સ્ટિંગ ઓપરેશન / VTV EXCLUSIVE : ગુજરાતમાં પૈસાથી શિક્ષણને ખરીદી શકાય છે, જુઓ સ્કૂલો અને ખાનગી કોચિંગ ક્લાસની મિલીભગતનો મોટો પર્દાફાશ

• ગુજરાતના ઉચ્ચ શિક્ષણને ખતમ કરતી મોડ્સ ઓપરેન્ડ પર મોટો ખુલાસો
• શૈક્ષણિક ઇન્સ્ટિટ્યુટ-માલેતુજાર શાળાના કાળા કારોબાર પર ખુલાસો 
• પૈસાથી ઉચ્ચ શિક્ષણને કેવી રીતે ખરીદી શકાય તેના પર ખુલાસો 

ગુજરાતમાં શિક્ષણના પવિત્ર વ્યવસાયનું વેપારીકરણ થઇ રહ્યું છે. પોતાના બાળકોના ઉજ્જવળ ભવિષ્ય માટે ચિંતિત વાલીઓનો આકાશ ઇન્સ્ટિટ્યૂટ અને એલન ઇન્સ્ટિટ્યૂટ જેવી ખાનગી સંસ્થાઓ ગેરલાભ લઇ રહી છે. વાલીઓ પોતાના બાળકોના ઉજ્જવળ ભવિષ્ય માટે બેફામ ખર્ચ કરવા મજબૂર બન્યા છે. ત્યારે VTV ન્યૂઝે પણ પ્રજાહિતને સર્વોપરી માનીને શિક્ષણના વેપારનો કાળો કારોબાર કરતી આકાશ ઇન્સ્ટિટ્યૂટ અને એલન ઇન્સ્ટિટ્યૂટનું ખાસ સ્ટિંગ ઓપરેશન કર્યું છે. 

શાળા એ વિદ્યાનું મંદિર છે ત્યારે પવિત્ર વ્યવસાયનો કાળો કારોબાર કરતા આ શિક્ષણ માફિયાઓના કાળા કામનો પર્દાફાશ કરવાનો VTV ન્યૂઝે નિર્ણય કર્યો છે. VTV ન્યૂઝના રિપોર્ટરે આ શિક્ષણનો વેપાર કરતી આકાશ ઇન્સ્ટિટ્યૂટની મુલાકાત લઇ તે કેવી રીતે આ શિક્ષણનો કાળો કારોબાર કરી વાલીઓ અને વિદ્યાર્થીઓને પોતાના શિકાર બનાવે છે તેનું સ્ટિંગ ઓપરેશન કર્યું છે.

જુઓ શું છે મોડસ ઓપરેન્ડી

JEE અને NEET જેવી એન્ટરન્સ પરીક્ષા માટે ધો.11-12 સાયન્સનો અભ્યાસ કરવો જરૂરી છે. આવામાં આ પ્રવેશ પરીક્ષાની તૈયારીઓ સ્કૂલમાં થઈ શકતી ન હોવાથી સ્કૂલો એલન અને આકાશ જેવી ખાનગી ઈન્સ્ટિટ્યૂટ સાથે સેટિંગ કરીને એડમિશન આપી દે છે. એડમિશન આપતી વખતે એ પણ સવલત કરી દેવામાં આવે છે કે હાજરી નહીં હોય તો પણ ચાલશે પરંતુ તમારે ખાનગી ઈન્સ્ટિટ્યૂટમાં ભણવાનું રહેશે. આવામાં માલેતૂજાર વ્યક્તિઓના સંતાનો માનીતી સ્કૂલોમાં હાજરી વિના પૈસાના જોરે એડમિશન મેળવી લે છે. ટ્યુશન ક્લાસિસવાળા એક વિદ્યાર્થી દીઠ 2 લાખ સુધીની ફી લે છે. સ્કુલ પણ બોગસ એડમિશન માટે એક લાખ રુપિયા સુધીની ફી લે છે. ઉચ્ચ શિક્ષણ વિભાગની નજર સામે જ શિક્ષણનો કાળો કારોબાર થઇ રહ્યો છે. ગુજરાતમાં ઉચ્ચ શિક્ષણ વિભાગ માલેતુજાર અને ક્લાસિસો સામે મૌન છે. VTVના કેમેરામાં બોગસ એડમિશનનો પર્દાફાશ થયો છે.

લાલચુ સ્કુલની ભાગીદારીથી આકાશ અને એલનનો ધિકતો ધંધો

પૈસાથી ઉચ્ચ શિક્ષણને કેવી રીતે ખરીદી શકાય તેના પર ખુલાસો થયો છે. VTVના સ્ટીંગ ઓપરેશનમાં શૈક્ષણિક ઇન્સ્ટિટ્યુટ અને શાળાની પોલ ખુલી છે. શૈક્ષણિક ઇન્સ્ટિટ્યુટએ ગુજરાતમાં ઉચ્ચ શિક્ષણને ધંધો બનાવી દીધો છે. આકાશ અને એલને ગુજરાતમાં ઉચ્ચ શિક્ષણને ધંધો બનાવ્યો છે. લાલચુ સ્કુલની ભાગીદારીથી આકાશ અને એલનનો ધિકતો ધંધો સામે આવ્યો છે. એસ.એસ.ડિવાઇન સ્કૂલ અને આકાશ ક્લાસિસમાં વીટીવીએ સ્ટિંગ ઓપરેશન કર્યું છે. સ્કુલમાં વગર હાજરીએ એડમિશન આપવામાં આવે છે. 

બોગસ એડમિશન આપતી સ્કુલ 

1. એસ એસ ડિવાઇન સાયન્સ સીટી 
2. સાધના સ્કૂલ , બોપલ  
3. દિવ્ય જ્યોત સ્કૂલ , બોપલ 
4. કે એન પટેલ સ્કૂલ , બોપલ 
5. DAV સ્કુલ -  ચાંદખેડા 
6. પોદાર ઇન્ટરનેશનલ - વસ્ત્રાલ
7. ઉદ્ગમ સ્કુલ - મેમનગર 
8. તુલિપ સ્કુલ - બોપલ 
9. વેદાંત ઇન્ટરનેશનલ - વસ્ત્રાલ 
10. આનંદનિકેતન - સુધડ 

આકાશ ઈન્ટિટ્યૂટનું સ્ટીંગ ઓપરેશન

રિપોર્ટર- ધો.10ની પરીક્ષા આપી છે, હવે મેડિકલ ફિલ્ડમાં બાળકને ભણવું છે...
આકાશ ઇન્સ્ટિટ્યૂટનો કર્મચારી - અહીં બે વર્ષનો મેડિકલ કોર્ષ છે, ફિઝિક્સ,કેમિસ્ટ્રી,જીઓલોજી અને બાયોલોજીના વિષય પર ભણાવામાં આવશે, અહીં એક પરીક્ષા આપવી પડશે...

રિપોર્ટર - ઓકે આપી દેશે.
આકાશ ઇન્સ્ટિટ્યૂટનો કર્મચારી- બાળક ક્યાં મિડિયમમાં ભણવા માગે છે? 

રિપોર્ટર - ગુજરાતી મિડિયમમાં ભણવા માગે છે 
આકાશ ઇન્સ્ટિટ્યૂટનો કર્મચારી- ક્યાં મિડિયમમાં ભણે છે બાળક? 

રિપોર્ટર- ગુજરાતી મિડિયમ, ગુજરાત બોર્ડ 
આકાશ ઇન્સ્ટિટ્યૂટનો કર્મચારી- તમારે સપોર્ટિવ સ્કૂલમાં જ જવું છે ને? 

રિપોર્ટર - હા 
આકાશ ઇન્સ્ટિટ્યૂટનો કર્મચારી- ઓકે હું સપોર્ટિવ સ્કૂલ જે ગુજરાત બોર્ડની છે તેની માહિતી અને લિસ્ટ આપું છું 

રિપોર્ટર- સ્કૂલમાં હાજરીની સમસ્યા નહીં થાય ને?   
આકાશ ઇન્સ્ટિટ્યૂટનો કર્મચારી- આપ ક્યાં રહો છો? 

અહીંથી આ શિક્ષણનો કાળો કારોબાર કરતી આકાશ ઇન્સ્ટિટ્યૂટનો ખેલ શરૂ થાય છે. આકાશ ઇન્સ્ટિટ્યૂટનો કર્મચારી અમદાવાદના સાયન્સ સિટી વિસ્તારમાં આવેલી એસ.એસ.ડિવાઇન સ્કૂલને સજેસ્ટ કરે છે. અને કહે છે કે બહુ સપોર્ટિવ છે. હું નંબર આપીશ એટલે તમારી તમામ સમસ્યાનું નિરાકરણ આવી જશે.

રિપોર્ટર- બાપુનગર 
આકાશ ઇન્સ્ટિટ્યૂટનો કર્મચારી- બોપલમાં એસ.એસ.ડિવાઇન કરીને સ્કૂલ છે, અમારી સપોર્ટિવ સ્કૂલ છે, હું આપને નંબર આપીશ, ત્યાં જશો એટલે થઇ જશે બધું 

રિપોર્ટર- ઓકે મેડમ 
આકાશ ઇન્સ્ટિટ્યૂટનો કર્મચારી- અહીં પેહલા એડમિશન લેવું પડશે, ગુજરાતીમાં ભણશે કે ઈંગ્લીશ મિડિયમ માં? 

રિપોર્ટર- ગુજરાતી મિડિયમમાં 
આકાશ ઇન્સ્ટિટ્યૂટનો કર્મચારી- 30 સવાલોનું એક પેપર હશે, ઓફલાઈન હશે પેપર, આ પરીક્ષા ફરજિયાત છે 

રિપોર્ટર- ઓકે મેડમ આ પરીક્ષા માટે તૈયારી કરાવી દઇશું 
આકાશ ઇન્સ્ટિટ્યૂટનો કર્મચારી- 4 દિવસ અહીં આવવાનું રહેશે 

આકાશ ઇન્સ્ટિટ્યૂટનો કર્મચારી બાળકને કોઇ સમસ્યા નહીં થાય તે જણાવી હળવેથી મસમોટી ફીની રકમ જણાવે છે. પાછું આ મસમોટી ફી ચુકવવા માટે વાલીને હપ્તાની પણ વ્યવસ્થા કરી દેવાય છે. વાલીના પસંદગીના લોકેશન સાથે પોતાની સાથે સંકળાયેલી શાળાનું લિસ્ટ પણ આપવામાં આવે છે. પછી પણ જો કોઇ સમસ્યા હોય તો આકાશ ઇન્સ્ટિટ્યૂટનો કર્મચારી કોઇ યોગેશ સરનો રેફરન્સ આપવા જણાવે છે.

રિપોર્ટર- તો પછી સ્કૂલમાં બાળકને સમસ્યા નહીં થાય ને? 
આકાશ ઇન્સ્ટિટ્યૂટનો કર્મચારી- ના કોઈ સમસ્યા નહીં થાય, અહીં બુધવારે શિક્ષકોની રજા હોય છે એટલે બુધવારે જ બોલાવશે ફક્ત એક દિવસ, અમારા સારા સબંધ છે, હું આપને નંબર આપીશ, જે ફીસ છે એ રેગ્યુલર છે, હાજરીમાં કોઈ સમસ્યા નહીં થાય, ખાલી પરીક્ષા આપવા જવું પડશે... 

રિપોર્ટર- ઓકે મેડમ 
આકાશ ઇન્સ્ટિટ્યૂટનો કર્મચારી- અહીંની કુલ ફી રૂ. 2.81 લાખ છે 

રિપોર્ટર- ફી માં ઇન્સ્ટોલમેન્ટ થઇ શકે? 
આકાશ ઇન્સ્ટિટ્યૂટનો કર્મચારી- હા થઇ જશે 

રિપોર્ટર- ઓકે મેડમ 
આકાશ ઇન્સ્ટિટ્યૂટનો કર્મચારી- હું આપને સ્કૂલના લોકેશન અને લિસ્ટ આપું છું 

રિપોર્ટર- આ સ્કૂલમાં આપનો રેફરન્સ આપવાનો છે ને? 
આકાશ ઇન્સ્ટિટ્યૂટનો કર્મચારી- હા યોગેશ સરનું નામ આપજો, હું આપણે નંબર આપું છું 

આકાશ ઇન્સ્ટિટ્યૂટનો કર્મચારી- 5 સ્કૂલ ગુજરાત બોર્ડની છે, એસ.એસ.ડિવાઇન સ્કૂલ સારી છે તે પ્રિફર કરજો, કેહજો આકાશ ઇન્સ્ટિટ્યૂટમાંથી મોકલ્યા છે... 

રિપોર્ટર- ફી કેટલી હશે? 
આકાશ ઇન્સ્ટિટ્યૂટનો કર્મચારી- 30 હજાર જેટલી હશે 

રિપોર્ટર- ઓકે મેડમ ધન્યવાદ

VTV ન્યૂઝના રિપોર્ટરે આકાશ ઇન્સ્ટિટ્યૂટની વાતને ક્રોસ ચેક કરવા તથા શાળાની મિલિભગતની જાણકારી ચોક્કસ કરવા માટે અમદાવાદના સાયન્સ સિટી વિસ્તારમાં આવેલી એસ.એસ.ડિવાઇન શાળાએ જઇને ત્યાનું પણ સ્ટિંગ કર્યું. તો આવો જોઇએ એસ.એસ.ડિવાઇન સ્કૂલના સ્ટિંગના કેટલાંક અંશો.

રિપોર્ટર- સાહેબ આકાશ ઇન્સ્ટિટ્યૂટમાંથી મોકલ્યા છે, એડમિશન માટે... 
એસ.એસ.ડિવાઇન સ્કૂલ- વિદ્યાર્થી કોણ છે? 

રિપોર્ટર- મારો ભાઈ છે. 
એસ.એસ.ડિવાઇન સ્કૂલ- કઈ સ્કૂલમાં ભણે છે? 

રિપોર્ટર- વેદાંત સ્કૂલ, બાપુનગર 
એસ.એસ.ડિવાઇન સ્કૂલ- સાયન્સ? ગુજરાતી માધ્યમમાં લેવાનું છે એડમિશન? 

રિપોર્ટર- હા સાહેબ, ફી શું છે? 
એસ.એસ.ડિવાઇન સ્કૂલ- 25,000 અને બીજા 2,500 રૂપિયા 

રિપોર્ટર- પરીક્ષા અને હાજરી? 
એસ.એસ.ડિવાઇન સ્કૂલ- બધું સમજાવી દઉં છું. 

રિપોર્ટર- એક જ દિવસ આવવાનું રહેશે સ્કૂલ? 
એસ.એસ.ડિવાઇન સ્કૂલ- હા એ તો એવું જ ચાલે છે, વીકમાં એક જ દિવસ આવવાનું છે. 

રિપોર્ટર- ઓકે સાહેબ 
એસ.એસ.ડિવાઇન સ્કૂલ- 3 પરીક્ષા આપવાની રહેશે 

રિપોર્ટર- હાજરી? 
એસ.એસ.ડિવાઇન સ્કૂલ- થઇ જશે, પ્રેક્ટિકલની જવાબદારી અમારી રહેશે 

રિપોર્ટર- ઓકે સાહેબ, આની કોઈ વધારાની ફી નથી? 
એસ.એસ.ડિવાઇન સ્કૂલ- ખાલી 2500 એક્સ્ટ્રા લગાવ્યા એજ છે, જે રોકડા આપવાના રહેશે, બાકી ફી છે તે ચેકથી આપી શકાય? 

અહીં એસ.એસ.ડિવાઇન સ્કૂલના કર્મચારીએ શાળાની તમામ પ્રક્રિયા સમજાવીને અમારા રિપોર્ટરને નિશ્વિત થઇ જવા જણાવ્યું હતું. અમારા રિપોર્ટરે થોડીક ચિંતા વ્યક્ત કરતા તેમને બિન્દાસ્તપણે જણાવ્યું કે તમે જરા પણ ચિંતા ન કરો અમદાવાદની તમામ શાળાઓમાં આજ સિસ્ટમ ચાલે છે. કોઇ સમસ્યા નહીં થાય તમારો એકનો વિદ્યાર્થી અહીં નથી ભણતો અહીં બધી મોટી મોટી તોપોના છોકરા ભણે છે...IPS, IASના છોકરાઓ પણ અહીં આવી રીતે જ અભ્યાસ કરે છે.

રિપોર્ટર- ઓકે સાહેબ, હાજરીની કોઈ સમસ્યા નહીં થાય ને? 
એસ.એસ.ડિવાઇન સ્કૂલ- કોઈ જ સમસ્યા નહીં થાય, બધુ આમ જ ચાલે છે, તમારે પાછું વળીને નહીં જોવાનું, તમારો ભાઈ એક નથી ભણતો, બધી તોપોના ભણે છે, IPS, IASના છોકરાઓ અહીં આમ જ ભણે છે, સ્કૂલના શિક્ષકોની તાકાત નથી કે નિટની તૈયારી કરાવી શકે 

રિપોર્ટર- એડમિશન ક્યારે થશે? 
એસ.એસ.ડિવાઇન સ્કૂલ- પરીક્ષા પતિ જવા દો, બહાર ડોક્યુમેન્ટ લખેલા છે તેનો ફોટો પાડી લો, 2500 ભરી દો એટલે એડમિશન નક્કી થઇ જશે 

રિપોર્ટર- ઓકે સાહેબ આપનું નામ શું છે? 
એસ.એસ.ડિવાઇન સ્કૂલ- સંજય પટેલ,ડાયરેકટર, એસ.એસ.ડિવાઇન 
રિપોર્ટર- ઓકે સાહેબ આભાર

તો આપે જોયુ કેટલું સુનિયોજિત રીતે શાળા અને ખાનગી ઇન્સ્ટિટ્યૂટની મિલિભગતથી મસમોટું રેકેટ ચાલે છે. આમા જો સામાન્ય જનતાએ પોતાના બાળકના ભવિષ્યની ચિંતા કરવી હોય તો આવી બેફામ શિક્ષણનો કાળો કારોબાર કરતી ખાનગી ઇન્સ્ટિટ્યૂટ અને શાળાઓને મસમોટી ફી ચુકવવી પડશે. આમ આવી ભયંકર સ્થિતિમાં મોંઘવારીના કપરા કાળમાં કોઇ ગરીબ માણસ પોતાના બાળકને કેવી રીતે તબીબ કે ઇજનેર બનાવી શકે તે એક સભ્ય સમાજે વિચારવાની ચોક્કસથી જરૂર છે.