વીરેન્દ્ર સેહવાગે રિષભ પંતને લઈને કહ્યું કે જો તે 100 ટેસ્ટ રમશે, તો તેનું નામ ઈતિહાસમાં અમર થઇ જશે. જાણો શા માટે વીરેન્દ્ર સેહવાગે આવું કહ્યું
રિષભ પંત જો 100 ટેસ્ટ રમે તો તેનું નામ ઈતિહાસમાં છપાઈ જશે - વીરેન્દ્ર સેહવાગ
ભારતમાં માત્ર 11 ક્રિકેટરોએ 100 ટેસ્ટ મેચ રમવાની સિદ્ધિ પ્રાપ્ત કરી છે
2011 વર્લ્ડ કપમાં પહેલા બોલ પર પાંચ વખત ફટકારી હતી બાઉન્ડ્રી
ભારતનાં પૂર્વ ઓપનિંગ બેટ્સમેન વીરેન્દ્ર સેહવાગે એવો દાવો કર્યો છે કે જો વિકેટકીપર - બેટ્સમેન રિષભ પંત 100 ટેસ્ટ રમે છે, તો તેમનું નામ ઈતિહાસમાં હંમેશા માટે લખવામાં આવશે. પંત ટી20 ક્રિકેટમાં પોતાના પરાક્રમોને કારણે હંમેશા ચર્ચામાં રહે છે. હાલમાં જ તેમણે ટેસ્ટ ક્રિકેટમાં પણ સારું પ્રદર્શન કર્યું હતું, તેમણે 30 મેચમાં 40.85ની સરેરાશથી 1920 રન બનાવ્યા હતા, જેમાં ચાર સદી અને નવ અડધી સદી સામેલ છે.
પંત કરશે ક્રિકેટ પર રાજ
માર્ચમાં શ્રીલંકા વિરુદ્ધ બે મેચમાં 24 વર્ષીય પંતે 120.12ની સ્ટ્રાઈક રેટથી 185 રન બનાવ્યા હતા, જેમાં બેંગ્લોરમાં પિંક બોલ ટેસ્ટમાં 28 બોલમાં અડધી સદી પણ સામેલ છે, જે બીજા દિવસે ભારતીય બેટ્સમેન દ્વારા બનાવવામાં આવેલ સૌથી ફાસ્ટ અડધી સદી હતી. સેહવાગે કહ્યું કે જો તે 100થી વધારે ટેસ્ટ રમે છે, તો તેનું નામ હંમેશા માટે ઈતિહાસનાં પાનામાં દાખલ થઇ જશે . માત્ર 11 ભારતીય ક્રિકેટરોએ આ સિદ્ધિ પ્રાપ્ત કરી છે અને સૌ કોઈ તે 11 નામોને યાદ કરી શકે છે.
સેહવાગ પણ કરતા હતા ઘાતક બેટિંગ
સેહવાગ પોતે ટેસ્ટ ક્રિકેટમાં સૌથી વિસ્ફોટક ખેલાડીઓમાંના એક હતા. તેમણે 82.23ની આશ્ચર્યજનક સ્ટ્રાઈક રેટથી 49.34ની સરેરાશે 8586 રન બનાવ્યા છે. વન ડે મેચમાં 35.05ની સરેરાશે 104.33નાં સ્ટ્રાઈક રેટથી 8273 રન બનાવ્યા છે. આ કોઈ આશ્ચર્યની વાત નથી કે સેહવાગ હજુ પણ વિચારે છે કે ટી20 વધારે લોકપ્રિય અને આકર્ષક હોવા છતાં ટેસ્ટ ક્રિકેટ ભવિષ્યમાં સારું ફોર્મેટ બની રહેશે.
કોહલી પર કહી આ વાત
સેહવાગે કહ્યું કે મારા મતે ટેસ્ટ ક્રિકેટ એ ખેલાડી માટે શ્રેષ્ઠ ક્રિકેટ છે. વિરાટ કોહલી ટેસ્ટ રમવાનો આટલો આગ્રહ કેમ રાખે છે? તે જાણે છે કે જો તે 100-150 અથવા તો 200 ટેસ્ટ રમશે તો તે રેકોર્ડ બુકમાં અમર થઈ જશે. સેહવાગને પ્રથમ બોલ પર બાઉન્ડ્રી ફટકારવાના તેના વિચાર માટે પણ યાદ કરવામાં આવે છે, જે તેણે 2011 વર્લ્ડ કપ દરમિયાન પાંચ વખત કર્યું હતું. આના પર સેહવાગે કહ્યું કે સચિન તેંદુલકર સહીત ઘણા લોકોએ મને કહ્યું હતું કે મેં પહેલા બોલ પર યોજના બનાવી છે. પરંતુ મેં ક્યારેય આમ કર્યું નથી. મેં પહેલા બોલને એ વિચારીને ફટકારવા તૈયાર રહેતો હતો કે તે વોર્મઅપ અથવા ખરાબ બોલ હશે.