RCBએ હંમેશા માટે રિટાયર કરી નંબર 12ની જર્સી વિરાટે જણાવ્યું કારણ

ઇન્ડિયન પ્રીમિયર લીગ (IPL)ના ઇતિહાસમાં રોયલ ચેલેન્જર્સ બેંગલુરુ (RCB) એક સારી ટીમ તરીકે ઊભરી છે. બાકીની ટીમોની સરખામણીએ RCBના ચાહકો પણ વધુ છે. આરસીબી RCB ફ્રેન્ચાઇઝી IPLની એક પણ સિઝનમાં ચેમ્પિયન બની નથી છતાં તેની લોકપ્રિયતા વધુ છે.

દર વર્ષે ચિન્નાસ્વામી સ્ટેડિયમમાં મોટી સંખ્યામાં ફેન્સ વિરાટ કોહલી અને તેની ટીમને સપોર્ટ કરવા પહોંચી જાય છે. આ વર્ષે પોતાના ફેન્સ માટે RCBએ કંઈક અલગ જ કરીને તેમને એક ખાસ ટ્રિબ્યુટ આપી છે. RCBએ હંમેશ માટે જર્સી નંબર 12ને રિટાયર કરી તે પોતાના ફેન્સને સમર્પિત કરી છે.

RCBએ તેના ફેસબુક પેજ પર એક વીડિયો શેયર કર્યો છે જેમાં ટીમનો કેપ્ટન વિરાટ કોહલી તેના ચાહકોનો આભાર માની રહ્યો છે અને તેમને આ જર્સી સમર્પિત કરી રહ્યો છે. આ વીડિયો અનુસાર વિરાટ કોહલીએ કહ્યું છે કે ''હું અહીં ટીમ વિશે વાત કરવા આવ્યો નથી પરંતુ ટીમની પાછળની ટીમ વિશે હું વાત કરવા માગું છું જે અમારા ફેન્સ છે. આજે અમે અમારા ફેન્સ માટે કંઈક અલગ કરવા માગીએ છીએ. અમને આટલાં વર્ષોથી સપોર્ટ કરી રહેલા ફેન્સ માટે આ એક ટ્રિબ્યુટ છે.''

કોહલી કહે છે કે ''આ જર્સી માત્ર ફેન્સ માટે ડિઝાઇન કરવામાં આવી છે. આ જર્સી પાછળ 12 નંબર લખ્યો છે જેનો મતલબ થાય છે કે તમામ ફેન્સ અમારી ટીમના ઓફિશિયલ 12મા ખેલાડી છે. અમે હંમેશ માટે RCBની આ જર્સી નબંર 12ને રિટાયર કરી રહ્યા છીએ જે ફેન્સ સાથે જોડાયેલી રહેશે.''

IPLની પહેલી મેચ સાત એપ્રિલે મુંબઈના વાનખેડે સ્ટેડિયમમાં રમાશે. જ્યારે RCB તેની પહેલી મેચ આઠ એપ્રિલે કોલકાતાના ઇડન ગાર્ડનમાં કોલકાતા નાઇટ રાઇડર્સ સામે રમશે.