હાડ થીજવતી ઠંડી વચ્ચે અમદાવાદ, વડોદરા, સુરત અને રાજકોટની સ્કૂલોમાં VTVનું રિયાલિટી ચેક, ઠંડીના કારણે સ્કૂલના સમયમાં ફેરફાર કરવાની વાલીઓની માંગ, વાલીઓએ કહ્યું રાજકોટની ઘટનાથી લેવી જોઈએ શીખ.
ગુજરાતભરમાં ગુલાબી ઠંડીનો ચમકારો
હાડ થીજવતી ઠંડી વચ્ચે સ્કૂલોમાં VTVનું રિયાલિટી ચેક
અમદાવાદ, વડોદરા, સુરત અને રાજકોટની સ્કૂલોમાં પહોંચી ટીમ
ગુજરાતમાં ફરી એકવાર કડકડતી ઠંડીનો અહેસાસ થઈ રહ્યો છે. જોકે હજુ પણ બે દિવસ ઠંડીનો ચમકારો જોવા મળશે. ઠંડીમાં વધારો થતાં VTV ન્યૂઝ દ્વારા અમદાવાદ, વડોદરા, સુરત અને રાજકોટની સ્કૂલોમાં રિયાલિટી ચેક કરવામાં આવ્યું હતું. આ દરમિયાન વાલીઓએ જણાવ્યું હતું કે, શાળાઓએ સમજીને સમય ઘટાડવો જોઈએ, શાળાના વહીવટી તંત્રએ રાજકોટની ઘટનાથી શીખ લેવી જોઈએ. મહત્વનું છે કે, ગઈકાલે રાજકોટમાંથી હચમચાવી નાખે એવી ઘટના સામે આવી હતી, રાજકોટની જસાણી સ્કૂલમાં ધોરણ 8માં અભ્યાસ કરતી વિદ્યાર્થિનીનું ઠંડીને કારણે મોત થયું હોવાનો પરિવારે દાવો કર્યો હતો.
અમદાવાદની સ્કૂલમાં VTVનું રિયાલિટી ચેક
આજે વહેલી સવારે VTV ન્યૂઝ દ્વારા અમદાવાદ, વડોદરા, સુરત અને રાજકોટની શાળાઓમાં રિયાલિટી ચેક કરવામાં આવ્યું હતું. અમદાવાદના સેટલાઈટ વિસ્તારમાં આવેલી કામેશ્વર સ્કૂલ ખાતે VTVની ટીમ પહોંચી હતી. જ્યાં વહેલી સવારે કડકડતી ઠંડીમાં બાળકો શાળાએ આવતા જોવા મળ્યા હતા. બાળકો સ્વેટર અને ટોપી પહેરીને શાળાએ પહોંચ્યા હતા. આ દરમિયાન VTV સાથેની વાતચીતમાં સાગર રાજપુરોહિત નામના વાલીએ જણાવ્યું હતું કે, જ્યાં સુધી ઠંડી પડી રહી છે, ત્યાં સુધી શાળાનો સમય અડધી કલાક કે એક કલાક મોડો કરવો જોઈએ. તો અન્ય એક વાલીએ જણાવ્યું હતું કે, શાળાએ કંઈક સમજવું જોઈએ, અપૂરતી ઊંઘના કારણે બાળકોના સ્વાસ્થ્ય અને મગજ પર પણ અસર થાય છે. તાજેતરમાં રાજકોટમાં ઠંડીના કારણે એક બાળકીનું મોત નીપજ્યું હોવાના સમાચાર સામે આવ્યા છે. શાળાઓએ આ ઘટનાથી શીખ લેવી જોઈએ. શાળાઓ 2 શિફ્ટ ચલાવે છે, તેમાં જરાય બાંધ છોડ કરતી નથી. આ એક જાતની મનમાની છે.
વડોદરાની સ્કૂલમાં VTVનું રિયાલિટી ચેક
કડકડતી ઠંડીમાં વડોદરાની સ્કૂલમાં VTV ન્યૂઝ દ્વારા રિયાલિટી ચેક કરવામાં આવ્યું હતું. વીટીવીની ટીમ વહેલી સવારે શહેરની બ્રાઈટ સ્કૂલ ખાતે પહોંચી હતી. આ દરમિયાન વહેલી સવારે નાના ભૂલકાઓ સ્વેટર અને ટોપી પહેરીને શાળા આવતા જોવા મળ્યા હતા. વડોદરાના વાલીઓએ VTV સાથેની વાતચીતમાં જણાવ્યું હતું કે, રાજ્યમાં ઠંડી વધુ પડી રહી છે બાળકોને ઠંડીથી બચાવવા બહુ જ અઘરા છે. વહેલી સવારની શાળા અને કડકડતી ઠંડીથી મુશ્કેલી થઈ રહી છે. બાળકોને ઠંડીથી બચાવવા એક કરતાં વધુ સ્વેટર પહેરાવીને છીએ. બાળકોને ઇનર પહેરાવી તેના પર શાળાનું સ્વેટર પહેરાવીએ છીએ. કારણ કે સ્કૂલ તરફથી આપવામાં આવતું સ્વેટર ખૂબ પાતળું છે. સ્વેટરમાં ઠંડી લાગે છે.
ઠંડીનું પ્રમાણ વધુ છે એટલે બાળકોને ઠંડી લાગે છેઃ પ્રિન્સિપાલ
બ્રાઈટ સ્કૂલના પ્રાયમરી વિભાગના પ્રિન્સિપાલ રીટા કંથારિયાએ જણાવ્યું હતું કે, સ્કૂલ તરફથી આપવામાં આવેલ સ્વેટરની ક્વોલિટી સારી છે. ઠંડીનું પ્રમાણ વધુ છે એટલે બાળકોને ઠંડી લાગે છે. ઠંડીનું પ્રમાણ વધતાં બાળકોને ઇનર અને ઘરેથી વધુ સ્વેટર પહેરવાની છૂટછાટ આપવામાં આવી છે. આ ઉપરાંત શાળાનો સમય સવારે 7ના બદલે 7.30 વાગ્યાનો કરવામાં આવ્યો છે. દરેક વિદ્યાર્થી અને વાલીઓને સ્કૂલે જાણ કરી દીધી છે.
સુરતની સ્કૂલમાં VTVનું રિયાલિટી ચેક
સુરતમાં કડકડતી ઠંડી વચ્ચે બાળકો સ્કૂલ પહોચ્યા હતા. સુરતના અડાજણ વિસ્તારની વિદ્યાકુંજ સ્કૂલ ખાતે VTVની ટીમ પહોંચી હતી. આ દરમિયાન શિયાળાની ઠંડીમાં પણ વિદ્યાર્થીઓ સમયસર શાળાએ આવતા જોવા મળ્યા હતા. અનેક વિદ્યાર્થીઓ સ્વેટર વગર સ્કૂલ ડ્રેસમાં શાળાએ આવતા જોવા મળ્યા હતા. આ દરમિયાન સુરતના વાલીઓએ પણ શાળાનો સમય મોડો કરવાની માંગ કરી હતી. વાલીઓએ જણાવ્યું હતું કે, શાળાનો સમય માત્ર 15 મિનિટ મોડો કરાયો છે. તેઓએ પણ રાજકોટની ઘટના પર દુઃખ વ્યક્ત કર્યું હતું. આ મામલે VTV સાથેની વાતચીતમાં શાળા સંચાલકે જણાવ્યું હતું કે, સુરતમાં વધુ ઠંડી નથી પડતી. હાલ ત્રણ ચાર દિવસથી ઠંડીનો ચમકારો છે. રાજકોટની ઘટના ચોક્કસ દુઃખદ છે. સમગ્ર શાળાઓ બાબતે નિર્ણય કરવો યોગ્ય નથી.
રાજકોટની સ્કૂલમાં VTVનું રિયાલિટી ચેક
જ્યારે VTVની ટીમ રાજકોટની કોનવેન્ટ સ્કૂલમાં રિયાલિટી ચેક કરવા પહોંચી ત્યારે નાના નાના બાળકો કડકડતી ઠંડીમાં સ્કૂલે આવતા જોવા મળ્યા. આ દરમિયાન વાલીઓએ જણાવ્યું હતું કે, રાજકોટની આ સ્કૂલે ઠંડીને કારણે 10 મિનિટ સમય મોડો કર્યો છે. સ્કૂલે સવારે 7.30ને બદલે સમય 7.40 કર્યો છે. બાળકોને સવારે 7.30 વાગ્યે હાજર થવું પડે છે. રાજકોટમાં ગઈકાલે જસાણી સ્કૂલની વિદ્યાર્થીનીનું મૃત્યુ થયું છે. ભારે ઠંડી વચ્ચે એક વિદ્યાર્થીનીનું ચાલું ક્લાસે એટેકથી મૃત્યુ થયું છે. આ ખૂબ જ દુઃખદ ઘટના છે.
રીયાની માતાએ ગંભીર આક્ષેપ સાથે કરી વિનંતી
અત્રે ઉલ્લેખનીય છે કે, રાજકોટમાં જસાણી સ્કૂલની વિદ્યાર્થિનીના મૃત્યુ મામલે વિદ્યાર્થિની રીયાની માતાએ ગંભીર આક્ષેપ કર્યો હતો. તેમણે ગંભીર આક્ષેપ સાથે કરી વિનંતી કરતા કહ્યું હતું કે, મારી દીકરી જેવી દુઃખદ ઘટના કોઇ સાથે ન થાય અને શિયાળામાં સ્કૂલનો ટાઇમ બદલવો જરૂરી છે. તેમણે કહ્યું હતું કે, સ્કૂલનો સમય બદલો, સવારનો વહેલો સમય ન રાખો તેમણે જણાવ્યું હતું કે, શિયાળામાં સ્કૂલનો ટાઇમ બદલવો જરૂરી અને સ્કૂલનો સમય બદલો, સવારનો વહેલો સમય ન રાખો.
તેમણે કહ્યું હતું કે, કડડતી ઠંડીમાં છોકરાઓને આવવું પડે તે યોગ્ય નહીં અને બની શકે તો સ્કૂલનો સમય મોડો રાખો અને સ્કૂલના જ સ્વેટર પહેરવા માટે મજબૂર કરો તે યોગ્ય નહીં અને સ્કૂલના સ્વેટર ઠંડી ઝીલી શકે તેવા નથી. તેમણે જણાવ્યું હતું કે, સ્કૂલમાં છોકરાઓ જાડા સ્વેટર પહેરે તો ઠંડી ઝીલી શકે. મે મારી ફૂલ જેવી દીકરી ખોઇ નાંખી છે. રીયા એકદમ તંદુરસ્ત હતી, કોઇ પણ બીમારી ન હતી અને ઠંડીને કારણે બ્લડ જામી ગયું તેમાં હ્રદય બંધ થઇ ગયું. જેમાં મારી ફૂલ જેવી દીકરીનું મૃત્યુ નીપજ્યું.