ગાંધીનગર / મહામારીમાં કર્યુ કૌભાંડ, VTVએ ખોલી પોલ : DyCM એક્શનમાં, અગ્રસચિવને આપી આ સૂચના

• બનાસકાંઠા જિલ્લા આરોગ્ય તંત્ર દ્વારા માસ્ક કૌભાંડનો મામલો
• ઘટના અંગેના તથ્યો ચકાસવા DyCMએ આપી સૂચના
• ઘટના અંગે આરોગ્ય અગ્ર સચિવ સાથે વાતચીત કરી

માસ્ક-બેનર ખરીદીમાં કૌભાંડ આચર્યું હોવાના થયા છે આક્ષેપ

બનાસકાંઠા જિલ્લા આરોગ્ય તંત્ર દ્વારા મહામારીમાં પણ કૌભાંડના અહેવાલ સામે આવ્યા છે. મહામારીમાં જ્યાં સામાન્ય જનતા મોતને ભેટી રહી હતી ત્યાં સરકારી બાબુઓ તો આ આફતને અવસરમાં બદલીને મલાઈ ખાવામાં મસ્ત હોવાનું સામે આવ્યું છે. નોંધનીય છે કે જનતામાં જાગૃતિ ફેલાવવા માટેના જે બેનર હોય તેમાં કૌભાંડ થયા હોવાનો આક્ષેપ છે. 

VTVના અહેવાલના આધારે DyCMએ મંગાવી માહિતી

VTV ન્યૂઝ દ્વારા આરોગ્ય વિભાગના આ કૌભાંડના પર્દાફાશની અસર જોવા મળી છે. VTVના અહેવાલના આધારે DyCMએ ઘટના અંગે આરોગ્ય અગ્ર સચિવ સાથે વાતચીત કરી છે અને ઘટના અંગેના તથ્યો ચકાસવા DyCMએ સૂચના આપી છે. 

કોરોનાની જાગૃતિ માટેના બેનરોમાં આચરાયું કૌભાંડ

ગુજરાતમાં કોરોના કાળમાં પણ કૌભાંડીઓ સક્રિય હોવાનું સામે આવ્યું છે. કોરોના મહામારી જેવી આફતને ભ્રષ્ટાચાર માટે અવસર બનાવી દેવામાં આવી હોય તેવી ઘટના સામે આવી છે. કૌભાંડીઑએ હવે કોરોના વાયરસની જાગૃતિ માટેના બેનરમાં પણ મલાઈ ખાવાનો રસ્તો શોધી કાઢ્યો છે. 

એક જ કલાકમાં રૂ.48 લાખના 139 બેનરોની થઈ ઓનલાઈન ખરીદી

બનાસકાંઠા જિલ્લામાં કોરોના વાયરસની જાગૃતિ માટેના બેનરો ખરીદવામાં કૌભાંડ આચરવામાં આવ્યું છે. તમામ તાલુકાના IT પાસવર્ડ પરફેસ કોર્પોરેશન કંપનનીને બારોબાર આપી દેવામાં આવ્યા અને રૂ.10 હજારની કિમતના બેનરો રૂ.35 હજારમાં ખરીદાયા. એક જ કલાકમાં રૂ.48 લાખના 139 બેનરોની થઈ ઓનલાઈન ખરીદી કરી લેવામાં આવી હતી. 

હેલ્થ અગ્ર સચિવને ફરિયાદ

આ કૌભાંડ અંગે હેલ્થ અગ્ર સચિવને ફરિયાદ કરાઇ હોવાનું સામે આવ્યું છે અને આરોગ્ય વિભાગે તપાસના આદેશ કરતા ઘણા અધિકારીઓમાં ફફડાટ જોવા મળી રહ્યો છે. 

અધિકારીઓમાં ફફડાટ

નોંધનીય છે કે કૌભાંડ સમયે બનાસકાંઠા જિલ્લા આરોગ્ય અધિકારી તરીકે મનીષ ફેન્સી ફરજ બજાવતા હતા. મનીષ ફેન્સી હાલ વડોદરા તાલીમ નિયામક તરીકે ફરજ બજાવે છે. આ કૌભાંડમાં અધિકારીઓની સંડોવણી અંગે તપાસ ચાલી રહી છે ત્યારે કૌભાંડને લઈને અનેક તર્ક વિતર્ક સામે આવી રહ્યા છે. 

સળગતા સવાલ

• કોરોના કાળમાં કૌભાંડીઓ સક્રિય તો તંત્ર કેમ નિષ્ક્રિય ?
• કોરોનામાં પ્રજા ત્રાહિમામ ને અધિકારીઓ કૌભાંડમાં મદમસ્ત ?
• કેવી રીતે તમામ IT પાસવર્ડ કોઈ ખાનગી કંપનીને મળ્યા ?
• કોને આપ્યા પરફેસ કોર્પોરેશન કંપનીને બારોબાર પાસવર્ડ ?
• કોની સત્તાથી અપાયા ખાનગી કંપનીને પાસવર્ડ ?
• શું આવી રીતે કોઈ પાસવર્ડ આપી શકાય ખાનગી કંપનીને ?
• શું રાજ્ય કે સરકારના હિત કરતા વધારે છે ખાનગી કંપનીનું હિત ?
• કયો અધિકારી છે આ કાવતરા પાછળ ?
• કોના પીઠબળથી અધિકારીઓ સત્તામાં મદમસ્ત ?
• શા માટે કોઈ અધિકારી ગભરાતા નથી કૌભાંડ કરવાથી ?