ક્રિકેટ / ટી20 વર્લ્ડ કપ બાદ કિંગ કોહલીનાં સંન્યાસની અટકળો! આ એક નિવેદન બાદ ક્રિકેટ જગતમાં મચ્યો ખળભળાટ

• શોએબ અખ્તરે કહ્યું કે વિરાટ કોહલી ટી20 વર્લ્ડ કપ બાદ ટી20 ફોર્મેટથી સંન્યાસ લઈ શકે છે 
• એશિયા કપમાં વિરાટે ફટકારી હતી પોતાની 71મી સદી 
• અફઘાનિસ્તાન સામે બનાવ્યા હતા 122 રન 

 

એશિયા કપ 2022માં ટીમ ઈન્ડિયાના ધાકડ બેટ્સમેન વિરાટ કોહલીની સફર સફળ રહી. આ ટુર્નામેન્ટ પહેલા તેઓ ખરાબ ફોર્મથી ઝઝૂમી રહ્યા હતા, પણ એશિયા કપમાં તેમણે કમાલ કરી બતાવી. આ બધાની વચ્ચે એક એવું નિવેદન સામે આવ્યું છે, જેણે સૌ કોઈને ચોંકાવી દીધા છે. આ નિવેદન વિરાટ કોહલીનાં સન્યાસને લઈને છે. 

વિરાટના સન્યાસને લઈને ચોંકાવનારૂ નિવેદન 
વિરાટ કોહલીએ હાલમાં જ પોતાના ફોર્મમાં વાપસી કરી છે. તેમણે એશિયા કપ 2022ની છેલ્લી મેચમાં પોતાની પહેલી ટી20 સદી પણ ફટકારી છે. આ બધાની વચ્ચે પાકિસ્તાનના પૂર્વ ફાસ્ટ બોલર શોએબ અખ્તરનું ચોંકાવનાર નિવેદન સામે આવ્યું છે. શોએબ અખ્તરનું માનવું છે કે વિરાટ કોહલી ટી20 વર્લ્ડ કપ 2022 બાદ ટી20 ફોર્મેટથી સન્યાસનું એલાન કરશે. 

ભવિષ્યને ધ્યાનમાં રાખતા લેશે રિટાયરમેન્ટ 
પાકિસ્તાનનાં પૂર્વ ફાસ્ટ બોલર શોએબ અખ્તરે એક લાઈવ સેશન દરમિયાન વિરાટ કોહલીનાં રિટાયરમેન્ટ વિશે વાત કરી. ટી20 વર્લ્ડ કપ 2022 બાદ વિરાટ કોહલી કદાચ ટી20 ફોર્મેટથી સન્યાસ લેશે. તેઓ આમ એટલા માટે કરી શકે છે, જેથી ક્રિકેટનાં અન્ય ફોર્મેટમાં તેઓ ધ્યાન આપી શકે. જો હું તેમની જગ્યાએ હોત, તો ભવિષ્યને ધ્યાનમાં રાખીને આ જ નિર્ણય લેત. શોએબ અખ્તરનું માનવું છે કે એક ફોર્મેટ છોડ્યા બાદ વિરાટ લાંબા સમય સુધી ક્રિકેટ રમી શકે છે. 

ટી20 ક્રિકેટમાં શાનદાર આંકડાઓ 
વિરાટ કોહલીએ અત્યાર સુધીમાં 104 ટી20 ઇન્ટરનેશનલ મુકાબલાઓ રમ્યા છે, જેમાં તેમણે 51.94ની સરેરાશે 3584 રન બનાવ્યા છે. કોહલીએ ટી20 ઇન્ટરનેશનલમાં 32 હાફ સેન્ચુરી અને એક સેન્ચુરી ફટકારી છે. આ દરમિયાન તેમનો સ્ટ્રાઈક રેટ 138. 37 રહ્યો છે. જ્યારે એશિયા કપ 2022માં વિરાટ કોહલીએ 5 મેચમાં 92ની સરેરાશે 276 રન બનાવ્યા છે, જેમાં તેમણે અફઘાનિસ્તાન સામે 122 રન બનાવ્યા હતા.