સ્પોર્ટ્સ / વિરાટે અંગ્રેજ ખેલાડીને પછાડી ટી-20માં નવો વર્લ્ડ રેકોર્ડ સર્જ્યો

• વિરાટ કોહલીએ રચ્યો આ ઇતિહાસ
• IPLમાં અંગ્રેજ ખેલાડીને પછાડ્યો

આરસીબીના કેપ્ટન વિરાટ કોહલી માટે ગઈ કાલનો મુકાબલો બહુ જ ખાસ બની રહ્યો. વિરાટ કોઈ પણ એક ટી-૨૦ ટીમ તરફથી સૌથી વધુ મેચ રમનારાે ખેલાડી બની ગયો.

સૌથી વધુ ટી-૨૦ મેચ રમનારાની યાદીમાં ટોચના સ્થાને વિરાટ કોહલીનું નામ આવી ગયું છે. ૧૯૭મી મેચ રમીને વિરાટે જેમ્સ હિલ્ડ્રેથનો રેકોર્ડ તોડી નાખ્યો છે. જેમ્સે સમરસેટ તરફથી ૧૯૬ મેચમાં ૩૬૯૪ રન બનાવ્યા છે. ત્રીજા નંબર પર રહેલા સમિત પટેલે ૧૯૧ મેચમાં ૩૬૦૧ રન બનાવ્યા છે. ચોથા સ્થાન પર રહેલા મહેન્દ્રસિંહ આઇપીએલમાં કુલ ૧૯૫ મેચ રમ્યો છે, જેમાં ચેન્નઈ તરફથી ૧૬૫ અને પુણે સુપર જાયન્ટ્સ તરફથી ૩૦ મેચ રમ્યો છે. ધોનીએ ચેમ્પિયન્સ લીગમાં ચેન્નઈ તરફથી ૨૪ મેચ રમી છે. આમ, ધોની સીએસકે તરફથી કુલ ૧૮૯ મેચ રમ્યો છે. પાંચમા સ્થાન પર સુરેશ રૈના છે, જેણે ૧૮૮ મેચમાં ૫૩૬૯ રન બનાવ્યા છે, જોકે આ વર્ષે સુરેશ  રૈના અંગત કારણસર આઇપીએલમાં રમી રહ્યો નથી.

ઉલ્લેખનીય છે કે કોહલીએ આઇપીએલમાં આરસીબી તરફથી ૧૮૨ અને ચેમ્પિયન્સ લીગમાં ૧૫ મેચ રમી છે. આ દરમિયાન તેણે આઇપીએલમાં સૌથી વધુ ૫૫૦૨ રન અને ચેમ્પિયન્સ લીગની ૧૫ મેચમાં ૪૨૪ રન બનાવ્યા છે.

કોહલી ૯૦૦૦ રન બનાવનાર પ્રથમ ભારતીયઃ કોહલી ઓવરઓલ ટી-૨૦ ક્રિકેટમાં ૯૦૦૦ રન બનાવનાર પ્રથમ ભારતીય પણ બની ગયો છે. તેણે આ સિદ્ધિ પણ ગઈ કાલની મેચમાં હાંસલ કરી છે. મેચમાં તેણે ૪૩ રન બનાવ્યા. આ સાથે જ કોહલીએ આંતરરાષ્ટ્રીય, ઘરેલુ અને આઇપીએલ સહિત બધી ૨૮૬ ટી-૨૦ મેચમાં ૪૧.૦૫ની સરેરાશથી ૯૦૩૩ રન બનાવી લીધા છે. વિરાટ બાદ રોહિતનું નામ આવે છે, જેણે ૩૩૩ ટી-૨૦ મેચમાં ૮૮૧૮ રન બનાવ્યા છે.