ગુજરાત વિધાનસભાની ચૂંટણીઓ નજીક આવી રહી છે ત્યારે ગામ-કસબાની સ્થિતિનો તાગ મેળવવા VTVની ઈલેક્શન યાત્રાની ટીમ રાજ્યના ખૂણે-ખૂણાનાં હાલ જણાવી રહી છે.
VTVની ઈલેક્શન યાત્રાની ટીમ પહોંચી સાણંદમાં
જુઓ શું છે સાણંદની જનતાનો મુડ?
જુઓ કેવી છે મતવિસ્તારમાં MLAની કામગીરી?
ગુજરાત વિધાનસભાની ચૂંટણીઓ નજીક આવી રહી છે ત્યારે મતદાતાઓનો મિજાજ જાણવા VTV 'ઈલેક્શન યાત્રા' તમામ વિધાનસભા વિસ્તારોમાં પહોંચી રહી છે. જેની શરૂઆત અમદાવાદથી નજીક આવેલ 'સાણંદ વિધાનસભા બેઠક'થી કરવામાં આવી. અમદાવાદથી કચ્છ અને સૌરાષ્ટ્રને જોડતા અલગ-અલગ બે હાઇવે વચ્ચે આ વિધાનસભા બેઠક આવેલી છે. નેશનલ હાઇવે સાથે જોડાયેલ મુખ્ય મથક સાણંદ પહોંચતા જ જેવી VTVની ટીમ મુખ્ય બજારમાં પહોંચી કે તુરંત ખોદાયેલા રસ્તાઓ અને લોકોનો મિજાજ બંને જોવા મળી ગયા.
તમને જણાવી દઇએ કે, 2012થી અસ્તિત્વમાં આવેલ આ બેઠક પર એકવાર ભારતીય જનતા પાર્ટી અને એકવાર કોંગ્રેસનો વિજય થયો છે. પરંતુ બંને વાર એક જ પરિવાર સત્તા પર હાવી જોવા મળ્યો છે. જ્યારે આ વખતે સત્તાના સમીકરણો શું છે અને મતદાતાઓ શું કહી રહ્યાં છે તેમજ ધારાસભ્યોએ આ વિસ્તારની અંદર કેવા અને કયા કામ કર્યા છે તે જોઇશું.
ચૂંટણી આવે ત્યારે વિકાસ થાય: નાગરિક
તમને જણાવી દઇએ કે, VTVની ટીમ જેવી સાણંદની અંદર પહોંચી કે તુરંત સાણંદની અંદર એક તરફનો રોડ બ્લોક જોવા મળ્યો. એ દરમ્યાન જ્યારે સાણંદની જનતાનો મિજાજ જાણવામાં આવ્યો ત્યારે જનતાએ જણાવ્યું કે, 'સાણંદ બદલાયું તો ઘણું છે અને વિકાસ પણ પૂરેપૂરો થયો છે. પરંતુ ટ્રાફિકની સમસ્યા વધારે માત્રામાં જોવા મળે છે. હેરાનગતિ વધારે થઇ ગઇ છે.' જનતામાંથી એક નાગરિકે એક તરફનો જે રોડ બ્લોક હતો તેને લઇને કટાક્ષ કરતા કહ્યું કે, 'ચૂંટણી આવે ત્યારે વિકાસ થાય. લાઇટના થાંભલા નવા નાખે છે પણ જૂના જે બંધ થઇ ગયા છે તે તો ચાલુ પણ કરતા નથી.'
નેનો પ્રોજેક્ટ આવ્યા બાદ સાણંદનો વિકાસ ઘણો થયો છે: મહિલા નાગરિક
સાણંદના તૂટેલા-ખોદેલા રસ્તાઓ, ટ્રાફિક જામ અને રખડતા ઢોરની ભરમાર વાળા રસ્તાઓ બાદ જ્યારે નવા વિકસિત સાણંદ તરફ VTVની ટીમ વળી ત્યારે ત્યાં ઉભી રહેલી મહિલાઓને વિકાસ અંગે પૂછતા જણાવ્યું કે, 'સાણંદનો અત્યારે ખૂબ જ વિકાસ થયો છે. નેનો પ્રોજેક્ટ આવ્યા બાદ સાણંદનો વિકાસ ઘણો થયો છે. પહેલાં જે કોઇ પણ કામકાજ માટે અમદાવાદ જવું પડતુ હતું તે હવે નથી જવુ પડતું. ખરેખર સાણંદનો વિકાસ થઇ ચૂક્યો છે.'
પાણીના નિકાલમાં કૌભાંડો કરવામાં આવે છે
મહિલાઓનો મત જાણ્યા બાદ સાણંદથી જ્યારે VTVની ટીમ ખોડિયારનગર વિસ્તારમાં પહોંચી ત્યારે શહેરના પ્રબુધ નાગરિકો અને સામાજિક રીતે સક્રિય લોકો કે જેમાં રાજકીય કાર્યકરોવાળું એક જૂથ મળી ગયું. ત્યારે સાણંદની સમસ્યાઓથી વધારે કંટાળેલા અને આંકડાકીય બાબતોની જાણકારી રાખનાર લોકોએ સાણંદના વિકાસ અંગે જણાવ્યું કે, 'છેલ્લા 27 વર્ષમાં ભાજપનું શાસન છે, પણ આ ભાજપમાં શાસનમાં ખાલી વાયદાઓ જ કરવામાં આવે છે. સાણંદનું ગઢિયા તળાવ કે જે સાણંદના હાર્દ સમાન છે તેના દર વખતે દર ચૂંટણી સમયે મતદાતાઓ મત મેળવવા માટે વિકાસના નામે મત લઇ જાય છે. હાલની પરિસ્થિતિમાં ત્યાં એટલી બધી ગંદકી જોવા મળે છે. તેમજ તેના પાણીના નિકાલમાં કૌભાંડો કરવામાં આવે છે. દર વર્ષે કેનાલ સાફ કરવામાં આવશે. સામાન્ય લોકોનું જીવનધોરણ એટલું કઠીન બની ગયું છે કે લોકોને મજબૂરીથી સામાન્ય મજૂરીનું કામ કરવાની ફરજ પડે છે.'
બાદમાં જ્યારે એક નાગરિકને નેનો પ્રોજેક્ટ અને GIDC અંગે પૂછ્યું ત્યારે જણાવ્યું કે, 'સાણંદના યુવાનો શિક્ષિત છે પરંતુ આજ દિન સુધી લોકલ છે તેમ સમજીને નોકરીઓ આપવામાં નથી આવતી. કોન્ટ્રાક્ટ સિસ્ટમ ચાલે છે કે જે કોન્ટ્રાક્ટ સિસ્ટમ એવી હોય છે કે જો તે આગળ ચાલે તો તે કાયમી થઇ જાય છે પરંતુ 12 મહિનામાં કોઇ પણ કારણોસર તેઓને સસ્પેન્ડ કરી દેવામાં આવે છે.'
મહત્વનું છે કે, શહેરી વિસ્તાર બાદ VTV ઈલેક્શન યાત્રાની ટીમ જ્યારે ગ્રામ્ય વિસ્તાર અને GIDC વિસ્તારમાં પહોંચી. તમને જણાવી દઇએ કે, સાણંદને સૌથી મોટું નામ અપાવવામાં જો કોઇનો ફાળો હોય તો તે GIDCનો છે. કારણ કે નેનો હોય કે અન્ય કેટલીક કંપનીઓ સાણંદમાં આવ્યા બાદ સાણંદની એક આગવી ઓળખ ઉભી થઇ છે.
GIDC વિસ્તારની આજુબાજુના 30 ગામડાઓ એકબીજાસાથે સંકળાયેલ છે. આ સિવાય 7 ગામડાઓ તો GIDCમાં જ આવે છે. એ પૈકી બોળ ગામના સરપંચ અને સ્થાનિકો સાથે જ્યારે વાતચીત કરવામાં આવી ત્યારે સરપંચ અને ગામના અન્ય સભ્યોએ જણાવ્યું કે, 'GIDC આવ્યા પછી ખરેખર આ વિસ્તારની કાયાપલટ થઇ ગઇ છે. પહેલાં અહીં ખેતમજૂરી અને ખેતી જ ચાલતી પણ GIDC આવ્યા પછી લોકોને ધંધા-રોજગાર પણ મળ્યા છે. તેમજ બહારથી મજૂરી માટે આવતા લોકોના કારણે અહીં રોજગારી-આવક પણ વધી ગઇ છે.' જ્યારે અન્ય એક સભ્યએ જણાવ્યું કે, 'સ્થાનિકોને રોજગારી મળી રહે તે માટે સરકારના પ્રયત્નો ખૂબ ચાલુ છે તેમજ સરપંચ તરફથી પણ લોકોને રોજગારી મળી રહે તે માટેના પ્રયાસો ચાલુ છે. તેમજ અન્ય એક નાગરિકે જણાવ્યું કે, 'ધારાસભ્ય આવતા રહે છે, હમણાં 10 દિવસ પહેલાં જ અહીં ધારાસભ્ય આવ્યા હતાં. બદલાવ પણ 100એ 100 ટકા આવ્યો છે.' સાણંદની જો વિશેષ વાત કરીએ તો વાતચીત અને દાવાઓમાં પણ કહેવામાં આવી રહ્યું છે કે GIDC આવ્યા બાદ કેવી રીતે સાણંદની કાયાપલટ થઇ છે.
સરકારે જે રીતે વિકાસની પાછળ બજેટ ફાળવ્યા છે પ્રમાણેનો ખર્ચ બાવળામાં જોવા મળતો નથી: નાગરિક
બાદમાં સાણંદ તાલુકા વિસ્તારથી આગળ નીકળીને VTV ઈલેક્શન યાત્રા વિધાનસભા બેઠકમાં આવતા અન્ય શહેર બાવળા પહોંચી. ત્યારે બપોરનો સમય હોવાથી શહેરીજનો ઓછા દેખાઈ રહ્યાં હોવાથી જ્યારે VTVની ટીમ સરકારી કચેરીઓમાં પહોંચી તો ત્યાં લોકોનો આક્રોશ જોવા મળ્યો હતો. સરકારી કચેરીઓમાં લોકો કામ લઈને પહોંચતા હોય છે ત્યારે વહીવટી સુદ્રઢતાના ગુણગાન ગાતિ સરકારમાં ખરેખરની વાસ્તવિક સ્થિતિ શું છે તે જોતા નાગરિક તરફથી જાણવા મળ્યું કે, 'સરકારે જે રીતે વિકાસની પાછળ બજેટ ફાળવ્યા છે પ્રમાણેનો ખર્ચ બાવળા શહેરમાં વિકાસ માટે જોવા મળતો નથી. પ્રાથમિક સુવિધા પણ નથી તેમજ રોડ-રસ્તા પણ તકલાદી અને હલકી કક્ષાના જોવા મળ્યા છે.'
વહીવટી નિર્ણયો જેમના દ્વારા લેવામાં આવતા હોય એવાં મુખ્ય વ્યક્તિ માત્ર 2 દિવસ જ હાજર રહે તો શું સ્થિતિ નિર્માણ થાય અને લોકો કેવા પરેશાન થાય એનો દાખલો પણ અહીં જોવા મળ્યો હતો. કારણ કે અહીંયા 15 દિવસથી દાખલા માટે ધક્કા ખાતો એક વિદ્યાર્થી જોવા મળ્યો હતો. એ સિવાય જ્યારે VTV ઈલેક્શન યાત્રાની ટીમ ખેતી થકી રોજગારી મેળવતા ગ્રામ્ય વિસ્તારમાં પહોંચી ત્યાં નહેરો અને સિંચાઈના પાણીની વ્યવસ્થાને લઈને ખેડૂતો પણ નારાજ જોવા મળ્યા હતાં.
15 દિવસથી દાખલા માટે ધક્કા ખાતો એક વિદ્યાર્થી
ખેતીમાં પાણીની યોગ્ય વ્યવસ્થા ના હોવાથી સરકાર અને ધારાસભ્ય પ્રત્યે લોકોએ નારાજગી વ્યક્ત કરી હતી. આ સાથે જ્યારે VTVની ટીમ 'ડરન' ગામ પહોંચી હતી કે જે હાઇવેથી નજીક આવ્યું છે તેમ છતાં અહીંના સ્થાનિકો અનેક પ્રકારની સમસ્યાઓ અનુભવી રહ્યાં હતા. એમાંય સ્થાનિકોને રોજગારીનો પ્રશ્ન અહીંયાં મુખ્ય હતો.
જો કોઇ કંપની સ્થાનિક લોકોને નહીં લેતી હોય તો અમે તેની વિરૂદ્ધ કાર્યવાહી કરીશું: MLA
લોકશાહી વ્યવસ્થામાં લોકોની ફરિયાદો હમેશા જીવંત જ રહે છે. ગમે એટલું કામ કરવામાં આવે લોકોની ફરિયાદોનો અંત આવતો જ નથી. સાણંદ વિધાનસભા વિસ્તારના મતદાતાઓને મળ્યા બાદ અહીંના ધારાસભ્ય કનુભાઈ પટેલને મળવાનો મોકો મળ્યો. ત્યારે તેઓ કહી રહ્યાં છે કે, 'તમામે તમામ જગ્યાએ સ્થાનિકોને રોજગારી મળી રહે તે માટેના અમે તમામ પ્રયાસો કરતા જ હોઇએ છીએ. રોજગારીને લઇને મારી જોડે હજુ સુધી કોઇ પણ પ્રકારની ફરિયાદ પણ આવી નથી. જો કોઇ કંપની સ્થાનિક લોકોને નહીં લેતી હોય તો અમે તેની વિરૂદ્ધ કાર્યવાહી કરીશું.'
તમને જણાવી દઇએ કે, સાણંદ વિધાનસભા વિસ્તારમાં આમ તો કોળી પટેલ મતદાતાઓ પ્રભુત્વમાં રહ્યાં છે. જો કે બાવળા અને સાણંદમાં ક્ષેત્રીય મતદાતાઓનો પણ પ્રભાવ રહ્યો છે. જનપ્રતિનિધિ સામે લોકોનો આક્રોશ તમામ જગ્યાઓ પર જોવા મળતો હોય છે ત્યારે અહીંના મતદાતાઓ પણ એમાંથી બાકાત નથી.