INS Mormugao / દુશ્મનોના પરસેવા છૂટશે, ભારતની વધશે તાકાત, શક્તિશાળી વિધ્વંસક યુદ્ધ જહાજ નેવીમાં થશે સામેલ, જાણો ખાસિયતો

• ચીન સાથેના તણાવ બાદ ભારતીય નૌસેના વધુ સતર્ક
• યુદ્ધ જહાજ મોર્મુગાઓને 18 ડિસેમ્બરે નેવીમાં સામેલ કરાશે
• ગોવાના સૌથી જૂના બંદર પરથી રાખવામાં આવ્યું છે નામ

રક્ષા મંત્રી રાજનાથ સિંહ 18 ડિસેમ્બરે સ્વદેશી રીતે નિર્મિત સૌથી શક્તિશાળી વિધ્વંસક યુદ્ધ જહાજ  'મોર્મુગાઓ' ભારતીય નૌકાદળને સમર્પિત કરશે. તેને નેવલ ડોકયાર્ડ, મુંબઈ ખાતે નેવીમાં સામેલ કરવામાં આવશે. આનાથી હિંદ મહાસાગરમાં ભારતીય નૌસેનાની પહોંચ વધશે અને દેશની દરિયાઈ સરહદોની સુરક્ષા વધુ મજબૂત બનશે. રક્ષા મંત્રાલયે શુક્રવારે આ અંગે જાણકારી આપી.

ગોવાના સૌથી જૂના બંદર પરથી રાખવામાં આવ્યું છે નામ
સૌથી શક્તિશાળી વિધ્વંસક યુદ્ધ જહાજને ભારતીય નૌસેનાના 'વોરશિપ ડિઝાઈન બ્યુરો' દ્વારા ડિઝાઇન કરવામાં આવ્યું છે અને તેનું નિર્માણ મઝાગોન ડોક શિપબિલ્ડર્સ લિમિટેડ, મુંબઈ દ્વારા કરવામાં આવ્યું છે. INS મોર્મુગાઓનું નામ ગોવાના ઐતિહાસિક બંદર શહેર પરથી રાખવામાં આવ્યું છે. INS મોર્મુગાઓને ગયા વર્ષે 19 ડિસેમ્બરે પ્રથમ વખત સમુદ્રમાં ઉતારવામાં આવ્યું હતું, આ દિવસે પોર્ટુગીઝ શાસનમાંથી ગોવાની આઝાદીના 60 વર્ષ પૂરા થયા હતા. 

રાષ્ટ્ર નિર્માણમાં નૌકાદળની મહત્વપૂર્ણ ભૂમિકાઃ માધવલે
ભારતીય નૌકાદળના પ્રવક્તા કમાન્ડર વિવેક માધવલે જણાવ્યું હતું કે, ગોવાની આઝાદીમાં ભારતીય નૌકાદળની મહત્વની ભૂમિકા હતી અને યુદ્ધ જહાજને ગોવાના બંદરનું નામ આપવાથી નૌકાદળ અને ગોવાના લોકો વચ્ચેના સંબંધોમાં વધારો થશે એટલું જ નહીં, રાષ્ટ્ર નિર્માણમાં નૌકાદળની મહત્વપૂર્ણ ભૂમિકા પણ છે અને ઓળખ કાયમ રહેશે. યુદ્ધ જહાજ અનેક મિસાઈલો અને એન્ટી સબમરીન રોકેટથી સજ્જ છે, જે સ્ટીલ્થ સ્ટ્રાઈક કરવા સક્ષમ છે. મોર્મુગાઓનું નામ ગોવાના સૌથી જૂના બંદર પરથી રાખવામાં આવ્યું છે.

શક્તિશાળી ગેસ ટર્બાઇનથી સજ્જ છે  ‘મોર્મુગાઓ’
યુદ્ધ જહાજ ‘મોર્મુગાઓ’ ઘણી સ્વદેશી તકનીકોથી સજ્જ છે, જે પ્રોજેક્ટ 15B (P15B) હેઠળ બનાવવામાં આવ્યું છે. ભારતમાં બનેલા શક્તિશાળી યુદ્ધ જહાજોમાંથી એક INS મોર્મુગાઓની લંબાઈ 163 મીટર અને પહોળાઈ 17 મીટર તથા તેનું વજન 7,400 ટન છે. આ જહાજ ચાર શક્તિશાળી ગેસ ટર્બાઇનથી સજ્જ છે અને મોર્મુગાઓ બ્રહ્મોસ સુપરસોનિક ક્રુઝ મિસાઈલથી પણ સજ્જ છે. તે દુશ્મનની મિસાઈલોને પણ ચકમો આપવામાં સક્ષમ છે.

એન્ટી સબમરીન રોકેટ લોન્ચરથી પણ સજ્જ
INS મોર્મુગાઓ બ્રહ્મોસ અને બરાક-8 જેવી મિસાઇલોથી સજ્જ છે. તેમાં ઇઝરાયેલનું રડાર MF-STAR લાગેલું છે, જે હવામાં લાંબા અંતરના લક્ષ્યોને શોધી શકે છે. 127 મિલીમીટર ગનથી  સજ્જ INS મોર્મુગાઓ 300 કિમી દૂર સુધીના લક્ષ્યાંકોને તોડી પાડવામાં સક્ષમ છે. તેમાં AK-630 એન્ટી મિસાઈલ ગન સિસ્ટમ લગાવવામાં આવી છે. આ ઉપરાંત તે એન્ટી સબમરીન રોકેટ લોન્ચરથી પણ સજ્જ છે.