ટેલિકોમ / વોડાફોનના ગ્રાહકો માટે રાહતના સમાચાર, આટલા કરોડની રકમ ચૂકવાઈ

• આ પહેલા ફેબ્રુઆરીમાં 3500 કરોડની ચુકવણી થઇ ગઈ છે
• ટેલિકમ્યુનિકેશન્સ વિભાગના મતે હજુ ઘણી ચુકવણી બાકી 
• 17 માર્ચે સુપ્રીમ કોર્ટમાં આગલી સુનાવણી

ખોટનો સામનો કરી રહેલી ટેલિકોમ કંપની વોડાફોન આઈડિયા એ સોમવારે બાકી એડજસ્ટેડ ગ્રોસ રેવેન્યુ (AGR)ની 3,354 કરોડ રૂપિયાની વધારાની ચુકવણી ટેલિકમ્યુનિકેશન્સ વિભાગને કરી છે. 

કંપનીએ કહ્યું છે કે તેના સ્વ-આકારણીના એટલે કે સેલ્ફ અસેસમેન્ટના આધારે, તેણે આખી પ્રિન્સિપલ એમાઉન્ટ ચૂકવી દીધી છે. આ ચુકવણી સાથે, વોડાફોન આઈડિયા એ સરકારને બાકી એજીઆર માટે કુલ 6,854 કરોડ ચૂકવ્યા છે. ટેલિકમ્યુનિકેશન્સ ડિપાર્ટમેન્ટના જણાવ્યા અનુસાર, વોડાફોન આઇડિયા ના હજુ તોતિંગ 53000 કરોડ રૂપિયા ચુકવવાના બાકી છે.

બોમ્બે સ્ટોક એક્સચેંજ (BSE)માં કંપનીએ જણાવ્યું હતું કે, કંપનીએ આજે ​​(સોમવારે) ટેલિકમ્યુનિકેશન્સ વિભાગને 3354 કરોડ રૂપિયાની બાકી ચુકવણી કરી છે, જે એજીઆર જવાબદારી હેઠળની મુખ્ય રકમનો બાકીનો ભાગ છે. આ રીતે, કંપનીએ એજીઆર 6,854 કરોડની આખી મુખ્ય રકમ ચૂકવી દીધી છે.

હજુ ઘણી ચુકવણી બાકી છે: ટેલિકમ્યુનિકેશન્સ વિભાગ

ટેલિકમ્યુનિકેશન્સ વિભાગના જણાવ્યા અનુસાર, વોડાફોન આઈડિયા લિમિટેડ પાસે ચુકવણીમાં વિલંબના પગલે ચઢેલ વ્યાજ, દંડ અને સામાન્ય વ્યાજ સહિત કુલ 53000 કરોડ રૂપિયા બાકી લેવાના નીકળે છે. તે જ સમયે, કંપનીના પોતાના અસેસમેન્ટ અનુસાર, તેના 21,533 કરોડ રૂપિયા બાકી છે.

કંપનીએ કહ્યું કે તેણે તેની એજીઆરની બાકી રકમનું સેલ્ફ અસેસમેન્ટ 6 માર્ચ 2020 ના રોજ  ટેલિકમ્યુનિકેશન્સ વિભાગને આપી દીધું હતું. આ મુજબ કંપનીએ નાણાકીય વર્ષ 2006-07થી નાણાકીય વર્ષ 2018-19 સુધી AGR જવાબદારીની મુખ્ય રકમ 6,854 કરોડ રૂપિયા ગણાવી હતી.

આ પહેલા કંપનીએ AGRની બાકી રકમ સ્વરૂપે 17 ફેબ્રુઆરી 2020ના રોજ 2500 કરોડ રૂપિયા અને 20 ફેબ્રુઆરીના રોજ 1000 કરોડ રૂપિયાની ચુકવણી કરી હતી.

17 માર્ચે સુપ્રીમ કોર્ટમાં હવે AGR મામલે સુનાવણી થશે.