ઑસ્ટ્રેલિયાના પૂર્વ કેપ્ટન સ્ટીવ વૉએ વિરાટ કોહલીની બેટિંગ ટેક્નિકને દુનિયાના હાલના ક્રિકેટરોમાં સર્વશ્રેષ્ઠ કહી દીધો છે.
બ્રાયન લારા અને વિવિયન રિચર્ડ્સ જેવા દિગ્ગજોની સાથે સરખામણી કરતા સ્ટીવ વૉએ કહ્યુ કે વિરાટ કોહલીમાં એક મહાન બેટ્સમેન બનવાના તમામ ગુણો છે.
સ્ટીવ વૉએ આગળ કહ્યુ કે ''કોહલી પાસે ગજબની ટેકનીક છે અને તેવી કળા વર્તમાન ક્રિકેટમાં અન્ય કોઈની પાસે નથી. એબી ડિ વિલિયર્સ આવો જ છે પણ તે ટેસ્ટ ક્રિકેટ છોડી ચૂક્યો છે આવામાં વિરાટ આગળ નીકળી જાય છે. ''
કોહલીની પ્રશંસા કરતા કહ્યુ કે ''મને લાગે છે કે સ્ટીવ સ્મિથમાં રનની ભૂખ સૌથી વધુ છે પણ અત્યારે તે 1 વર્ષ માટે ક્રિકેટથી દૂર છે. આવામાં વિરાટ સૌથી શાનદાર છે. તેને મોટી તકની શોધ રહે છે એવી જ રીતે જેવી રીતે બ્રાયન લારા સચિન તેંડુલકર વિવ રિચર્ડ્સ અને જાવેદ મિયાંદાદને રહેતી હતી.''
તમને જણાવી દઇએ કે ઇંગ્લેન્ડના પ્રવાસ પર કેપ્ટન વિરાટ કોહલીએ શાનદાર બેટિંગ કરી. બર્મિધમમાં રમાયેલી પહેલી ટેસ્ટમાં કોહલીએ પહેલી ઇનિંગમાં 149 રન જ્યારે બીજી ઇનિંગમાં 51 રન કર્યા.
આ પ્રવાસ પર વિરાટ કોહલી ટેસ્ટ ક્રિકેટમાં પોતાના 6000 રન પૂરા કરવાની ખૂબ જ નજીક છે. વિરાટ કોહલીએ ટેસ્ટ ક્રિકેટમાં અત્યાર સુધી 67 મેચમાં 114 ઇનિંગમાં 54.28ની એવરેજથી 5754 રન કર્યા. આ સીરિઝમાં વિરાટ કોહલી જો 246 રન કરી દે તો ટેસ્ટ ક્રિકેટમાં 6000 રન કરનારો 10મો ઇન્ડિયન પ્લેયર બની જાય.