ઝપાઝપી / મતદાન મથકમાં મોબાઇલ સાથે લઇ જવા મામલે કોન્સ્ટેબલે મતદારને ઢીબી નાંખ્યો, વીડિયો થયો વાયરલ

• વીરપુરમાં મતદારને પોલીસ કર્મીએ માર્યો માર
• મતદાતા ચૂંટણી બૂથમાં મોબાઈલ લઈ જવાની ધરાવતો હતો ઈચ્છા
• પોલીસ વડાએ તપાસના આપ્યા આદેશ

રાજકોટ જિલ્લાના વીરપુરમાં મતદાન કરવા આવેલો એક મતદાર મતદાન મથકની અંદર મોબાઇલ સાથે જવા માગતો હતો. પરંતુ ફરજ બજાવી રહેલા પોલીસે તેને મતદાન મથક બહાર જ રોક્યો હતો. બાદમાં મતદારે પોલીસ કોન્સ્ટેબલ સાથે ઝપાઝપી કરી હતી. 

મતદાતા અને પોલીસ કર્મી વચ્ચે મારામારી 

જો કે, મામલો વધુ બીચકાતા પોલીસ કર્મચારી અને મતદાતા વચ્ચે છૂટ્ટાહાથની મારામારી થઈ હતી જેમાં કોન્સ્ટેબલ પરેશ સિંધવે તદારના મોઢા પર મુક્કા માર્યા હતા. જો કે,બનાવ અંગેની જાણ થતાં જ જિલ્લા પોલીસ વડા તાત્કાલિક અસરથી ઘટના સ્થળે પહોંચ્યા હતા અને માર મારનાર કોન્સ્ટેબલને અન્ય જગ્યાએ ફરજ પર મૂક્યો હતો.

પોલીસ વડાએ આપ્યું નિવેદન 

આ અંગે રાજકોટ જિલ્લા પોલીસ વડા બલરામ મીણાએ જણાવ્યું હતું કે, વીરપુરમાં અમારા પોલીસ કોન્સ્ટેબલનો મતદાર સાથે ઘર્ષણનો બનાવ બન્યો હતો. જેમાં મતદાર ચૂંટણી બૂથની અંદર પોતાનો મોબાઇલ લઇ જવા માગતા હતા. પરંતુ શિસ્તના ભાગ રૂપે ફરજ પર હાજર પોલીસ કર્મચારીએ તેને ના પાડતા મતદારે ગેરવર્તન કર્યું હતું. આ ગેરવર્તન દરમિયાન બોલાચાલી થઇ અને બાદમાં ઘટના ઘર્ષણમાં ફેરવાઇ હતી. અમારી પાસે મતદારે ગેરવર્તન કર્યાના પુરાવા છે. બંનેએ જે રીતે કર્યુ તે અમને માન્ય નથી. આગળની તપાસ કરી રહ્યા છીએ.

રાજ્યમાં ગ્રામ પંચાયત માટે આજે મતદાન

રાજ્યમાં ગ્રામ પંચાયત માટે આજે મતદાન થઈ રહ્યું છે.રાજ્યની 8684 ગ્રામ પંચાયત માટે ચૂંટણી યોજાઇ રહી છે જેમા સરપંચ પદ માટે 27 હજાર 200 ઉમેદવારો મેદાને છે. જ્યારે 53 હજાર 507 સભ્ય પદ માટે 1 લાખ 19 હજાર 998 ઉમેદવારો મેદાને છે. 10 હજાર 897 ગ્રામ પંચાયતોની ચૂંટણી જાહેર થઇ હતી. જેમાંથી કુલ 1167 ગ્રામ પંચાયત સંપૂર્ણ બિનહરીફ થઇ છે. કુલ 1 કરોડ 82 લાખ 15 હજાર 13 મતદારો મતાધિકારનો ઉપયોગ કરશે, જેમાં 93 લાખ 69 હજાર 202 પુરુષ મતદારો મતદાન કરશે અને 88 લાખ 45 હજાર 811 મહિલા મતદારો મતદાન કરશે. કુલ 23 હજાર 907 મતદાન મથકો ઉભા કરવામાં આવશે. જેમાં 6656 મતદાન મથકો સંવેદનશીલ અને 3074 મતદાન મથકો અતિ સંવેદનશીલ જાહેર કરાયા છે. ચૂંટણીને લઇને 51 હજાર 747 પોલીસ જવાનો બંદોબસ્ત રહેશે. 2546 ચૂંટણી અધિકારી અને 2827 મદદનીશ ચૂંટણી અધિકારીઓને જવાબદારી સોંપાઇ છે.