નિવેદન / રશિયામાં આજે વિજય દિવસની ઉજવણી: મોસ્કોમાં ભવ્ય પરેડનું આયોજન, NATOને લઇ પુતિને કહી આ મોટી વાત

• રશિયામાં 77માં વિજય દિવસની ઉજવણી
• યુક્રેન વિરુદ્ધ કરવામાં આવેલી કાર્યવાહીને પુતિને યોગ્ય ઠેરવી
• જાણો રશિયા શા માટે ઉજવે છે વિજય દિવસ?

યુક્રેન સાથેના યુદ્ધ વચ્ચે રશિયા આજે 77મો વિજય દિવસ ઉજવી રહ્યું છે. આ વિજય પરેડમાં રાષ્ટ્રપતિ વ્લાદિમીર પુતિને યુક્રેનના પ્રદેશોના નામ લઇને પોતાના ભાષણની શરૂઆત કરી હતી. અહીં પુતિને ડોનબાસ, ખારકિવ અને મારીયુપોલનો ઉલ્લેખ કર્યો હતો. પુતિને યુક્રેન વિરુદ્ધ કરવામાં આવેલી કાર્યવાહીને પણ યોગ્ય ઠેરવી હતી.

રશિયાના વિજય દિવસના અવસર પર પુતિને NATOને પણ ઘેર્યું હતું. પુતિને કહ્યું કે, NATO તેની બોર્ડર દ્વારા રશિયા માટે ખતરો ઉભો કરવાનો પ્રયાસ કરી રહ્યું છે. તેણે વધુમાં કહ્યું કે યુક્રેનના લોકોએ પરમાણુ હથિયારોની ધમકી પણ આપી હતી.

જુઓ યુદ્ધ પર પુતિને શું કહ્યું?

વિજય દિવસના અવસર પર પુતિને કહ્યું કે, 'યુક્રેન પર કાર્યવાહી કરવાનો નિર્ણય એક સાર્વભૌમ મજબૂત અને સ્વતંત્ર દેશ દ્વારા લેવામાં આવ્યો છે.'

શા માટે રશિયા વિજય દિવસ ઉજવે છે?

રશિયાના આ વિજય દિવસને યુક્રેન યુદ્ધ સાથે કોઈ જ લેવાદેવા નથી. વાસ્તવમાં આ વિજય દિવસ બીજા વિશ્વ યુદ્ધ સાથે જોડાયેલો છે. આજે 9 મેના રોજ, 1945 ની મધ્યરાત્રિએ યુરોપ અને આફ્રિકાના ઉત્તરીય ભાગોમાં બીજું વિશ્વ યુદ્ધ સત્તાવાર રીતે સમાપ્ત થયું હતું.

1945 માં બીજા વિશ્વ યુદ્ધમાં નાજી જર્મની પર નોંધાયેલા વિજયની યાદમાં રશિયા આજે 09 મેના રોજ તેનો વાર્ષિક વિજય દિવસ એટલે કે વિજય તારીખ ઉજવી રહ્યું છે. 24 જૂન, 1945ના રોજ પ્રથમ વિજય દિવસ પરેડ યોજાઈ હતી. આ દરમિયાન, રશિયન સૈનિકોએ ન તો માત્ર મોસ્કો માટે નાઝીઓ સાથે લડ્યા હતા પરંતુ લેનિનગ્રાડ અને સ્ટાલિનગ્રાડની પણ રક્ષા કરી હતી. ત્યાર બાદ તેઓએ રેડ સ્ક્વેર પર શાનદાર વિજય દિવસની પરેડ નીકાળી હતી.

વિજય દિવસની પરેડમાં રશિયાનું શક્તિ પ્રદર્શન

આ વર્ષે પણ આ પ્રસંગે વિજય દિવસ પરેડ યોજાઈ રહી છે. જેનું આયોજન મોસ્કોના રેડ સ્ક્વેર ખાતે કરવામાં આવી રહ્યું છે. વર્ષ 2020 માં કોરોના મહામારીના કારણે વિજય દિવસ પરેડનું આયોજન 09 મેના બદલે 24 જૂને કરવામાં આવ્યું હતું.