મંગળવારે રાતે ટીમ ઇન્ડિયા પોતાના વર્લ્ડ કપ મિશન માટે મુંબઇથી ઇંગ્લેન્ડ જવા માટે રવાના થઇ હતી.
30 મેથી શરૂ થનારા ક્રિકેટ મહાકુંભમાં ટીમ ઇન્ડિયાને વર્લ્ડકપની જીત માટેના સૌથી પ્રબળ દાવેદાર માનવામાં આવી રહી છે. આ વર્લ્ડકપ બેટ્સમેનોને અનુકૂળ વિકેટ પર રમાવાનો છે, આથી જ ટીમ ઇન્ડિયાની આશા મોટા ભાગે દુનિયાના બે સર્વશ્રેષ્ઠ બેટ્સમેનો પર નિર્ભર રહેશે. ભારતીય ચાહકો ઇચ્છે છે કે કેપ્ટન વિરાટ કોહલી અને વાઇસ કેપ્ટન રોહિત શર્મા ક્રિકેટના આ મહાકુંભમાં પોતાનો જલવો દેખાડે. આંતરરાષ્ટ્રીય ક્રિકેટમાં બેટ્સમેનોના રેન્કિંગમાં લાંબા સમયથી વિરાટ અને રોહિતનો દબદબો રહ્યો છે અને જો 2015ના વર્લ્ડ કપ બાદથી આ ફોર્મેટમાં સૌથી વધુ રન બનાવવાની વાત કરવામાં આવે તો આ બંને દુનિયાના અન્ય બેટ્સમેનો કરતાં ઘણા આગળ નજરે પડી રહ્યા છે.
2015ના વર્લ્ડકપ બાદ 4000થી વધુ રનઃ વિરાટ કોહલીના બેટમાંથી ક્રિકેટનાં બધાં ફોર્મેટમાં પાછલાં ત્રણ-ચાર વર્ષથી સતત રન થઇ રહ્યા છે. ઓસ્ટ્રેલિયા-ન્યૂઝીલેન્ડમાં 2015માં રમાયેલા વર્લ્ડકપમાં ટીમ ઇન્ડિયાને સેમિફાઇનલમાં પરાજયનો સામનો કરવો પડ્યો હતો. ત્યાર બાદથી આંતરરાષ્ટ્રીય વન ડે ક્રિકેટમાં વિરાટ એકમાત્ર એવો બેટ્સમેન છે, જેણે 4000થી વધુ રન બનાવ્યા છે. વિરાટે આ સમયગાળા દરમિયાન 78.29ની સરેરાશથી 4306 રન બનાવ્યા છે. આ લિસ્ટમાં રોહિત શર્મા 61.12ની સરેરાશથી 3790 રન બનાવીને બીજા સ્થાને બિરાજી રહ્યો છે.
આ ખાસ લિસ્ટમાં વિરાટ-રોહિત બાદ ઈંગ્લેન્ડના બે સ્ટાર બેટ્સમેનનું નામ આવે છે. જો રૂટ 58.30ની સરેરાશથી 3498 રન સાથે ત્રીજા અને ઈયોન મોર્ગન 46.75ની સરેરાશથી 3039 રન બનાવીને ચોથા ક્રમ પર છે. દક્ષિણ આફ્રિકાનો ક્વિન્ટન ડિ'કોક 50.35ની સરેરાશથી 2971 રન સાથે પાંચમા ક્રમ પર છે.
વન ડે રેન્કિંગમાં પણ વર્ચસ્ જાળવી રાખ્યુંઃ વિરાટ અને રોહિતે પાછલાં ઘણાં વર્ષોથી વનડે ક્રિકેટમાં ધમાકેદાર પ્રદર્શન કરીને રેન્કિંગમાં પણ શરૂઆતનાં બંને સ્થાન પર પોતાનો જમાવી રાખ્યો છે. વિરાટ કોહલી 839 પોઇન્ટ સાથે પ્રથમ સ્થાને અને 839 પોઇન્ટ સાથે રોહિત બીજા સ્થાને છે. ન્યૂઝીલેન્ડનો રોસ ટેલર 830 પોઇન્ટ સાથે ત્રીજા ક્રમ પર છે. દક્ષિણ આફ્રિકાનો ક્વિન્ટન ડિ'કોક (803 પોઇન્ટ) અને ફાફ ડુ પ્લેસિસ (801 પોઇન્ટ) ક્રમશઃ ચોથા અને પાંચમા ક્રમ પર છે.