ટીમ ઇન્ડિયાના કેપ્ટન વિરાટ કોહલીએ વિન્ડીઝ સામે ટેસ્ટ મેચની બીજી ઇનિંગ્સમાં પ્રથમ બોલે શૂન્ય રને આઉટ થઈને ટેસ્ટ ક્રિકેટમાં એક શરમજનક રેકોર્ડ પોતાના નામે કરી લીધો છે.
'ફેબ ફોર' એટલે કે હાલ ટેસ્ટ ક્રિકેટના ચાર શાનદાર બેટ્સમેનોમાં વિરાટ કોહલી, કેન વિલિયમ્સન, સ્ટીવ સ્મિથ અને જો રૂટ સામેલ છે. આ બધામાં હવે ટેસ્ટ ક્રિકેટમાં સૌથી વધુ વાર પ્રથમ બોલે શૂન્ય રને આઉટ થનારો બેટ્સમેન વિરાટ કોહલી બની ગયો છે.
વિરાટ કોહલી અત્યાર સુધી પોતાની 79 ટેસ્ટ મેચની કરિયરમાં કુલ નવ વાર શૂન્ય રને આઉટ થઈ ચૂક્યો છે. આ પહેલાં વિરાટ અને વિલિયન્સન આઠ-આઠ વાર શૂન્ય રને આઉટ થઈને બરોબરી પર હતા. હવે વિરાટ નવમી વખત શૂન્ય રને આઉટ થઈને પ્રથમ સ્થાને આવી ગયો છે, જ્યારે જો રૂટ સાત વાર અને સ્ટીવ સ્મિથ ચાર વાર શૂન્ય રને આઉટ થઈ ચૂક્યા છે.
ટેસ્ટ ક્રિકેટમાં ચોથી વાર એવું બન્યું છે,જ્યારે વિરાટ ગોલ્ડન ડકનો શિકાર બન્યો. વિરાટ પહેલી વાર ગોલ્ડન ડક એટલે કે પ્રથમ બોલે જ 2011-12માં ઓસ્ટ્રેલિયા સામે મેલબોર્નમાં આઉટ થયો હતો. બીજી વાર તે 2014માં ઈંગ્લેન્ડ સામે લોર્ડ્સમાં અને ત્રીજી વાર પ્રથમ બોલે જ 2018માં ઈંગ્લેન્ડ સામે ઓવલમાં અને ગઈ કાલે જમૈકામાં ચોથી વાર ગોલ્ડન ડકનો શિકાર બન્યો હતો.
તમને જણાવી દઇએ કે, ટાર્ગેટ પૂરો કરવા માટે આવેલી વેસ્ટ ઇન્ડિઝની ટીમે ત્રીજા દિવસના રમત પૂરી થયા સુધી 2 વિકેટના નુકસાન પર 45 રન કર્યા છે. ચોથા દિવસ ટીમ ઇન્ડિયાએ જીત માટે 8 વિકેટની જરૂર છે. આ પહેલા ટીમ ઇન્ડિયાએ પહેલી ઇનિંગમાં વેસ્ટ ઇન્ડિઝને 117 રન પર ઑલઆઉટ થયા છતાં ફૉલઓન ના આપવાનો નિર્ણય કર્યો. પહેલી ઇનિંગમાં 416 રન બનવાનારી ટીમ ઇન્ડિયા પહેલી ઇનિંગના આધાર પર 299 રનથી આગળ છે.