આવતા સપ્તાહે ટીમ ઈંગ્લેન્ડ જવા રવાના થઈ જશે. ભારતને પોતાની પ્રથમ પ્રેક્ટિસ મેચ ૨૫ મેએ ઓવલ ખાતે ન્યૂઝીલેન્ડ સામે રમવાની છે અને બીજી મેચ ૨૮ મેએ બાંગ્લાદેશ સામે કાર્ડિફ ખાતે રમવાની છે. ભારતને વિશ્વકપનો પ્રથમ મુકાબલો પાંચ જૂને દક્ષિણ આફ્રિકા સામે રમવાનો છે. જો ટીમ ફાઇનલ (૧૪ જૂન)માં પહોંચશે તો ટીમ ઇન્ડિયાના ખેલાડીઓએ ૫૫ દિવસ સુધી ઘરની બહાર રહેવું પડશે.
નવી દિલ્હીઃ ઇન્ડિયન પ્રીમિયર લીગ (IPL)નું સમાપન થઈ ચૂક્યું છે અને હવે ક્રિકેટનાં મહાકુંભ વન ડે વર્લ્ડકપ શરૂ થવાનો છે, તેથી ટૂંક સમયમાં બધું જ ફોકસ ૩૦ મેથી ઈંગ્લેન્ડના શરૂ થનારા વર્લ્ડકપ તરફ શિફ્ટ થઈ જશે, જો કે આ બધા વચ્ચે ભારતીય ટીમ મેનેજમેન્ટે બીસીસીઆઇ સમક્ષ વિશ્વકપ દરમિયાન ખેલાડીઓની પત્ની અને પરિવારને સાથે રાખવા મંજૂરી આપવાની અપીલ કરી હતી, પરંતુ બોર્ડે ફક્ત ૧૪ દિવસની જ મંજૂરી આપી છે.
હવે આવતા સપ્તાહે ટીમ ઈંગ્લેન્ડ જવા રવાના થઈ જશે. ભારતને પોતાની પ્રથમ પ્રેક્ટિસ મેચ ૨૫ મેએ ઓવલ ખાતે ન્યૂઝીલેન્ડ સામે રમવાની છે અને બીજી મેચ ૨૮ મેએ બાંગ્લાદેશ સામે કાર્ડિફ ખાતે રમવાની છે. ભારતને વિશ્વકપનો પ્રથમ મુકાબલો પાંચ જૂને દક્ષિણ આફ્રિકા સામે રમવાનો છે. જો ટીમ ફાઇનલ (૧૪ જૂન)માં પહોંચશે તો ટીમ ઇન્ડિયાના ખેલાડીઓએ ૫૫ દિવસ સુધી ઘરની બહાર રહેવું પડશે.
બીસીસીઆઇનાં એક અધિકારીએ જણાવ્યું કે ટીમ ઇન્ડિયાનાં કેપ્ટન વિરાટ કોહલીએ બોર્ડને વિનંતી કરી હતી કે વિશ્વકપ દરમિયાન ખેલાડીઓને તેના પરિવારજનો સાથે રહેવાની મંજૂરી આપવામાં આવે. બીસીસીઆઇએ તેમની આ વિનંતીને સ્વીકારી તો લીધી છે, પરંતુ બીસીસીઆઇએ એક શરત પણ મૂકી છે કે વિશ્વકપ શરૂ થયાના ૨૧ દિવસ બાદ જ કોઈ પણ ખેલાડી પત્ની અથવા પરિવારને ફક્ત ૧૪ દિવસ સુધી જ પોતાની સાથે રાખી શકશે.
વિશ્વકપ દરમિયાન ખેલાડીઓનું ધ્યાન ના ભટકે એ કારણે જ બીસીસીઆઇએ આ શરત મૂકી છે. બીસીસીઆઇએ સ્પષ્ટ કરી દીધું છે કે આ નિયમ ટીમના બધા ખેલાડીઓને લાગું પડશે. પાછલા કેટલાક વિદેશ પ્રવાસ દરમિયાન બીસીસીઆઇને ખેલાડીઓ અને તેમના પરિવાર માટે વ્યવસ્થા કરવામાં કેટલીક મુશ્કેલીઓનો સામનો કરવો પડ્યો હતો. આ જ કારણસર બીસીસીઆઇએ આ વખતે શરત સાથે આ મંજૂરી આપી છે.
ઉલ્લેખનીય છે કે બીસીસીઆઇએ પહેલાથી જ નિયમ બનાવી રાખ્યો છે કે કોઈ પણ વિદેશ પ્રવાસ પર ખેલાડીઓની પત્ની અને પરિવારનાં સભ્યો બે સપ્તાહ સુધી ટીમની સાથે રહી શકે છે, જોકે પાછલા કેટલાક પ્રવાસ દરમિયાન આ નિયમમાં છૂટછાટ આપવામાં આવી હતી અને ઘણા ખેલાડીઓની પત્નીએ વધુ સમય પતિ સાથે વિતાવ્યો હતો, જો કે આ બાબતની ઘણી ટીકા પણ થઈ હતી.