કોની બેદરકારી? / VTV રિયાલિટી ચેક: રાજકોટમાં જે રોડ પર સૌથી વધુ ઈ-મેમો આવ્યા ત્યાં તંત્રની જ 'ભૂલ' સામે આવી, જુઓ વીડિયો

• રાજકોટમાં આઈ-વે પ્રોજેક્ટ અંતર્ગત આવતા ઈ-મેમોથી લોકો પરેશાન!
• આઈ-વે પ્રોજેક્ટને લઇને VTV NEWSએ કર્યું રિયાલિટી ચેક
• સાંગણવા ચોકમાં વન-વેનું માત્ર એક જ બોર્ડ ખૂણામાં છે જેના કારણે લોકોને મેમો આવે છે

VTV Newsના રિયાલિટી ચેકમાં જોવા મળ્યું કે, આઇ-વે પ્રોજેક્ટના પ્રચારના અભાવે લોકોને મેમો આવવાનું દેખાઈ રહ્યું છે. રાજકોટના ઢેબર રોડ, ધર્મેન્દ્ર રોડ અને દસ્તુર રોડ પર સૌથી વધુ ઈ-મેમો આવ્યો છે. ઉપરાંત સાંગણવા ચોકમાં વન-વેનું માત્ર એક જ બોર્ડ મારેલું છે. આ બોર્ડ પણ ખુણામાં મારેલું. જેના કારણે લોકોને મેમો આવે છે. ઉલ્લેખનીય છે કે, રાજકોટમાં 70 કરોડના ખર્ચે આઈ-વે પ્રોજેક્ટ તૈયાર કરવામાં આવ્યો હતો. જેમાં અત્યાર સુધી 180 કરોડની દંડ ફટકારી દેવામાં આવ્યો છે.

રાજકોટમાં ઈ-મેમો મામલે આજે લોક અદાલતમાં 15 હજાર કેસ મૂકવામાં આવ્યા

અત્રે જણાવી દઇએ કે, રાજકોટમાં ઈ-મેમો મામલે આજે લોક અદાલતમાં 15 હજાર કેસ મૂકવામાં આવ્યા હતા. જો કે ઇ મેમો ભરવા માટે માત્ર 200 લોકો જ હાજર રહ્યા હતા. જેને કારણે લોક અદાલતમાં ડિસ્ટ્રીક્ટ જ્જ યુ. ટી. દેસાઈએ ટકોર કરી હતી કે, જે વાહન ચાલકોને ઈ-મેમો માટે નોટિસ આપવામાં આવી છે. સાથે જેના ચલણ 6 મહિના સુધીના છે તેના દંડ વસૂલવામાં આવશે. જે વાહન ચાલકો દંડ ભરી દેશે તેના કેસનો નિકાલ કરવામાં આવશે.

વાહન ચાલકને લાગે કે ખોટો મેમો આપવામાં આવ્યો છે, તો તે કોર્ટમાં લડત કરી શકે છે

અન્યથા ખોટા મેમો આપવામાં આવ્યા હોય તેવા વાહન ચાલકોએ પોલીસ સમક્ષ પોતાની અરજી કરવાની રહેશે. વાહન ચાલકો પોલીસ સામે કાનૂની લડત પણ આપી શકે છે. વાહન ચાલકને લાગે કે ખોટો મેમો આપવામાં આવ્યો છે, તો તે કોર્ટમાં લડત કરી શકે છે. ઉલ્લેખનીય છે કે, ગઈકાલે ભાજપના ધારાસભ્ય ગોવિંદ પટેલે ઈ-મેમોને લઇ રાજ્ય ગૃહમંત્રીને રજૂઆત કરી હતી, બીજી તરફ ટ્રાફિક પોલીસ ACPએ દંડ વસૂલવા માટે અડગ વલણ રાખ્યું હતું.

રાજકોટમાં ઈ-મેમો ભરવાને લઈને લોકોમાં રોષ: ગોવિંદ પટેલ

ઉલ્લેખનીય છે કે, રાજકોટમાં કુલ વાહનો કરતાં બમણાથી વધુ ઈ-મેમોના કેસ સામે આવ્યા છે. જેને લઇને ધારાસભ્ય ગોવિંદ પટેલે ગૃહમંત્રીને ઈ-મેમો બંધ કરવા રજૂઆત કરી હતી. ગોવિંદ પટેલે પોતાની રજૂઆતમાં જણાવ્યું હતું કે, 'રાજકોટમાં ઈ-મેમો ભરવાને લઈને લોકોમાં રોષ જોવા મળી રહ્યો છે. રાજકોટમાં 5 વર્ષમાં રૂપિયા 180 કરોડનો દંડ ફટકારવામાં આવ્યો છે. જેથી લોકો પીસાઈ રહ્યાં છે.' વધુમાં તેમણે રજૂઆત કરી હતી કે, 'રાજકોટમાં અત્યાર સુધી 24.30 લાખ નાગરિકોને ઈ-મેમો ફટકારવામાં આવ્યો છે. જેમાંથી 75 ટકા વાહન ચાલકોએ 150 કરોડ રૂપિયાનો દંડ ભરવાનો બાકી છે.' આ મામલે ટ્રાફિક પોલીસને ACPએ નિવેદન આપ્યું હતું કે, 'રાજકોટમાં 147 કરોડ રૂપિયાના 23 લાખ ઈ-મેમો પેન્ડિંગ છે. છેલ્લા 6 મહિનામાં 1.25 લાખ જેટલા ઈ-મેમો ઈશ્યુ થયા છે. જેમાંથી 63 હજાર કેસ લોક અદાલતમાં રજૂ કરવામાં આવશે. જો છેલ્લા 6 મહિનાના મેમો નહીં ભરાય તો કોર્ટમાં NC કેસ દાખલ થશે. વધુમાં તેમણે કહ્યું કે, 6 મહિના પહેલાના મેમો નહીં વસૂલવાનો હાઇકોર્ટનો કોઈ જ હુકમ નથી. આમ છતાં પોલીસ 6 મહિના પહેલાના ઈ-મેમો વસૂલતી નથી.'