સૌરાષ્ટ્ર પંથક પર જાણે મેઘરાજા કોપાયમાન થયાં હોય તેવી સ્થિતિ સર્જાયેલી છે. રાજકોટ, જામનગર અને જૂનાગઢમાં વરસાદે વિનાશ વેર્યો છે ત્યારે રાજકોટના પડધરી વિસ્તારનો એક વીડિયો સોશિયલ મીડિયામાં ખૂબ વાયરલ થઈ રહ્યો છે.
પડધરી તાલુકા PSI આર.જે ગોહિલનો વીડિયો વાયરલ
PSIએ એક વૃદ્ધાનું રેસક્યૂ કર્યુ
VTV બિરદાવે છે PSI આર.જે ગોહિલની કામગીરીને
રાજ્યમાં મેઘરાજાએ બીજી ઈનિંગમાં ધડબડાટી બોલાવી છે. ખાસ કરીને સૌરાષ્ટ્રના 3 જિલ્લા રાજકોટ, જામનગર અને જૂનાગઢમાં તો મેઘ મહેર નહીં પરંતુ મેઘ કહેર જોવા મળી રહી છે. તો દક્ષિણ ગુજરાતના કેટલાક પંથકમાં પણ મેઘરાજા મન મૂકીને વરસી રહ્યા છે. જો કે, આ સ્થિતિ નાગરિકો માટે તકલીફ પણ ઉભી કરી રહી છે અને કેટલાક લોકો ભારે વરસાદને પગલે નદીઓ પૂર આવતા ઘરમાં કે કોઈ અન્ય સ્થળે ફસાઈ ગયા છે. તો કેટલાક ગામો એવા પણ છે જે સંપર્ક વિહોણા બન્યા છે. આવી સ્થિતિમાં ગુજરાત પોલીસ, NDRF, SDRFની ટીમો યુદ્ધના ધોરણે બચાવ કામગીરી હાથ ધરી છે. ત્યારે રાજકોટના પોલીસ જવાનની મદદનો એક વીડિયો સોશિયલ મીડિયામાં ખૂબ ચર્ચિત બન્યો છે.
PSI એક વૃદ્ધાનું કરી રહ્યા છે રેસ્ક્યૂ
મળતી જાણકારી પ્રમાણે, રાજકોટના પડધરી ગામમાં વરસાદી પાણી ભરાઈ જતાં સ્થાનિક પોલીસ દ્વારા યુદ્ધના ધોરણે બચાવ કામગીરી હાથ ધરવામાં આવી હતી. જેમાં તાલુકાના પીએસઆઇ આર.જે.ગોહિલનો એક વીડિયો સોશિયલ મીડિયામાં ધૂમ મચાવી રહ્યો છે. આ વીડિયોમાં PSI એક વૃદ્ધાનું રેસ્ક્યૂ કરી રહ્યા છે.
લોધિકા પોલીસ સ્ટેશનના PSIનો વીડિયો પણ સોશિયલ મીડિયામાં થયો વાયરલ
તો આ તરફ શહેરના લોધિકા વિસ્તારમાં બાલાજી પુલ પર પાણીમાં ફસાયેલા વૃદ્ધાનું રેસ્ક્યુ કરી રહેલા લોધિકા પોલીસ ચોકીના PSI કે.કે. જાડેજાનો પણ એક વીડિયો સોશિયલ મીડિયામાં વાયરલ થઈ રહ્યો છે. કમર ડૂબ પાણીમાંથી પસાર થઈને તેઓ વૃદ્ધાને ઉંચકી લે છે અને સલામત સ્થળે પહોંચાડીને પોતાની ફરજ બજાવતા નજરે ચડે છે.