી હતી. અભિષેકે તેનો મોબાઈલ ઓશિકા નીચે મુક્યો હતો સવારમાં અભિષેક ઊઠ્યો ત્યારે તેનો મોબાઈલ ફોન ગાયબ હતો.
અભિષેકે તેનો મોબાઈલ શોધવાની કોશિશ કરી હતી જે નહીં મળતાં બંગલાના સીસીટીવી ચેક કર્યા હતા. સીસીટીવીમાં બે અજાણયા શખસો જોવા મળ્યા હતા જેમાંથી એક બંગલાની દીવાલ કૂદી કમ્પાઉન્ડમાં ઘૂસ્યો હતો અને મોબાઈલ ચોરી કરી જતો રહ્યો હતો. આ મામલે વસ્ત્રાપુર પોલીસે સીસીટીવી ના આધારે લોકો સામે ગુનો નોંધી તપાસ હાથ ધરી છે.