મોરબી જિલ્લાના વાંકાનેર સીટીમાં પોલીસ સબ ઈન્સપેક્ટર અને ત્રણ પોલીસકર્મીને સસ્પેન્ડ કરવામાં આવ્યા છે. દારૂના અડ્ડામાં રેડ દરમિયાન ફરજ પર બેદરકારીને લઈને પોલીસકર્મીઓને સસ્પેન્ડ કરવામાં આવ્યા છે.
મળતી માહિતી મુજબ બાતમીના આધારે RR સેલની ટીમે દારૂના અડ્ડા પર દરોડા પાડ્યા હતા. આ દરમિયાન 800 પેટી દારૂનો જથ્થો મળી આવ્યો હતો. ત્યારબાદ SP દ્વારા PSI અને 3 પોલીસકર્મીઓને સસ્પેન્ડ કરવાના આદેશ આપવામાં આવ્યા છે.
ઉલ્લેખનીય છે કે 4 દિવસ અગાઉ વાંકાનેર તાલુકાના રાતીદેવડી ગામ ખાતે RR સેલની એક ટીમ દ્વારા દરોડા પાડવાની કામગીરી હાથ ધરવામાં આવી હતી. જેમાં આર.આર સેલની ટીમે 800 પેટી જેટલો વિદેશી દારૂનો જથ્થો કબજે કરતા વાંકાનેર સીટી પોલીસ સામે સવાલો ઉઠ્યા હતા.
આટલી મોટી સંખ્યામાં મળી આવેલા દારૂના જથ્થાને લઇને શંકાના ઘેરામાં આવેલ વાંકાનેર સીટી પોલીસની લાપરવાહીની નોંધ જિલ્લાના પોલીસવડાએ લેતા તાત્કાલિક અસરથી સીટી PSI સહિત અન્ય 3 પોલીસકર્મીઓને સસ્પેન્ડ કરવાનો આદેશ કરતા પોલીસ બેડાંમાં ખળભળાટ મચી જવા પામ્યો હતો.