ગુજરાતમાં હેલ્મેટ પહેરવાના નિયમનું કડકપણે અમલીકરણ થવાના સંકેત, ગુજરાત હાઇકોર્ટે કરી છે ટકોર
હેલ્મેટ ફરજીયાત માટે હાઇકોર્ટની ટકોર
હેલ્મેટ માટે VTVનું રિયાલિટી ચેક
અમદાવાદ, સુરત, વડોદરામાં રિયાલીટી ચેક
માર્ચ મહિનાથી રાજ્યમાં ટ્રાફિકના નિયમો કડક કરવામાં આવ્યા છે. હેલ્મેટ અને સીટ બેલ્ટના નિયમનું કડક અમલીકરણ થાય તે માટે ટ્રાફિક ડ્રાઇવની શરુઆત કરવામાં આવી છે પરંતુ તેમ છતાં પણ હજી લોકો લાપરવાહી દાખવી રહ્યા છે. હેલ્મેટ પહેરવાનું કોરોના કાળમાં જાણે છૂટી ગયુ હોય તેમ વાહન લઇને નીકળી પડે છે. પરંતુ હવે ગુજરાત હાઇકોર્ટે પણ હેલ્મેટનો નિયમ કડક બનાવવા ટકોર કરી છે. ત્યારે હવે જો હેલ્મેટ ન પહેર્યુ તો ખિસ્સા ખાલી થશે તેમાં કોઇ બેમત નહી.
વીટીવી ન્યૂઝ દ્વારા રિયાલીટી ચેક
હાઇકોર્ટે રાજ્ય સરકારને હેલ્મેટનો નિયમ કડક અમલી બને તે માટે ટકોર કરી છે. રાજ્ય સરકાર પણ ટ્રાફિક ડ્રાઇવ ચલાવી રહી છે પરંતુ લોકો હેલ્મેટ પહેરવા અંગે શું વિચારી રહ્યા છે, શા માટે હેલ્મેટ પહેરતા નથી તે અંગે વીટીવી ન્યૂઝ દ્વારા રિયાલીટી ચેક કરવામાં આવ્યુ હતું. સુરત, વડોદરા અને અમદાવાદમાં હેલ્મેટ પહેરવા અંગે વાહનચાલકોના મંતવ્યો જાણવામાં આવ્યા.
'હાઇકોર્ટ કહે છે તો પહેરીશું'
વાહનચાલકોની સુરક્ષાને લઇને હેલ્મેટ પહેરવુ જરુરી છે પરંતુ વડોદરામાં તો દસમાંથી માંડ એક વ્યક્તિએ જ હેલ્મેટ પહેરેલુ જોવા મળ્યુ. લોકોમાં હજી પણ ટ્રાફિકના નિયમને લઇન સજાગતા નથી. હેલ્મેટ કેમ નથી પહેર્યુ તેમ પૂછતા પહેલા તો કંઇ જવાબ જ ન આપ્યો. પછી કહ્યું કે હાઇકોર્ટ કહેશે તો પહેરી લઇશું.
'સીટીમાં તો હેલ્મેટ ન પહેરીએ તો ચાલે'
તો સુરતમાં જ્યારે રિયાલીટી ચેક કરવામાં આવ્યું તો જોવા મળ્યુ કે અહીં લોકોમાં હેલમેટ પહેરવા અંગે જાગૃતિ જોવા મળી હતી, મોટાભાગના વાહનચાલકો હેલમેટ પહેરેલા જોવા મળ્યા હતા. તેઓએ જણાવ્યું હતું કે હેલ્મેટ પહેરવાથી ફાયદો જ છે, દરેકે પહેરવું જોઇએ. તો અન્ય એક વાહનચાલકે જણાવ્યુ કે હેલ્મેટ માત્ર હાઇવે પર જ હોવું જોઇએ. તો કેટલાકે તો હેલ્મેટ ન પહેરવા માટેના રીતસર બહાના કરતા જોવા મળ્યા.
'હેલ્મેટ પહેરવા અંગે મતમતાંતર'
હેલ્મેટ મુદ્દે અમદાવાદની જનતાના અલગ અલગ મત સામે આવ્યા. કેટલાંક લોકો હેલ્મેટ સેફ્ટી માટે હોવાથી ફરજીયાત કરવું જરૂરી હોવાનો મત આપ્યો. શહેરમાં સ્વૈચ્છિક હેલ્મેટ પહેરતા વાહનચાલોક પણ નજરે પડ્યા. સિટી વિસ્તારમાં હેલ્મેટ પર રાહત આપવાનો જનતાનો મત હતો. હાઇવે પર હેલ્મેટ ફરજિયાત કરવું જોઇએ એવું પણ જનતા કહી રહી છે.
હાઇકોર્ટે કરી આ ટકોર
ગુજરાત હાઇકોર્ટમાં ચાલી રહેલી એક કન્ટેમ્પ્ટ ઓફ કોર્ટની સુનાવણી દરમિયાન હાઇકોર્ટે રાજ્ય સરકારને સવાલ કર્યો હતો કે રાજ્યમાં હેલ્મેટના કાયદાનું કડકપણે અમલીકરણ કેમ નથી કરાતુ ? સાથે એમ પણ પૂછ્યુ હતું કે રાજ્યમાં હેલ્મેટ ફરજિયાત નથી કે શું ? ચીફ જસ્ટિસે રાજ્ય સરકારને કહ્યું હતું કે હેલ્મેટના કાયદાનું કડકાઇથી પાલન કરાવો. લોકોની સુરક્ષા બાબતની અમલવારી થવી જ જોઈએ. આ માટે સરકાર ઢીલાશ કેમ રાખી રહી છે?