ભારતીય ક્રિકેટ ટીમે ઓસ્ટ્રેલિયાના પ્રવાસ દરમિયાન રેટ્રો જર્સી પહેરી છે, જે લોકોમાં ખૂબ ચર્ચાનો વિષય બની રહી છે.
ટીમ ઇન્ડિયાની આ જર્સી ૧૯૯૨ના વિશ્વકપ દરમિયાન પહેરવામાં આવેલી જર્સીનો નવો લૂક છે. ભારતની આ જર્સીની ચર્ચા ફક્ત ક્રિકેટ રમતા દેશોમાં જ નહીં, બલકે અન્ય દેશમાં પણ થઈ રહી છે. અમેરિકાની બેસબોલની ટીમે ભારતીય જર્સી અને ટીમના કેપ્ટનને લઈને સોશિયલ મીડિયા પર તસવીર શેર કરી છે, જે ખૂબ વાઇરલ થઈ રહી છે.
અમેરિકાની મેજર બેસબોલ લીગ પણ ભારતીય જર્સી અને વિરાટ કોહલીની ફેન બની ચૂકી છે. તેણે પોતાના સોશિયલ મીડિયા પર કેપ્ટન વિરાટ કોહલીની ભારતીય જર્સી પહેરેલી તસવીર પોસ્ટ કરી છે, પરંતુ આ ફોટોમાં વિરાટ એક હાથમાં ક્રિકેટના બેટના સ્થાને બેસબેટ પકડેલો નજરે પડી રહ્યો છે. તસવીર સાથે કેપ્શન લખવામાં આવી છેઃ ભારતીય જર્સીને રેટિંગ આપો.
અમેરિકામાં ટૂંક સમયમાં ક્રિકેટની શરૂઆત થવાની છે અને તેના માટે અમેરિકા તૈયારીઓ પણ કરી રહ્યું છે. કોલકાતા નાઇટ રાઇડર્સના માલિક શાહરુખ ખાન અમેરિકામાં રમાનારી ટી-૨૦ ક્રિકેટ લીગમાં ટીમ ખરીદવાનો છે, જેની પુષ્ટિ ખુદ KKRએ પોતાના સત્તાવાર પેજ પર કરી છે.