દુર્ઘટના / વડોદરામાં આગની મોટી ઘટનાઃ કંપનીના ગોડાઉનમાં આગ લાગતા 150 ઇ-બાઇક બળીને રાખ થઇ ગઇ, 1 કરોડનું નુકસાન

• વડોદરાની મકરપુરા GIDCમાં આગ
• 150 જેટલા ઈ-બાઈક બળીને ખાખ
• આગમાં અંદાજીત 1 કરોડનું નુકસાન

ગુજરાતના વડોદરામાં મોટી આગની ઘટના બની છે. ઇલેક્ટ્રિક બાઇક બનાવતી વોર્ડ વિઝાર્ડ નામની કંપનીના ગોડાઉનમાં ભીષણ આગ લાગતા 150 જેટલા ઇ-બાઇક બળીને ખાખ થઇ ગયા હતા. આ આગ એટલી ભીષણ હતી કે, ફાયર વિભાગે કલાકો સુધી પાણીમારો ચલાવવા પડ્યો હતો. આ આગ કાબૂમાં આવે તે પહેલા જ ગોડાઉનમાં રાખેલી તમામ ઇ-બાઇકો રાખ થઇ ગઇ હતી.

ધીરે ધીરે આગે વિકરાળ સ્વરૂપ ધારણ કર્યું હતું. આ આગના બનાવને પગલે આસપાસની કંપનીઓના કર્મચારીઓ અને લોકોના ટોળેટોળા એકઠા થયા હતા. તો અહીં પોલીસનો કાફલો પણ દોડી આવ્યો હતો. વીજ કંપનીની ટીમ પણ અહીં પહોંચી હતી અને વિસ્તારનો વીજ પુરવઠો બંધ કરી દીધો હતો.

મહત્વનું છે કે, વોર્ડ વિઝાર્ડ નામની કંપની દ્વારા ઉત્પાદન કરવામાં આવેલ ઇ-બાઇકનો મોટો સ્ટોક ગોડાઉનમાં રાખવામાં આવ્યો હતો. જે ગોડાઉનમાં રહસ્યમય આગ લાગતા આ તમામ ઇલેક્ટ્રિક બાઇકો બળીને ખાખ થઇ ગયા હતા. કંપની અને ગોડાઉનમાં આગ લાગવાનું ચોક્કસ કારણ હજુ સામે આવ્યું નથી. જોકે પ્રાથમિક અનુમાન અનુસાર ગોડાઉનમાં શોર્ટ સર્કિટ થવાના કારણે આગ લાગી હોઇ શકે છે.