8 ઓગસ્ટના રોજ ગાંધીનગર ખાતે મુખ્યમંત્રી ભૂપેન્દ્ર પટેલના અધ્યક્ષસ્થાને VTV Conclave યોજાઇ હતી. જેમાં CM ભૂપેન્દ્ર પટેલ સહિત મંત્રીઓએ હાજરી આપી સરકારની કામગીરી પર ચર્ચા કરી હતી.
ગાંધીનગર CMના અધ્યક્ષસ્થાને યોજાઇ VTV Conclave
કૉન્ક્લેવમાં CM સહિતના મંત્રીઓ ઉપસ્થિત રહ્યાં
ગુજરાતનો વિકાસ જોવો હોય તો બંધ આંખે પણ દેખાય એવો: CM
VTV Conclave માં CM ભૂપેન્દ્ર પટેલે પોતાના વક્તવ્યમાં જણાવ્યું હતું કે, 'ગુજરાતે બહુઆયામી વિકાસ કર્યો છે અને તેની અનુભૂતિ દરેક નાગરિકને થઈ રહી છે. ગુજરાત વડાપ્રધાન નરેન્દ્ર મોદીના નેતૃત્વમાં બે દાયકાની વિકાસયાત્રા કરીને દેશનું મોડેલ સ્ટેટ બન્યું છે.'
મુખ્યમંત્રીએ વધુમાં ઉમેર્યું કે, 'વડાપ્રધાન નરેન્દ્ર મોદીએ વડાપ્રધાન તરીકેનો પદભાર ગ્રહણ કર્યો ત્યારે દેશના ઘણા ગામડાઓમાં વીજળી પણ ન હોતી. નાગરિકોને ગેસના બાટલા માટે પણ તકલીફ પડતી, પૂરતા શૌચાલયો પણ ન હોતા. ટૂંકમાં નાગરિકોને પૂરતા પ્રમાણમાં માળખાગત સુવિધાઓ પણ ન હોતી મળતી. આ બધી માળખાગત સુવિધાઓ વડાપ્રધાન નરેન્દ્ર મોદીએ 8 વર્ષના સુશાસન દરમિયાન નાગરિકોને પૂરી પાડી છે.'
છેવાડાના માણસનું ધ્યાન રાખી ગુજરાતે આજે સર્વાંગી વિકાસ કર્યો: CM
CMએ વધુમાં જણાવ્યું કે, 'બે દાયકા પહેલાની સરખામણીએ આજે ગુજરાતે શિક્ષણ, સ્વાસ્થ્ય અને સુરક્ષા ક્ષેત્રે વિકાસ સાધ્યો છે. ગુજરાતના દરેક ગામમાં 24 કલાક વીજળી ઉપલબ્ધ થઈ છે, ગામે ગામ પાણી પહોચ્યું છે. અત્યારે સમગ્ર દેશ આઝાદીના 75મા વર્ષની ઉજવણી કરી રહ્યો છે. નાનામાં નાના અને છેવાડાના માણસનું ધ્યાન રાખી ગુજરાતે આજે સર્વાંગી વિકાસ કર્યો છે. ગુજરાતનો વિકાસ જોવો હોય તો બંધ આંખે પણ દેખાય એવો છે.'
એ સિવાય CM ભૂપેન્દ્ર પટેલે જણાવ્યું કે, 'નાગરિકોની સુવિધાઓમાં પણ વધારો થઈ રહ્યો છે. ગુજરાત આજે વિકાસનો પર્યાય બની ગયું છે અને દેશનું ગ્રોથ એન્જીન ગણાય છે. નીતિ આયોગ દ્વારા જાહેર કરવામાં આવેલ નાણાંકીય વ્યવસ્થાપનના માપદંડોમાં ગુજરાત સમગ્ર દેશમાં પ્રથમ ક્રમાંકે આવ્યું છે. ઇઝ ઓફ ડૂઇંગ બિઝનેસમાં પણ દેશમાં ગુજરાત અગ્રેસર છે. હવે ઇઝ ઓફ લિવિંગમાં પણ ગુજરાત અગ્રીમ બનવા જઇ રહ્યું છે. ગુજરાતના વિકાસનું મૂળ વડાપ્રધાન નરેન્દ્ર મોદીએ નાખેલ સુશાસનનો મજબૂત પાયો છે. તેઓએ રાજ્યને એક પોલિસિ ડ્રીવન સ્ટેટ બનાવ્યું છે અને રાજ્યને હોલિસ્ટીક વિકાસની દિશા આપી છે.'
આવનારા સમયમાં પાંચ નવી મેડિકલ કોલેજો શરૂ થશે: CM
મુખ્યમંત્રીએ વિકાસની આંકડાકીય માહિતી આપતા કહ્યું કે, 'ગુજરાતમાં વર્ષ 2002માં ધાન્ય પાકોનું ઉત્પાદન 23.48 લાખ મેટ્રિક ટન હતું. જે વર્ષ 2022માં 83.25 લાખ મેટ્રિક ટને પહોંચ્યું છે. વર્ષ 2002માં બાગાયતી પાકોનું ઉત્પાદન 62 લાખ મેટ્રિક ટન હતું. જે વર્ષ 2022માં 250. 52 લાખ મેટ્રિક ટન થયું છે. વર્ષ 2002માં 3500 જેટલાં જ ચેકડેમો હતા, જે અત્યારે વર્ષ 2022માં 1,65,000 જેટલા થયા છે. ચેકડેમોની સંખ્યા વધવાથી પાણીના ટીપે ટીપાનો આજે સદુપયોગ થઈ રહ્યો છે. રાજ્યમાં તબીબોની માંગને પહોંચી વળવા મેડિકલ સીટોમાં પણ વધારો કરવામાં આવ્યો છે. વર્ષ 2002ના સમયમાં 1375 જેટલી મેડિકલ સીટો હતી જે અત્યારે 5700 જેટલી થઈ ગઇ છે. આવનારા સમયમાં પણ પાંચ જેટલી નવી મેડિકલ કોલેજો શરૂ થવાથી બેઠકોમાં
પણ વધારો થશે.'
તદુપરાંત MSME ઉદ્યોગોની વાત કરતા CMએ જણાવ્યું કે, 'વર્ષ 2002માં એમએસએમઇ (MSME) ઉદ્યોગોની સંખ્યા જે 2.74 લાખ હતી તે આજે વર્ષ 2022માં 8.66 લાખ થઈ ગઇ છે. સાથોસાથ ઔદ્યોગિક ઉત્પાદન પણ વધ્યું છે. આમ ગુજરાતનો સર્વાંગી વિકાસ વડાપ્રધાન નરેન્દ્ર મોદીની દ્રઢ રાજકીય ઈચ્છાશક્તિને પરિણામે જ શક્ય બન્યો છે. ગુજરાતે વડાપ્રધાન નરેન્દ્ર મોદીના દરેક આહ્વાનને સ્વીકારી કાર્યોને આગળ ધપાવ્યા છે. આત્મનિર્ભર ગુજરાતથી આત્મનિર્ભર ભારતનું સ્વપ્ન પણ સત્વરે સાકાર થશે.'
અન્ય મંત્રીઓએ પણ કરી હતી ચર્ચા
VTVના કૉન્ક્લેવમાં મુખ્યમંત્રી ઉપરાંત આરોગ્ય અને પાણી પુરવઠા મંત્રી ઋષિકેશ પટેલ, રોડ એન્ડ બિલ્ડિંગ અને ટ્રાન્સપોર્ટ મંત્રી પૂર્ણેશ મોદી, કૃષિમંત્રી રાઘવજી પટેલ અને ગ્રામીણ વિકાસ મંત્રી અર્જુનસિંહ ચૌહાણ પણ જોડાયા હતા. આ દરમ્યાન તેમણે પોતાના વિભાગની કામગીરી અને લોકોની સમસ્યાના નિવારણ મુદ્દે આંકડાકીય માહિતી પણ આપી હતી.
કાર્યક્રમમાં મહાનુભવોએ આપી હાજરી
VTV Conclaveમાં સમભાવ ગ્રુપના CMD કિરણ વડોદરિયા દ્વારા CM ભૂપેન્દ્ર પટેલનું સ્વાગત કરવામાં આવ્યું હતું. આ ઉપરાંત કાર્યક્રમમાં સમભાવ ગ્રુપના મનોજ વડોદરિયા, કાજલ વડોદરિયા, CEO નીરજ અત્રી અને VTV News ચેનલ હેડ હેમંત ગોલાણી સહિત અન્ય મહેમાનો પણ હાજર રહ્યાં હતાં. VTVના આ ખાસ કાર્યક્રમમાં ગાંધીનગરના મેયર હિતેશ મકવાણા, ભાજપ યુવા મોર્ચાના પ્રમુખ પ્રશાંક કોરાટ તેમ જ ભાજપ અગ્રણી મહેશ કસવાલાએ પણ હાજરી આપી હતી.