હવામાન વિભાગે વાવાઝોડાને લઈને મોટી આગાહી વ્યક્ત કરી છે.
વાવાઝોડું મચાવી શકે છે તબાહી
ઓડિશા અને આંધ્રપ્રદેશ પર તોળાયું સંકટ
હવામાન વિભાગે જાહેર કરી મોટી આગાહી
હવામાન ખાતાના જણાવ્યા પ્રમાણે, આ ચક્રવાતી તોફાન શનિવારે સવારે આંધ્ર પ્રદેશ અને ઓડિશાના દરિયા કાંઠે પહોંચવાની સંભાવના છે. તો આ સાથે જ દરિયા કાંઠાના વિસ્તારોમાં તોફાન ટકરાવાના 12 થી 24 કલાક પહેલા પૂર્વીય રાજ્યોમાં ભારે વરસાદની આશંકા વ્યક્ત કરવામાં આવી છે. આ વાવાઝોડાનું નામ cyclone jawad આપવામાં આવ્યું છે.
ભારે વરસાદની આગાહી
ઓડિશા નજીકના જિલ્લાઓ સહિત પશ્ચિમ બંગાળના દરિયાઈ જિલ્લા અને તમામ ઉત્તર-પૂર્વીય રાજ્યોમાં ભારે વરસાદની આગાહી કરવામાં આવી છે. હવામાન વિભાગે જણાવ્યું હતું કે, થાઈલેન્ડ અને તેની આસપાસના ક્ષેત્રોમાં વહેલી સવારે સાડા આઠ વાગ્યાની આસપાસ દબાણ સર્જાયું છે. જે આગામી 12 કલાકોમાં અંદમાન-નિકોબારના દરિયા કાંઠે પહોંચી શકે છે.
વાવાઝોડું તબાહી મચાવી શકે
હવામાન ખાતા દ્વારા જાહેર કરાયેલ નિવેદન પ્રમાણે, ત્યારબાદ આ દબાણના ક્ષેત્રના પશ્ચિમ-ઉત્તર અને પશ્ચિમ તરફ આગળ વધવા અને 2 ડિસેમ્બર સુધી દક્ષિણ-પૂર્વ તથા બંગાળની ખાડીના મધ્યભાગમાં ડિપ્રેશનમાં ફેરવાય તેવી સંભાવના છે. તે આગામી 24 કલાકમાં મધ્ય બંગાળની ખાડીમાં ચક્રવાતી વાવાઝોડામાં પરિવર્તિત થવાની સંભાવના છે.
4 ડિસેમ્બરના રોજ આંધ્ર-ઓડિશા સાથે ટકરાઈ શકે છે તોફાન
ત્યારબાદ ઉત્તર-પશ્ચિમ તરફ આગળ વધ્યા બાદ તોફાન 4 ડિસેમ્બર શનિવારની સવારે ઉત્તરી આંધ્રપ્રદેશ-ઓડિશાના તટવર્તી ક્ષેત્રોમાં પહોંચવાની આશંકા વ્યક્ત કરવામાં આવી છે. હવામાન વિભાગે વધુમાં કહ્યું હતું કે, ઓડિશાના તટવર્તી ક્ષેત્રોમાં ભારેથી અતિ ભારે વરસાદ પડી શકે છે.
આ વિસ્તારોમાં હાઈ એલર્ટ
આ સાથે જ, ઓડિશાના નજીકના જિલ્લાઓ, પશ્ચિમ બંગાળના દરિયાકાંઠાના જિલ્લાઓ અને આંધ્ર પ્રદેશના ઉત્તર દરિયાકાંઠાના વિસ્તારોમાં 'ભારેથી અતિ ભારે વરસાદ'ની અપેક્ષા છે. હવામાન વિભાગે કહ્યું કે, "ઉત્તર-પૂર્વીય રાજ્યોમાં 5-6 ડિસેમ્બરે ભારે વરસાદ થવાની સંભાવના છે."