કોરોના મહામારીની વૈશ્વિક રાજકારણ પર પણ ઘણી અસર થઈ છે. અમેરિકામાં ડોનાલ્ડ ટ્રમ્પના હાથમાંથી સત્તા સરકી જવાનું એક મોટું કારણ કોરોના મહામારી સામે લડવામાં તેમની નિષ્ફળતા જ હતી. હવે યુરોપમાં પણ એક જ પખવાડિયામાં ત્રણ-ત્રણ સરકારે સત્તા છોડવી પડી છે.
કોરોના મહામારીની વૈશ્વિક રાજકારણ પર અસર
ઇટાલીમાં સૌથી લાંબું લોકડાઉન જોવા મળ્યું
અનેક રાષ્ટ્રોના વડાએ આપ્યા રાજીનામા
કોરોનાથી ભયાનક રીતે અસરગ્રસ્ત ઈટાલીમાં કથળેલી સ્થિતિ સંભાળી ન શકવાના કારણે આકરી ટીકાઓનો ભોગ બનેલા વડા પ્રધાન ગિઉસેપ કોન્ટેએ રાજીનામું આપી દીધું છે. તેઓ હવે કાર્યવાહક વડા પ્રધાન તરીકે આગામી વ્યવસ્થા ન થાય ત્યાં સુધી કાર્યરત રહેશે. કોન્ટે વર્ષ ૨૦૧૮થી બે ગઠબંધન સરકારોનું નેતૃત્ત્વ કરી ચૂક્યા છે. ઈટાલીમાં અત્યાર સુધીમાં કોરોનાના ૨૫ લાખથી વધુ કેસ નોંધાઈ ચૂક્યા છે, જેમાંથી ૮૭ હજારથી વધુ લોકોએ પોતાનો જીવ ગુમાવ્યો છે.
ઇટાલીમાં સૌથી લાંબું લોકડાઉન
ઈટાલી પહેલો પશ્ચિમી દેશ હતો, જેણે ગયા વર્ષે માર્ચ મહિનામાં સૌથી લાંબું લોકડાઉન લગાવ્યું હતું. ગયા અઠવાડિયે જ પૂર્વ વડા પ્રધાન મેતિયો રેજીની ઈટાલિયા વિવા પાર્ટીએ સરકારની અર્થવ્યવસ્થા સુધારવા માટેની નીતિગત યોજના પર સહમતિ ન સધાયા બાદ ગઠબંધન સરકારથી અલગ થવાનો આકરો નિર્ણય લીધો હતો.
નેધરલેન્ડના વડા પ્રધાન માર્ક રુટે અને તેમની આખી કેબિનેટે સામૂહિક રાજીનામાં આપ્યા
આ અગાઉ નેધરલેન્ડના વડા પ્રધાન માર્ક રુટે અને તેમની આખી કેબિનેટે સામૂહિક રાજીનામાં આપી દીધાં હતાં. ડચ કેબિનેટે બાલ કલ્યાણ યોજના અંતર્ગત કરવામાં આવેલી ચૂકવણીઓની તપાસ સાથે જોડાયેલા એક કૌભાંડની રાજનૈતિક જવાબદારી લઈને રાજીનામું આપવાની ફરજ પડી હતી. આ કૌભાંડમાં હજારો વાલીઓને છેતરપિંડી આચરનારના રૂપમાં ખોટી રીતે સંડોવી દેવામાં આવ્યા હતા. વડા પ્રધાન માર્ક રૂટેએ રાજીનામું આપતી વખતે વાયદો કર્યો હતો કે, તેમની સરકાર પ્રભાવિત વાલીઓને જલદીથી વળતર અપાવવાનું અને કોરોના મહામારી વિરુદ્ધ લડવાનું કામ જારી જ રાખશે. નેધરલેન્ડમાં સ્થિતિ બહુ ખરાબ છે. લગભગ દસ શહેરોમાં રમખાણો ફાટી નીકળ્યાં છે. લોકો રસ્તા પર ઊતરીને પોલીસ પર બેફામ પથ્થર વરસાવી રહ્યા છે. નેધરલેન્ડમાં આગામી ૧૭ માર્ચના રોજ ચૂંટણીઓ યોજાવાની છે.
એસ્ટોનિયામાં પણ જૂરી રટાસને PM પદેથી આપ્યું રાજીનામું
કોરોનાની આકરી મારનો સામનો કરી રહેલા એસ્ટોનિયામાં પણ જૂરી રટાસને વડા પ્રધાનપદ પરથી રાજીનામું આપવું પડ્યું છે. હકીકતમાં તેમના પક્ષ સેન્ટર પાર્ટીના વરિષ્ઠ અધિકારીઓએ કૌભાંડના કારણે રાજીનામું આપવું પડ્યું હતું અને તેના પગલે હવે આખરે વડા પ્રધાને પણ પોતાનું પદ છોડવાની સત્તાવાર જાહેરાત કરવી પડી છે. દક્ષિણ અમેરિકી દેશ કોલમ્બિયાના સંરક્ષણ પ્રધાન કાર્લોસ હોમ્સનું કોરોના સંક્રમણના કારણે મોત થયું. દુનિયાના સૌથી શક્તિશાળી દેશ ગણાતા અમેરિકામાં અંદાજે સવા ચાર લાખ લોકોનાં મોત થઈ ચૂક્યા છે અને સંક્રમિત દર્દીઓની સંખ્યા તો ૨.૫૪ કરોડથી પણ વધી ગઈ છે.
બ્રિટનમાં પણ હાલત કંઈક આવી જ છે. ત્યાં પણ ૧૭ જુલાઈ સુધી કડક લોકડાઉન લાદી દેવામાં આવ્યું છે. અમેરિકા, બ્રિટન, ફ્રાન્સ અને ઈટાલી જેવા દેશોમાં મેડિકલ સુવિધાઓ ઘણી વધારે અને ગુણવત્તાવાળી છે. ભારતની વિશાળ વસ્તીની સરખામણીએ આ દેશોની વસ્તી પણ ઘણી ઓછી છે. આ તમામ દેશોમાં કોરોના વેક્સિનેશનનું કામ પુરજોશમાં ચાલી રહ્યું છે.
ઘાતક કોરોના વાઈરસથી સમગ્ર દુનિયા ત્રસ્ત
અમેરિકાના નવા રાષ્ટ્રપ્રમુખ જો બિડેને આ વર્ષે ગરમીની સિઝન સુધીમાં ૩૦ કરોડ લોકોને કોરોનાની વેક્સિન લગાવવાનો લક્ષ્યાંક રાખ્યો છે, જેના માટે ૬૦ કરોડ ડોઝની જરૂર પડશે. આમ તો ઘાતક કોરોના વાઈરસથી સમગ્ર દુનિયા ત્રસ્ત છે, પરંતુ યુરોપના અમીર અને સંપન્ન દેશો પર આ મહામારીનો કહેર વધુ વરસ્યો છે. પશ્ચિમી યુરોપની સરખામણીએ યુરોપિયન યુનિયનના પૂર્વી હિસ્સા ઓછા પ્રભાવિત થયા છે. સેન્ટ્રલ અને ઈસ્ટર્ન યુરોપ કરતા વેસ્ટર્ન યુરોપ કોરોનાની વધુ ભયાનક અસરમાં સપડાયું છે.
વધુ પ્રમાણમાં વૃદ્ધો હોવાથી, ચીનથી આવનારી ફ્લાઈટની મોટી સંખ્યાના કારણે, ટેસ્ટિંગ રેટ ઓછો હોવાના કારણે યુરોપમાં કોરોનાએ વિકરાળ સ્વરૂપ ધારણ કર્યું છે. શરૂઆતમાં ત્યાંની સરકારોએ કોરોના સંક્રમણને ગંભીરતાથી લઈને તેના પર ધ્યાન ન આપ્યું અને હવે તેઓ સફાળા જાગ્યા છે. યુરોપના ઘણા દેશોમાં રાજનૈતિક ઊથલપાથલની આશંકાઓ સેવાઈ રહી છે. આવનારા દિવસોમાં હજુ અનેક બીજી સરકાર સત્તા ગુમાવી શકે છે. મહામારીની ફક્ત આર્થિક અસરો જ નથી હોતી, પણ રાજનૈતિક અસર પણ હોય છે, જે હવે ધીમે ધીમે સામે આવી રહી છે.•