બોલિવૂડ / ડ્રગ્સ સ્કેન્ડલમાં વિવેક ઓબરૉયની પત્નીના ભાઈનું નામ પણ સામે આવ્યું

• સેન્ડલવુડ ડ્રગ સ્કેન્ડલમાં આદિત્ય અલ્વાનું નામ સામે આવ્યું 
• કન્નડ ફિલ્મ અભિનેત્રી રાગિની દ્વિવેદાની સાથે 11 લોકોની ધરપકડ 
• બેંગ્લોરમાં ફિલ્મી જગતના સિતારાઓની ધરપકડ થઇ

આદિત્ય કર્ણાટકના પૂર્વ મંત્રી જીવરાજ અલ્વાના દીકરા છે

સેન્ડલવુડ ડ્રગ સ્કેન્ડલમાં હવે બોલિવૂડ એક્ટર વિવેક ઓબેરોયના સાળા આદિત્ય અલ્વાનું નામ સામે આવી રહ્યું છે. થોડા સમય પહેલા બેંગ્લોર સેન્ટ્રલ ક્રાઈમ બ્રાંચની ટીમ દ્વારા કન્નડ ફિલ્મ અભિનેત્રી રાગિની દ્વિવેદાની સાથે 11 લોકોની ડ્રગ્સના ઉપયોગના આરોપમાં ધરપકડ કરવામાં આવી હતી. નોંધનીય છે કે આદિત્ય કર્ણાટકના પૂર્વ મંત્રી જીવરાજ અલ્વાના દીકરા છે. અહેવાલ અનુસાર જે 12 લોકો વિરુદ્ધ ફરિયાદ દાખલ કરવામાં આવી છે તેમાં આદિત્યનું નામ પણ સામેલ છે. 

ધરપકડને લઈને કોઈ આધિકારિક નોટીસ નહીં

બેંગ્લોરમાં ફિલ્મી જગતના સિતારાઓની ધરપકડ થઇ તેના દસમાં દિવસે ડ્રગ્સ લેવાના આરોપમાં હવે આદિત્યનું નામ પણ સામે આવી રહ્યું છે. તેમનું નામ સામે આવવા પર ઘણા બધા લોકો ચોંકી ગયા છે કારણ કે પાર્ટી સર્કલમાં આદિત્ય એક પોપ્યુલર ચહેરો છે. બેંગ્લોરથી અહેવાલ અનુસાર આદિત્યની હજુ સુધી કસ્ટડીમાં લેવામાં આવ્યા નથી. તેમની ધરપકડને લઈને કોઈ આધિકારિક નોટીસ પણ આપવામાં આવી નથી. 

સિટી જોઈન્ટ કમિશનર સંદીપ પાટીલે જણાવ્યું કે રાગિની અને બીજા લોકો સામે FIR નોંધવામાં આવી છે. તેમાં ડ્રગ પેડલર શિવાપ્રકાશ રવિ શંકર, રાહુલ શેટ્ટી અને પાર્ટી વિરેન ખન્નાનું નામ પણ સામેલ છે. રાગિની અને શેટ્ટીની ધરપકડ શુક્રવારે જ કરવામાં આવી છે.