ક્રિકેટ / ન્યૂઝીલેન્ડ સામે હાર બાદ કોહલીને વધુ એક મોટો ઝટકો, હવે રૅન્કિંગમાં આ ખેલાડી નંબર વન

• ટેસ્ટ રેન્કિંગમાં બીજા સ્થાને પહોંચ્યા વિરાટ કોહલી 
• સ્ટીવ સ્મિથ બન્યા દુનિયાના નંબર વન ખેલાડી 
• જસપ્રીત બુમરાહ ટોપ 10માંથી બહાર 

ન્યૂઝીલેન્ડનાં પ્રવાસમાં ખરાબ પ્રદર્શનનાં કારણે ભારતીય કેપ્ટન કોહલીએ નુકસાન ભોગવવું પડી રહ્યું છે. ટેસ્ટ ક્રિકેટની દુનિયામાં વિરાટ કોહલીની બાદશાહત ઘણા સમયથી હતી પરંતુ સતત નિરાશાજનક પ્રદર્શનનાં લીધે હવે ટેસ્ટ ક્રિકેટની રેન્કિંગમાં કેપ્ટન કોહલીનો ધબડકો થયો છે. 26મી ફેબ્રુઆરીનાં રોજ જાહેર કરવામાં આવેલ ટેસ્ટ રેન્કિંગમાં વિરાટ કોહલી પહેલાં સ્થાનેથી ખસકીને બીજા સ્થાને પહોંચી ગયા છે. વિરાટ કોહલીની સાથે જસપ્રીત બુમરાહને પણ નુકસાન થયું છે. જસપ્રીત બુમરાહ ટોપ 10માંથી બહાર નીકળી ગયા છે. 

ન્યૂઝીલેન્ડના પ્રવાસ પર ટીમ ઈન્ડિયાનું ટેસ્ટ સીરીઝમાં ખૂબ ખરાબ પ્રદર્શન રહ્યું હતું. ટેસ્ટ મેચમાં વિરાટ કોહલી કંઈ કમાલ કરી ન શક્યા. પહેલી મેચમાં વિરાટ 2 રન પર જ્યારે બીજી મેચમાં તે 19 રન બનાવી આઉટ થઇ ગયા. સતત ખરાબ પ્રદર્શનનાં કારણે વિરાટ કોહલીનાં પોઈન્ટ હવે 906 થઇ ગયા અને 911 પોઈન્ટ સાથે ઓસ્ટ્રેલિયાનાં કેપ્ટન ટેસ્ટ રેન્કિંગમાં ટોચના સ્થાને પહોંચી ગયા છે. 
 

કોહલી હાલમાં રેન્કિંગમાં બીજા સ્થાને છે જયારે અન્ય ત્રણ બેટ્સમેન પણ ટોપ 10ની યાદીમાં છે. અજિંક્ય રહાણે, ચેતેશ્વર પૂજારા અને મયંક અગ્રવાલ અનુક્રમે આઠમાં, નવમાં અને દસમાં સ્થાને છે. વેલિંગટન ટેસ્ટમાં માત્ર એક વિકેટ લેનાર બુમરાહ ટોપ 10માંથી બહાર થઇ ગયા છે. 756 પોઈન્ટ સાથે તે 11માં સ્થાને પહોંચી ગયા છે.