IAS અધિકારી રાજેશ કુમાર સિંઘ જેઓ ઝારખંડના હાયર એજ્યુકેશન ડિપાર્ટમેન્ટના સ્પેશ્યલ સેક્રેટરી હતા તેઓની બદલી કરીને તેમને કલેકટર એટલે કે ડિસ્ટ્રિક્ટ મેજિસ્ટ્રેટ તરીકેનું પદ આપવામાં આવ્યું. નોંધનીય છે કે તેઓ આંશિક રીતે અંધ છે અને તેઓ દેશના બીજા આંશિક પ્રજ્ઞાચક્ષુ અધિકારી છે જેમને ડિસ્ટ્રિક્ટ મેજિસ્ટ્રેટનું પદ સોંપવામાં આવ્યું હોય. રાજેશે 1998, 2002 અને 2006માં બ્લાઇન્ડ ક્રિકેટ વર્લ્ડકપમાં પણ ભાગ લીધો હતો.તેઓ 6 વર્ષના હતા ત્યારે ક્રિકેટ રમતી વખતે તેમની દ્રષ્ટિ ચાલી ગઈ હતી.
આજે બપોરે રાજેશને બોકારો જિલ્લાના ડેપ્યુટી કમિશનર તરીકે મુકવામાં આવ્યા. 37 વર્ષીય રાજેશ કુમારની સાથે સાથે ઝારખંડની સરકારે 18 IAS અધિકારીઓની બદલી કરી હતી.
આ નિર્ણય દેશભરના અંધ લોકો માટે પ્રેરણાદાયી: રાજેશ
નેશનલ એસોસિએશન ફોર ધ બ્લાઇન્ડ NAB દ્વારા મળેલી માહિતી પ્રમાણે રાજેશ એવા બીજા IAS અધિકારી છે જેઓ અંધ હોય અને તેમને કલેકટરનું પદ આપવામાં આવ્યું હોય. આ પહેલા ક્રિશ્ના ગોપાલ તિવારીને ઓગસ્ટ 2014માં ઉમરિયા મધ્ય પ્રદેશના જિલ્લા કલેકટરનું પદ આપવામાં આવ્યું હતું. આ નિર્ણય ઉપર રાજેશ કુમારે નિવેદન આપતા કહ્યું હતું કે હું મુખ્યમંત્રી હેમંત સોરેનનો અને મુખ્ય સચિવ સુખદેવ સિંઘનો આભારી છું જેમણે આ જવાબદારી મને સોંપી. મને ખાતરી છે કે આ દેશમાં રહેતા ઘણા બધા અંધ લોકો માટે પ્રેરણારૂપ બની રહેશે. હું અત્યારે કહેવા માંગુ છું કે મારી દ્રષ્ટિહીનતાને કારણે મને જીવનમાં કોઈ તકલીફ પડી નથી.
UPSCની દિવ્યાંગોની કેટેગરીમાં 2007માં ત્રીજો કર્મ મેળવ્યો હતો
રાજેશ મૂળ પટણાના અનિસાબાદના છે અને તેઓ 2007ની બેચના આસામ મેઘાલય કેડરના IAS અધિકારી છે જેઓએ અત્યાર સુધી મહિલા અને બાળ વિકાસ વિભાગ, સામાજિક કલ્યાણ વિભાગના જોઈન્ટ સેક્રેટરી તરીકે અને ઇન્ટિગ્રેટેડ ચાઈલ્ડ પ્રોટેક્શન સ્કિમના પ્રોજેક્ટ ડાયરેક્ટર તરીકે ફરજ બજાવી છે.
તેઓ 90%થી વધુ અંધ છે અને તેમણે UPSCની દિવ્યાંગોની કેટેગરીમાં 2007માં ત્રીજો કર્મ મેળવ્યો હતો. તેમને શરૂઆતમાં ડિપાર્ટમેન્ટ ઓફ પર્સનલ એન્ડ ટ્રેઇનિંગ તરફથી પોસ્ટિંગ મળ્યું ન હતું અને તેમને સુપ્રીમ કોર્ટ દ્વારા 2010માં પોસ્ટિંગ લેટર મળ્યો હતો. તેઓએ JNUમાંથી પોસ્ટ ગ્રેજ્યુએશન કર્યું છે. રાજેશે 180 પાનાનું એક પુસ્તક લખ્યું છે જેનું નામ I: Putting eye in IAS છે જેમાં એક નાના નગરના યુવાનની વાત છે જે અંધ હોવા છતાં દેશની સૌથી અઘરી ગણાતી ભારતીય સિવિલ સર્વિસની પરીક્ષામાં ક્રમાંક મેળવ્યો હતો. આ પુસ્તક 2016માં રિલીઝ થઇ હતી.
ક્રિકેટ વર્લ્ડકપમાં ભાગ લઇ ચુક્યા છે
રાજેશે 1998, 2002 અને 2006માં બ્લાઇન્ડ ક્રિકેટ વર્લ્ડકપમાં પણ ભાગ લીધો હતો.તેઓ 6 વર્ષના હતા ત્યારે ક્રિકેટ રમતી વખતે તેમની દ્રષ્ટિ ચાલી ગઈ હતી. તેઓએ મોડલ સ્કૂલ દહેરાદૂનમાં પોતાનું સ્કૂલીંગ કર્યું છે. તેઓને તેમની દિવસ દરમિયાનની પ્રવૃત્તિઓ કરવા માટે એક આસિસ્ટન્ટ આપવામાં આવશે.