વિવિયન રિચર્ડ્સ! દુનિયાના એક એવા બેટ્સમેન જેમની બેટિંગથી ભલભલા બોલરોના હાંજા ગગડી જતા. પોતાની સ્ટાઈલીશ બેટિંગ અને સફળ કેપ્ટનશીપ માટે જાણીતા રિચર્ડ્સે પોતાના જમાનામાં કોઈ બોલર સામે પક્ષપાત રાખ્યા વગર બધાની ધોલાઈ કરી છે. તોપના ગોળા જેવા આવતા ક્રિકેટના દડાનો સામનો કરવા એ જમાનામાં એવા કોઈ સુરક્ષાત્મક કવચ નહોતા. રિચર્ડ્સે પોતે સ્વીકાર્યું છે કે તેમને પોતાને હેલ્મેટ વિના જ બેટિંગ કરવાની મજા આવતી.
રિચર્ડ્સ હેલ્મેટ વગર બોલરોનો સામનો કરવાથી ટેવાઈ ગયા હતા
ચુઈગ ગમ ચાવી શકાય એ માટે માઉથ ગાર્ડ નહોતા પહેરતા
વેસ્ટ ઇન્ડિઝના મહાન ક્રિકેટર વિવિયન રિચર્ડ્સને દુનિયામાં એવા ખેલાડીઓની કક્ષામાં મુકાય છે જેમણે ક્રિકેટ રમતને ધડમૂળથી બદલી નાખી. વિવિયન રિચર્ડ્સ હેલ્મેટ વગર બેટિંગ કરવા માટે પણ પ્રખ્યાત છે. તેમના સમયના અનેક ઘાતક બોલરોનો સામનો કરતી વખતે પણ રિચર્ડ્સ હેલ્મેટ વગર રમ્યા. રિચર્ડ્સે ઓસ્ટ્રેલિયાના પૂર્વ ખેલાડી શેન વોટસન સાથે વાતચીત દરમિયાન જણાવ્યું હતું કે તેઓ હેલ્મેટ વગર બોલરોનો સામનો કરવાથી ટેવાઈ ગયા હતા.
રિચર્ડ્સે વોટસન સાથેના પોડકાસ્ટ દરમિયાન વાતચીતમાં જણાવ્યું હતું કે તેમને આ રમત માટે એટલું ઝનૂન હતું કે આ રમત રમતા રમતા તેઓ મરી જાય તો પણ તેમને મંજૂર હતું. રિચર્ડ્સે એમ પણ કહ્યું કે તેઓ એ ખેલાડીઓથી પ્રેરણા લેતા જેઓ પોતે પણ પોતાનો જીવ જોખમમાં મૂકીને રમત રમતા હતા.
તેમણે કહ્યું કે હું બીજી રમતોના પુરુષ અને મહિલા ખેલાડીઓને જોઉં છું. આ રમતવીરો પોતાની રમતના સન્માન માટે કોઈ પણ હદ સુધી જઈ શકે છે. મેં ફોર્મ્યુલા ૧ના રેસરને વીજળીની ઝડપે કાર દોડાવતો જોયો છે. આનાથી વધુ જોખમી શું હોઈ શકે છે?
રિચર્ડ્સે એમ પણ કહ્યું કે એમના ડેન્ટીસ્ટે તેમને માઉથ ગાર્ડ પહેરીને રમવાની સલાહ આપી હતી પણ તેઓએ આમ એટલે ન કર્યું કેમ કે તેઓ એનાથી પછી રમત દરમિયાન ચુઈગ ગમ ચાવી નહોતા શકતા. નોંધનીય છે કે 1984 થી 1991 દરમિયાન રિચર્ડ્સ 50 ટેસ્ટ મેચ માટે વેસ્ટ ઇન્ડિઝ ટીમના કેપ્ટન હતા. આ દરમિયાન આશ્ચર્યજનક રીતે તેમની ટીમ એક પણ ટેસ્ટ સીરીઝ હારી નહોતી જે એક વિક્રમ છે.