વિરાટ કોહલીએ દિગ્ગજ ગાયક-અભિનેતા કિશોર કુમારના બંગલાને પોતાના નવા સાહસમાં બદલવાનો નિર્ણય કરી 5 વર્ષ માટે ભાડા પર લીધો છે.
વિરાટ કોહલીએ કિશોર કુમારનો બંગલો લીધો ભાડે
વિરાટ ટૂંક સમયમાં એક નવું હાઈ ગ્રેડ રેસ્ટોરન્ટ શરૂ કરશે
દિલ્હીમાં પણ છે વિરાટનું રેસ્ટોરન્ટ
બોલીવુડના દિગ્ગજ અભિનેતા અને ગાયક કિશોર કુમારને કોણ નથી ઓળખતું? કિશોર કુમારે ઘણી હિટ ફિલ્મો ઉપરાંત સદાબહાર ગીતો બૉલીવુડને આપ્યા છે. આજે પણ લોકો એમના ગીતો સાંભળે છે અને એમને યાદ કરે છે. સિનેમા પર રાજ કરનાર કિશોર કુમારનો મુંબઈના જુહુમાં આલીશાન બંગલો હતો. જેને હાલ ભારતીય ક્રિકેટર વિરાટ કોહલીએ ભાડે લીધો છે. વિરાટ કોહલીએ દિગ્ગજ ગાયક-અભિનેતાના બંગલાને પોતાના નવા સાહસમાં બદલવાનો નિર્ણય કર્યો છે અને એમના એ બંગલોને 5 વર્ષ માટે ભાડે લઈ લીધો છે. તમને જણાવી દઈએ કે વિરાટ ત્યાં ટૂંક સમયમાં એક નવી હાઈ ગ્રેડ રેસ્ટોરન્ટ શરૂ કરવા જઈ રહ્યા છે. કિશોર કુમારના પુત્ર અમિત કુમારે આ સમાચાર આપ્યા છે.
એક મીડિયા રિપોર્ટ અનુસાર ક્રિકેટર વિરાટ કોહલીએ જુહુમાં કિશોર કુમારના બંગલાના પરિસરનો મોટો હિસ્સો ભાડે લીધો છે અને ત્યાં રેસ્ટોરન્ટ બનાવવાનું કામકાજ પણ શરૂ થઈ ગયું છે. ટૂંક સમયમાં જ એ જગ્યાને એક હાઈ-ગ્રેડ રેસ્ટોરન્ટનું સ્વરૂપ આપવામાં આવશે.
અમિત કુમારે કરી પુષ્ટિ
એક મીડિયા રિપોર્ટ અનુસાર વિરાટ કોહલીના આ નવા પ્રોજેક્ટનું કામ લગભગ પૂરું થવા આવ્યું છે અને આવતા મહિનાથી એમનું એ હાઈ ગ્રેડ રેસ્ટોરન્ટ શરૂ થઈ શકે છે. આ સમાચારની પુષ્ટિ કિશોર કુમારના પુત્ર અમિત કુમારે કરી છે અને એમને કહ્યું હતું કે, 'લીના ચંદાવરકરનો દીકરો સુમિત થોડા મહિના પહેલા જ ક્રિકેટરને મળ્યો હતો અને એમને આ મુદ્દે વાત કરી હતી. આ જગ્યા ક્રિકેટર વિરાટ કોહલીને 5 વર્ષ માટે ભાડે આપી દેવામાં આવી છે.'
કિશોર કુમારના મોટા દીકરા છે અમિત કુમાર
જણાવી દઈએ કે કિશોર કુમારે ચાર લગ્ન કર્યા હતા. લીના ચંદાવરકર કિશોર કુમારની ચોથી પત્ની છે અને તેમનો એક દીકરો સુમિત છે. અમિત કુમારએ કિશોરની પહેલી પત્ની રૂમા ગુહાનો પુત્ર છે. અમિત કુમાર પણ તેના પિતા કિશોર કુમારની જેમ પ્લેબેક સિંગર, એક્ટર અને મ્યુઝિક ડિરેક્ટર છે.
દિલ્હીમાં પણ છે વિરાટનું રેસ્ટોરન્ટ
તમને ખબર ન હોય તો જણાવી દઈએ કે ક્રિકેટર વિરાટ કોહલીનું આ પહેલું રેસ્ટોરન્ટ નથી. આ શોખની શરૂઆત ક્રિકેટરે વર્ષ 2017માં દિલ્હીના આરકે પુરમથી કરી હતી. એમને પહેલું રેસ્ટોરન્ટ દિલ્હીમાં શરૂ કર્યું હતું અને પછી બીજું રેસ્ટોરન્ટ પણ ત્યાં જ ખોલ્યું હતું. ફક્ત રેસ્ટોરન્ટનો જ નહીં પણ વિરાટ કોહલી ક્લોથિંગ લાઇનમાં પણ ઘણો એક્ટિવ છે. તેમની WROGN નામની કપડાંની બ્રાન્ડ છે જે હાલ ઘણી લોકપ્રિય બની છે.