રાઈડ અકસ્માત / EXCLUSIVE: કાંકરિયા રાઇડ દુર્ઘટનાને લઇ કોર્પોરેશનની ખુલી પોલ

અમદાવાદના કાંકરિયા રાઈડ (kankariya Ride accident) તૂટવા મામલે વીટીવીએ મોટો ખુલાસો કર્યો છે. ખુલાસામાં રાઈડ ઓપરેટરને એન્જિનિયર બનાવી દેવાયો હોવાનું સામે આવ્યું છે. ઓપરેટર યશ પટેલને એન્જિનિયર બનાવાયો હતો. રાઈડ ચેકિંગમાં એન્જિનિયર તરીકે યશ પટેલની સહી જોવા મળી રહી છે. યશ પટેલ (yash patel) પોતે પૂર્વ કાઉન્સિલર મહેન્દ્ર પટેલનો પુત્ર છે. કાંકરિયામાં મહેન્દ્ર પટેલ અને ઘનશ્યામ પટેલનો કોન્ટ્રાક્ટ છે.

કાંકરિયા કેસમાં યશ પટેલ હાલ પોલીસ કસ્ટડીમાં જ છે. યશની એન્જિનિયર તરીકેની સહી પછી પણ કોર્પોરેશનનું મૌન છે. યશની સહીથી મ્યુનિસિપલ કોર્પોરેશનની પોલ પણ ખુલી ગઇ છે. મ્યુ. કોર્પોરેશન પાસે રાઇડ તપાસવાનો કોઇ વિભાગ ન હોવાનું પણ સામે આવ્યું છે. ઉપરાંત વધુમાં તમને જણાવી દઇએ કે અમદાવાદના કાંકરિયાની રાઈડ દુર્ઘટનામાં 2 લોકોના મોત થયા છે અને કેટલાંક લોકો ઇજાગ્રસ્ત પણ થયા છે. ત્યારે આ મામલે પોલીસ પણ હાલમાં તપાસ કરી રહી છે.

હવે આ તપાસમાં ધાતુશાસ્ત્રીની પણ મદદ લેવાશે. આ ઘટનામાં FSL રિપોર્ટમાં રાઈડની નબળી ગુણવત્તા સામે આવી હતી. રાઈડનું લોખંડ પહેલાથી જ નબળું હોવાનો રિપોર્ટમાં ખુલાસો થયો હતો. ત્યારે હવે ધાતુશાસ્ત્રી રાઈડના લોખંડના નમુના લઈને તપાસ કરશે. ધાતુશાસ્ત્રી લોખંડની નીચી ગુણવત્તા મામલે તપાસ કરશે. જો કે હજી સુધી આ મામલે તંત્રએ ઘટનાની જવાબદારી સ્વીકારી નથી. AMC અને R&Bનાં અધિકારીઓએ એકબીજા પર દોષનો ટોપલો ઢોળી રહ્યાં છે.

ઉપરાંત તમને વધુમાં જણાવી દઇએ કે કાંકરિયામાં રાઇડ તૂટવાની દુર્ઘટના બાદ તેમાં 6 આરોપીઓની ધરપકડ કરવામાં આવી છે. જેમાં સંચાલક ઘનશ્યામ પટેલની પણ ધરપકડ કરવામાં આવી છે. ત્યારે આ ઘટનામાં મોડે-મોડે તંત્રની આંખ પણ ઉઘડી છે અને તંત્ર વધુ સતર્ક બન્યું છે. આ ઘટનાને લઇે હાલમાં અટલ એક્સપ્રેસને પણ બંધ કરી દેવાઇ છે. અટલ એક્સપ્રેસનાં પાટા પણ તૂટેલી હાલતમાં છે અને કાટ ખવાઇ ગયા છે. જેથી હાલ પૂરતી અટલ ટ્રેનને પણ બંધ કરી દેવાઇ છે. હવે જ્યારે અટલ એક્સપ્રેસનાં પાટાનું સમારકામ થશે ત્યાર બાદ જ આ ટ્રેન શરૂ થશે. કોઇ દુર્ઘટના સર્જાય તે પહેલા જ તંત્રએ અટલ એક્સપ્રેસને પણ બંધ કરી દીધી છે.