અભરખા / બસ આ જ બાકી હતું : પાંચમું પાસ ભાજપ MLA તો ડૉક્ટર બની ગયા, VIDEO વાયરલ થતાં વધ્યો વિવાદ

• ભાજપના MLAને ડૉક્ટર થવાનો શોખ કે પછી ફોટો પડાવવાના અભરખા? 
• પાંચમું પાસ MLA દર્દીની બોટલમાં આપી રહ્યા છે ઇન્જેકશન 
• આ કોઈ રસ્તાના કામ નથી કે તમે કરી લો : આમ આદમી પાર્ટી 

આ નેતાઓ ક્યારે સુધરશે? 

દેશ મહામારી સામે લડી રહ્યો છે ત્યારે આટલા મોટા સંકટ સામે જ્યારે દેશની પ્રજા લડી રહી હતી અને સારવાર માટે વલખાં મારી રહી હતી ત્યારે બધા નેતાઓ જાણે ગાયન જ થઈ ગયા હતા. એમાંય હવે જે નેતાઓ સેવા કરવા આગળ આવી રહ્યા છે તે પોતાની ઈમેજ બનાવવામાંથી ઊંચા નથી આવતા. પહેલા ઑક્સીજનના સિલિન્ડર અને ઍમ્બ્યુલન્સનું ઉદ્ઘાટન કરતાં ગુજરાતના નેતાઓ નજરે પડ્યા હતા ત્યારે હવે તો હદ જ થઈ ગઈ છે. સુરતના ભાજપના MLA પોતે ઇન્જેકશન આપવા લાગ્યા. 

MLA સાહેબને ડૉક્ટર થવાનો શોખ 

સુરતના ધારાસભ્ય વી.ડી.ઝાલાવાડિયાનો વીડિયો વાયરલ થઈ રહ્યો છે જેમાં તેઓ એક દર્દીના ગુલોકઝની બોટલમાં ઈન્જેક્શન મારી રહ્યા છે. વીડિયો વાયરલ થયા બાદ સામાન્ય પ્રજા ધારાસભ્ય સામે સવાલો ઊભા કરી રહી છે. ત્યારે સવાલ થાય છે કે ધારાસભ્ય દ્વારા કરવામાં આવી રહેલા કૃત્યના કારણે જૉ દર્દીને કઈ થાય તો તેના માટે જવાબદાર કોણ થશે? ત્યાં હોસ્પિટલમાં ડોકટરો તથા નર્સ હાજર છે છતાં પણ ધારાસભ્યએ સામે ચાલીને ઇન્જેકશન આપવાની શું જરૂર પડી હશે? શું માત્ર ફોટો પડાવવાના અભરખાના કારણે ધારાસભ્ય આવું કરી રહ્યા છે? 

AAP મેદાનમાં ઉતરી 

જોકે વી.ડી.ઝાલાવાડિયાના વિવાદમાં AAPએ પણ ઝંપલાવ્યું છે. સુરત વિપક્ષના નેતા ધર્મેશ ભંડેરીએ આક્ષેપ કરતા કહ્યું કે ધારાસભ્ય લોકોના જીવન સાથે ચેડાં કરી રહ્યાં છે. આ કોઇ રસ્તાના કામો નથી કે તમે કરી લો. આવા કામ કરતા પહેલા ધારાસભ્યએ વિચાર કરવો જોઇએ.સરકાર પણ ભાજપ નેતાઓ સામે કોઇ કાર્યવાહી નહી કરે.

MLAનો લૂલો બચાવ 

વીડિયો મામલે VTVના અહેવાલ બાદ MLA સામે આવ્યા અને સ્પષ્ટતા આપી કે ચાલુ બોટલમાં ઇન્જેકશન નથી આપ્યું અને હું તો સેવા કરી રહ્યો હતો. જોકે તેમની સ્પષ્ટતા વાસ્તવિકતાથી તો ક્યાંય દૂર છે. કારણ કે MLAના વીડિયોમાં સ્પષ્ટ દેખાઈ રહ્યું છે કે દર્દી બેડ પર છે અને તેની બોટલમાં MLA ઈન્જેક્શન આપી રહ્યા છે.