વિરાટ કોહલી સાઉથ આફ્રિકા સામેની મેચમાં ફરી એક વખત પોતાનાં ફોર્મમાં પરત ફર્યો હોય એવું લાગતું હતું. ફિફ્ટી ફટકાર્યા બાદ અનુષ્કા અને વામીકા ઊછળી પડ્યા હતા તો વિરાટે પણ સામે ઈશારો કર્યો હતો.
કોહલીએ ફરી ફોર્મમાં પરત ફરતા ફિફ્ટી ફટકારી હતી
ચેઝ માસ્ટર કોહલી પોતાના જૂના આગવા અંદાજમાં
પત્ની અનુષ્કા અને દીકરી Vamika પણ ખુશ થઈ ગયા
વિરાટ ફરી ફોર્મમાં
લાંબા સમયથી ફોર્મ સામે લડી રહેલો પૂર્વ કેપ્ટન વિરાટ કોહલી દક્ષિણ આફ્રિકા સામેની ત્રીજી વનડેમાં લયમાં જોવા મળ્યો હતો. મેદાન પર ઉતરતાની સાથે જ તેણે ચોગ્ગા ફટકારીને ખાતું ખોલાવ્યું અને તે પછી તે ખૂબ જ સમજદારીપૂર્વક પોતાની ઇનિંગ્સને આગળ વધારતો જોવા મળ્યો. ટાર્ગેટનો પીછો કરવા ઉતરેલ કોહલી ફરી એકવાર પોતાની જૂની સ્ટાઈલમાં રમતો જોવા મળ્યો હતો. તેણે એક છેડે પડી રહેલી વિકેટ વચ્ચે 63 બોલમાં પોતાની અડધી સદી પૂરી કરી.
અનુષ્કા ખુશીથી ઉછળી પડી
વિરાટ કોહલીએ 50મો રન લેતાની સાથે જ પત્ની અનુષ્કા ખુશીથી ઉછળી પડી હતી. તે દીકરી વામિકાને ખોળામાં લઈને લાંબા સમય સુધી તાળીઓ પાડતી જોવા મળી હતી અને તેના પિતા વિરાટનો ઈશારો દીકરીને બતાવતી જોવા મળી હતી.
તો બીજી તરફ વિરાટ પણ બાળકની જેમ ખોળામાં બેટને સ્વિંગ કરતો જોવા મળ્યો હતો. આ ખાસ પળનો વીડિયો અને તસવીરો સોશિયલ મીડિયા પર વાયરલ થઈ રહી છે. તમને જણાવી દઈએ કે આજે પહેલીવાર દીકરી વામિકા કેમેરાની સામે આવી છે.
જો કે, કોહલી ફરી એકવાર તેની ઇનિંગ્સને સદી સુધી લઈ જવામાં નિષ્ફળ રહ્યો હતો. તે 65 રનના અંગત સ્કોર પર કેશવ મહારાજની બોલ પર તેમ્બા બાવુમાના હાથે કેચ આઉટ થયો હતો. તેણે 84 બોલનો સામનો કર્યો અને 5 ચોગ્ગા ફટકાર્યા. સિરીઝમાં આ બીજી વખત છે જ્યારે તેણે 50 રનનો આંકડો પાર કર્યો છે.
અગાઉ, ફોર્મમાં ચાલી રહેલા ઓપનર ક્વિન્ટન ડી કોક (124) અને રાસી વેન ડેર ડ્યુસેન (52 રન)ની અડધી સદીની મદદથી દક્ષિણ આફ્રિકાએ ભારતને જીતવા માટે 288 રનનો લક્ષ્યાંક આપ્યો હતો. બેટિંગ માટે આમંત્રણ મળ્યા બાદ દક્ષિણ આફ્રિકાનો દાવ 49.5 ઓવરમાં 287 રનમાં સમેટાઈ ગયો હતો. વિકેટ કીપર બેટ્સમેન ડી કોકે 130 બોલમાં 124 રન બનાવ્યા અને ચોથી વિકેટ માટે વેન ડેર ડ્યુસેન સાથે 144 રનની ભાગીદારી કરી.
સાઉથ આફ્રિકાએ ત્રીજી અને છેલ્લી વનડેમાં ટીમ ઈન્ડીયાને રોમાંચક મુકાબલામાં 4 રનથી પરાજય આપ્યો છે. ટીમ ઈન્ડીયાની સામે મેચ જીતવા માટે 288 રનનો ટાર્ગેટ હતો જેના જવાબમા ટીમ 283 રન બનાવી શકી અને મેચ હારી ગઈ. અંતિમ હાર સાથે ભારતીય ટીમ વનડે સીરિઝની એક પણ મેચ જીતી શકી નથી અને આફ્રિકાએ ભારતનો 3-0થી ક્લીન સ્વીપ કર્યો છે.
ચાહરની ફિફ્ટી બેકાર ગઈ
ટાર્ગેટનો પીછો કરવા ઉતરેલી ટીમ ઈન્ડીયાએ 7મી વિકેટ 223 રનના સ્કોર પર ગુમાવી દીધી હતી અને હાર લગભગ નક્કી હતી ત્યારે દીપક ચાહરે 34 બોલમાં શાનદાર 54 રન બનાવીને મેચની તસવીર બદલી નાખી હતી. ચાહરે 287ના સ્કોર પર આઉટ થયો અને ત્યાર બાદ જસપ્રીત બુમરાહ અને ચહલ (2) રન બનાવીને આઉટ થયા હતા. ટીમ ઈન્ડીયા લગભગ જીતેલી મેચ હારી ગઈ હતી.