IPL શરુ થવાને હવે થોડો જ સમય બાકી રહ્યો છે. દરેક ફ્રેન્ચાઇઝી માલિકોએ શ્રેષ્ઠ ખેલાડી સૈન્ય તૈયાર કરવાનો તખ્તો ઘડ્યો છે. સૌ કોઈ જાણે છે કે ટી20માં ઓલ રાઉન્ડર ખેલાડીઓ મેચના પાસા પલ્ટી નાખવા સક્ષમ હોય છે. ઓલ રાઉન્ડર્સ ઉપર ધુંઆધાર રૂપિયા ખર્ચવામાં આવે છે જેમ કે પેટ કમિન્સ (15.5 કરોડ), ગ્લેન મેક્સવેલ(10.75 કરોડ), ક્રિસ મોરિસ(10 કરોડ) વગેરે. તો આવો જાણીએ કે આ વખતે આ આઠેય ટીમમાં એવા કયા ધુરંધર ઓલરાઉન્ડર્સ રહેલા છે?
8. રાજસ્થાન રોયલ્સ: બેન સ્ટોક્સ
વર્લ્ડ કપ અને એશિઝમાં ઇંગ્લેન્ડના આ ખેલાડીઓ વિશ્વમાં સર્વશ્રેષ્ઠ પ્રદર્શન કર્યું છે તેમ કહી શકાય. ભારતની સ્લો પીચ ઉપર સ્ટોક્સનો ટ્રેક રેકોર્ડ સારો નથી પરંતુ આ વખતે સ્ટોક્સ અને ટોમ કુરન આ બે જ વિકલ્પ રાજસ્થાન રોયલ્સ પાસે ઓલરાઉન્ડરની શ્રેણીમાં રહ્યા છે.
7. દિલ્હી કેપિટલ્સ: માર્કસ સ્ટોઈનિસ
આ વખતે દિલ્હીએ તોતિંગ 4.8 કરોડમાં માર્કસ સ્ટોઈનિસને ખરીદ્યો છે. બિગ બેશમાં મેલબર્ન સ્ટાર્સ ટીમના ખેલાડીની આ કપરી પરીક્ષા છે. તેની તુલના મેક્સવેલ સાથે કરી શકાય તેમ છે પણ તેણે બોલિંગ સુધારવી પડશે. આ ઉપરાંત વિદેશી ખેલાડીઓમાં દિલ્હી પાસે ક્રિસ વોક્સ, કીમો પોલ જેવા વિકલ્પો છે જયારે ભારતીય ઓલરાઉન્ડર્સમાં અક્ષર પટેલ જેવા ખેલાડીઓ છે.
6. સન રાઇઝર્સ હૈદરાબાદ: વિજય શંકર
આ વખતે હૈદરાબાદે ઓસ્ટ્રેલિયાના મિચેલ માર્શને 2 કરોડમાં ઓલ રાઉન્ડર તરીકે લીધો છે. જો કે 122ના સ્ટ્રાઇક રેટ સાથેના રન અને 79 ટી20માં ફક્ત 43 વિકેટ તેનું કંગાળ પ્રદર્શન દર્શાવે છે. આ સમયે ભારતીય વિજય શંકરે જવાબદારી લેવી પડશે. 2019ના ખરાબ પ્રદર્શન બાદ શંકર દબાણમાં હશે. અફઘાનિસ્તાનના ઓલ રાઉન્ડર મહોમ્મ્દ નબી ઉપર પણ સૌની નજર રહેશે.
5. ચેન્નાઇ સુપર કિંગ્સ: સેમ કુરન
ચેન્નાઇ હંમેશા વધુ ઓલ રાઉન્ડર્સ માટે જાણીતી ટીમ છે. હાલમાં ટીમમાં DJ બ્રાવો, સેમ કુરન, રવિન્દ્ર જાડેજા, કેદાર જાધવ, મિચેલ સેન્ટનર જેવા માંધાતા ખેલાડીઓ ભરેલા છે. 5.5 કરોડમાં ખરીદાયેલો અંગ્રેજ બોલર સેમ કુરન આ વખતે હુકમનું પાનું બની શકે તેમ છે.
4. રોયલ ચેલેંજર્સ બેંગ્લોર: ક્રિસ મોરિસ
ક્રિસ મોરિસ અને મોઇન અલી આ ટીમના સ્ટાર ઓલરાઉન્ડર છે. ભારતીય વિકલ્પ તરીકે વોશિંગટન સુંદર ઉપર મદાર રાખવામાં આવે છે. ક્રિસ મોરિસ તોતિંગ 10 કરોડ રૂપિયામાં ખરીદાયો છે. તેણે કાતિલ બોલિંગ ઉપરાંત 157.62ના સ્ટ્રાઇકરેટથી આક્રમક બેટિંગ કરીને સૌને ચકિત કરી દીધા છે. પાછલી સીઝનમાં 165ના સ્ટ્રાઇક રેટ સાથે અને પોતાની સ્પિન બોલિંગ સાથે ઇંગ્લેન્ડના મોઇન અલીએ પણ પોતાની પ્રતિભાનો પરિચય આપ્યો હતો.
3. કિંગ્સ XI પંજાબ: જેમ્સ નિશામ
વિદેશી ભારેખમ ખેલાડીઓ જેવા કે ન્યુઝીલેન્ડના જેમ્સ નિશામ, ઓસ્ટ્રેલિયાના ગ્લેન મેક્સવેલ અને ઇંગ્લેન્ડના ક્રિસ જોર્ડન વડે આ ટીમ ઓલ રાઉન્ડર્સ ક્ષેત્રે મજબૂત ગણાય છે. 10.75 કરોડની જંગી રકમે ખરીદાયેલો મેક્સવેલ પોતાની સ્ફોટક ઈંનિગ્સ ઉપરાંત જરૂરિયાત પ્રમાણે બેટિંગને ઢાળી શકવા માટે જાણીતો છે. 50 લાખની મામૂલી રકમે આવેલો જેમ્સ નિશામ ખૂબ સારા ફોર્મમાં છે અને ટીમની અગત્યની કડી બની શકે તેમ છે.
2. કોલકાતા નાઈટ રાઈડર્સ: આન્દ્રે રસેલ
વિન્ડીઝના આન્દ્રે રસેલે પાછલી સીઝનમાં જે કરુણતાથી બોલરોની ધોલાઈ કરી હતી એ ટીમ માટે યાદગાર પાસું છે. 2020માં પણ રસેલ આ જ ફોર્મ ચાલુ રાખવા તત્પર છે. આ ઉપરાંત સુનિલ નારાયણે પણ પોતાની બેટિંગ અને બોલિંગ પ્રતિભાનો પરિચય આપ્યો છે.
1. મુંબઈ ઇન્ડિયન્સ: કિરોન પોલાર્ડ
આ એક ટીમ એવી છે જેના ઓલ રાઉન્ડર્સ સામેની ટીમના હાંજા ગગડાવી નાખવા સક્ષમ છે. પોલાર્ડ ઉપરાંત નેથન કુલ્ટર નાઇલ, હાર્દિક પંડ્યા, કૃણાલ પંડ્યા જેવા દમદાર ખેલાડીઓ ટીમને સંતુલન આપે છે. પંડ્યા ભાઈઓ બોલિંગમાં સ્પિન અને ફાસ્ટ બોલિંગનું યોગદાન આપે છે જયારે કિરોન પોલાર્ડ પોતાની ઝંઝવાતભરી બેટિંગ માટે પ્રખ્યાત છે. ડેથ ઓવર્સમાં વધુ રન ખેંચવા માટે નેથન કુલ્ટર નાઇલ પણ ઉપયોગઈ નીવડી શકે તેમ છે.