અમદાવાદમાં યોજાયેલી OPPO Media Premier League 2020માં આજે શુક્રવારે VTV ડિજિટલ ક્રિકેટ ટીમે શ્રેષ્ઠ પ્રદર્શન નોંધાવીને 16 ટીમોની ટુર્નામેન્ટની સેમીફાઇનલમાં સ્થાન સુરક્ષિત કર્યું છે. સેમીફાઇનલમાં ટીમ GTPL સામે VTV ડિજિટલની ટીમ ટકરાશે.
કેવી રહી સેમી ફાઇનલ સુધીની સફર
મંથન ભટ્ટ જેવા અનુભવી ખેલાડીની આગેવાની હેઠળની શરૂઆતની લીગ મૅચોમાં VTV ડિજિટલ ટીમે News18 લગાન ટીમ સામે 41 રનથી ભવ્ય જીત મેળવી. ત્યાર બાદ VTV ડિજિટલે TV9ને 20 રનથી પરાજિત કરીને ક્વાર્ટર ફાઈનલમાં પહોંચી હતી.
આજે રમાયેલી ક્વાર્ટર ફાઇનલમાં Agency Spartans સામે VTV ડિજિટલની ટક્કર થઇ જેમાં Agency Spartansએ 12 ઓવરમાં 10 વિકેટે 73 રન નોંધાવ્યા. 74 રનના ટાર્ગેટનો પીછો કરતી VTV ડિજિટલે 6 વિકેટના નુકશાને 11.2 ઓવરમાં આ લક્ષ્યાંક મેળવી લીધો.
VTV ડિજિટલના ઝળહળતા ખેલાડીઓ
અત્યાર સુધીના આંકડાઓ મુજબ VTV ડિજિટલના એડિટર કુણાલ પંડ્યા 4 મેચમાં 10 વિકેટ ખેરવવા અને 5ની ઈકોનોમી સાથે સૌથી સફળ બોલરની યાદીમાં પહેલા ક્રમે છે. કેપ્ટન મંથન ભટ્ટ સૌથી વધુ રન કરનાર ખેલાડીઓની યાદીમાં 5માં સ્થાને છે. VTV ડિજિટલના ખેલાડી ગુંજ ઠક્કરે 3 મેચમાં 4 વિકેટ ઝડપી છે.
હવે કયા મુકાબલા છે?
સેમીફાઇનલમાં VTV ડિજિટલ એકથી વધુ વખત મીડિયા પ્રીમિયર ક્રિકેટ લીગ ટાઇટલ જીતી ચૂકેલ GTPL સામે ટકરાશે જયારે બીજી સેમી ફાઇનલમાં News18 વોરિયર્સ અને રેડિયો મિર્ચી વચ્ચે ટક્કર થશે અને વિજેતા ટીમો ફાઇનલમાં ટકરાશે.
ઉલ્લેખનીય છે કે આ સમગ્ર મીડિયા પ્રીમિયર લીગ 2020નું આયોજન VTV Newsના શેલી ટિબક અને News18 Gujaratiના નિરવ મહેતા દ્વારા સફળતાપૂર્વક કરાયું હતું.