ચૂંટણી / ગુજરાતમાં સરેરાશ 64 ટકા મતદાન, જાણો ક્યાં સૌથી વધુ અને સૌથી ઓછું મતદાન?

ગુજરાતમાં ત્રીજા તબક્કા માટે રાજ્યની 26 લોકસભા બેઠકો અને ચાર વિધાનસભા બેઠકો પર મતદાન થયું હતું. ત્યારે આજે સવારે 7 વાગ્યાથી સાંજના 6 કલાક સુધી મતદાન થયું હતું. જેમાં રાજ્યમાં સરેરાશ 64 ટકા મતદાન નોંધાયું છે. સૌથી વધુ મતદાન વલસાડ બેઠક પર 74 ટકા થયું છે. જ્યારે સૌથી ઓછું 54 ટકા અમરેલી બેઠક પર મતદાન નોંધાયું છે.

મહત્વનું છે કે, આજે લોકસભા ચૂંટણીના ત્રીજા તબક્કાનું મતદાન હતું ત્યારે ગુજરાતમાંથી કુલ 371 ઉમેદવારો ચૂંટણીના મેદાનમાં છે. જેમાં ભાજપ અને કોંગ્રેસે તમામ 26 બેઠકો પરથી પોતાના ઉમેદવાર ઉતાર્યા છે.
 
ગુજરાતમાં મતદાન પૂર્ણ, જુઓ ક્યાં કેટલું થયું?

બેઠક    મતદાન
કચ્છ - 57.53%
બનાસકાંઠા - 64.71%
પાટણ - 61.23%
મહેસાણા - 64.91%
સાબરકાંઠા - 67.25%
ગાંધીનગર - 64.95%
અમદાવાદ પૂર્વ - 60.77%
અમદાવાદ પશ્ચિમ - 59.82%
સુરેન્દ્રનગર - 57.84%
રાજકોટ - 63.12%
પોરબંદર - 56.77%
જામનગર - 58.49%
જૂનાગઢ - 60.70%
સુરત - 63.99%
ભાવનગર - 58.41%
આણંદ - 66.03%
ખેડા - 60.32%
પંચમહાલ - 61.68%
દાહોદ - 66.05%
વડોદરા - 67.26%
છોટાઉદેપુર - 72.91%
ભરૂચ - 71.77%
બારડોલી - 72.92%
નવસારી - 66.42%
વલસાડ - 74.09%
અમરેલી - 54%
PM મોદી, શાહ, અડવાણી, જેટલીએ ગુજરાતમાં કર્યું મતદાન

લોકસભાની ચૂંટણીને લઈને ગુજરાતમાં 26 બેઠકોનું આજે મતદાન હતું. ત્યારે પ્રધાનમંત્રી નરેન્દ્ર મોદી મતદાન કરવા માટે ગુજરાતમાં આવ્યા છે. પીએમ મોદીએ અમદાવાદની રાણીપમાં આવેલી નિશાન સ્કૂલમાં મતદાન કર્યુ હતું. તેઓ મતદાન કરતા પહેલા ગાંધીનગર માતા હીરાબાના આશીર્વાદ લીધા હતા. ત્યાર બાદ તેઓ મતદાન કેન્દ્ર પર પહોંચ્યા હતા. સ્કૂલની બહાર મોટી સંખ્યામાં લોકો ઉમટ્યા હતા.

અમદાવાદના ખાનપુરની શાહપુર હિન્દી પ્રાથમિક શાળામાં લાલકૃષ્ણ અડવાણીએ મતદાન કર્યું હતું. જીતનો આશાવાદ વ્યક્ત કર્યો હતો. 

તો આ તરફ અમિત શાહે પણ પોતાના મતાધિકારનો ઉપયોગ કર્યો હતો. અમિત શાહે નારણપુરા વિસ્તારમાં આવેલી સ્કૂલમાં મતદાન કર્યુ હતુ. મળતી માહિતી મુજબ અમિત શાહ પોતાના પરિવાર સાથે મતદાન કરવા માટે પહોંચ્યા હતા. 

મહત્વનું છે કે, ભાજપના રાષ્ટ્રીય અધ્યક્ષ અમિત શાહ ગાંધીનગર બેઠક પરથી ચૂંટણી લડી રહ્યાં છે. ત્યારે વડાપ્રધાન નરેન્દ્ર મોદી, નાણામંત્રી અરૂણ જેટલી, માજી નાયબ વડાપ્રધાન લાલ કૃષ્ણ અડવાણી અને ગુજરાતના ભૂતપૂર્વ મુખ્યમંત્રી આનંદીબેન પટેલ તથા અમિત શાહ પોતે ગાંધીનગર લોકસભાની મતદાર યાદીમાં નામ ધરાવે છે.