દાદાગીરી / ડૉક્ટર કે ડૉનઃ રાજકોટ સિવિલના ડૉક્ટરે માનવતા અને શરમની હદ વટાવી

લોકો માટે ભગવાન બાદ જો કોઈ જીવની આશા જગાવનાર બીજું કોઈ હોય તો તે ડોક્ટર છે અને સમાજમાં દાક્તરી વ્યવસાયનો એક અલગ આદર અને મહત્વ છે. પરંતુ આજકાલ  મૂળે સેવાનાં આ વ્યવસાયનું જે રીતે વ્યાપારીકરણ થઈ ગયું છે તેને આ વ્યવસાયને ભ્રષ્ટઆચારથી અભડાવી દીધો છે અને એટલે જ તો સારવારનાં આ વ્યવસાયમાં જે બેદરકારી, નિષ્કાળજી, લૂંટ અને નિર્દયતાનાં જે કિસ્સાઓ સામે આવી રહ્યાં છે તેણે આ વ્યવસાયમાં પેસેલા સડાને જગજાહેર કરી દીધો છે.

રાજકોટની સિવિલ હોસ્પિટલમાં પોતાની ચેમ્બરમાં ટેબલ પર બેઠા બેઠા દર્દી સામે ડોનગીરી કરી રહેલા આ ડોક્ટર મહાશયનું નામ છે ધર્મેન્દ્રસિંહ ગોહિલ. તેઓ કોઈ બાબતે દર્દીને ધમકાવી રહ્યાં છે. એટલું જ નહીં આ ડોક્ટર દર્દીને અભદ્ર ભાષામાં ધમકી આપી રહ્યાં છે. પોતે દર્દીની સામે બેઠા છે અને તોય દાદાગીરી કરતાં કહે છે હું હાજર નથી. સારવાર અને દર્દીનાં આ વ્યસાયીની દબંગાઈનો આ વીડિયો સોશિયલ મીડિયામાં વાઈરલ થઈ ગયો અને પાવરનાં મદમાં છાકટાં બનેલા એ ડૉક્ટરને ખબર પણ ન રહી. તેની આ કરતૂતે સમગ્ર ડૉક્ટરી આલમને શરમિંદુ કર્યું છે.

દર્દી દ્વારા સારવાર માટે કહેવામાં આવતા ધર્મેન્દ્રસિંહ ભડક્યો હતો. આ ડૉક્ટરે દર્દીને 15 દિવસ આરામ કરવાની પણ સૂચના આપી અને ત્યાંથી ચાલ્યા જવાનું કહ્યું. આ સાથે જ કહ્યું કે, મોત પણ થઈ શકે છે. હવે વાઈરલ વીડિયોને લઈને સિવિલ હોસ્પિટલનાં ડીન ડૉક્ટર ગૌરી ધ્રુવે  ડોક્ટર વિરુદ્ધ તપાસ બાદ યોગ્ય કાર્યવાહી કરવાનું જણાવ્યું છે... 

દર્દીઓના દર્દ દૂર કરવાના વ્યવસાયમાં જોડાયેલા આવા ડોક્ટરો દર્દીનું દર્દ વધે તેવી પ્રેક્ટિસ કરે છે ત્યારે સવાલ ઉભા થયા વગર રહેતા નથી. જે દર્દીઓ છે તેમની માનસિક સ્થિતિ સારી હોતી નથી. તેઓ ડોક્ટર પાસે આશ્વાસનરૂપ શબ્દોની આશા રાખતા હોય છે. ત્યારે આવા ડોક્ટર અનેક દર્દીઓ માટે આઘાત આપનારી કરતૂત કરી બેઠાં છે. આ વ્યસાય ધીરજનો છે ત્યારે એક ડોક્ટરનું આવું વર્તન કેટલું યોગ્ય છે?

ગંભીર સવાલ

• રાજકોટ સિવિલમાં શું આ રીતે દર્દીઓને અપમાનિત કરવામાં આવે છે?
• ડૉક્ટર ધર્મેન્દ્રસિંહ ગોહિલને નિયમોનો કોઈ ડર નથી?
• શું  રાજકોટ સિવિલમાં આવા ડોક્ટરોની ભરતી થાય છે?
• ડોક્ટર ધર્મેન્દ્રસિંહ ગોહિલને કોણ છાવરી રહ્યું છે?
• રાજકોટની સરકારી હોસ્પિટલમાં આવી લાલિયાવાડી ચાલે છે?
• ડૉક્ટરની ગરિમા લજવનારા સામે શું કાર્યવાહી થશે?