ફિલ્મ 'ગબ્બર ઇઝ બેક' જેવો કિસ્સો સાબરકાંઠાના ઇડરમાં સામે આવ્યો છે. ઈડરની લાઈફલાઈન નામની ખાનગી હોસ્પિટલ ડૉક્ટર્સે મૃત વ્યક્તિની સારવાર કરી છે. મડદાંને આખી રાત રાખી મુકી દર્દીની સગા પાસેથી દવાઓ મંગાવી હતી. ડોક્ટરે પૈસા પડાવવા મૃતકની સારવાર કરી હોવાનો મૃતકના સગાનો દાવો છે.
પૈસા માટે ડોક્ટરે મડદાંની સારવાર કરી
સાબરકાંઠાના ઇડરની ખાનગી હોસ્પિટલે માનવતા નેવે મૂકીને દર્દીનું મૃત્યુ થઇ ગયું હોવા છતાં દવાઓ મગાવવાનું ચાલું રાખ્યું હતું. મૃતકના પરિવારજનોએ સવાલ કરતા ડૉક્ટરોએ ઉડાઉ જવાબ આપ્યા હતા. ત્યારે ડોક્ટરોની લૂંટના કાળાકામનો વિડીયો સામે આવ્યો છે.
આ બનાવ અંગે પ્રાપ્ત થતી વિગતો મુજબ સાબરકાંઠાના ઇડર ખાતે આવેલી લાઈફલાઈન નામની ખાનગી હોસ્પિટલે એક મૃતદેહની સારવાર કરવાનું નાટક કરીને મૃતકના પરિવારજનો પાસેથી સારવાર માટેના નાણાં પડાવી લીધા હતા.
જો કે, મૃતક વ્યક્તિના પરિવારજનોએ હોસ્પિટલ તંત્રને આ અંગેની પૂછપરછ કરતા યોગ્ય જવાબ આપ્યા નહોંતા. આ સમગ્ર ઘટના અંગેનો એક વીડિયો સોશિયલ મીડિયામાં વાયરલ થતાં ડોક્ટર પર ફિટકાર વરસાવ્યો હતો. મૃતકના સસરા જ્યારે અંદર ગયા ત્યારે તેના હાથ-પગ ઠંડા હતા. ત્યારબાદ અન્ય પરિવારજનોને પણ મહિલાના અંગો ઠંડા માલૂમ જણાયા હતા.
નોંધનીય છે કે, ડોક્ટરને ભગવાન સમાન દર્દી માનતા હોય છે, પરંતુ ભગવાનના સ્વરૂપમાં આવા કેટલાક રાક્ષસો પણ જોવા મળે છે. ત્યારે આ મામલા અંગેની ચોક્કસ કાર્યવાહી થાય અને મૃતકના પરિવારજનોને ન્યાય મળે તેવી વાતો લોક મુખે ચર્ચાય છે.
સળગત સવાલ
શું ડૉક્ટર્સ નાણા કમાવવા માટે કંઈ પણ કરશે ?
શું માનવતા નેવે મુકીને લૂંટ ચલાવશો ?
શું તમે લીધેલા શપથ ભૂલી ગયા છો ?
આવા ડૉક્ટર્સ સામે કેમ કોઈ કાર્યવાહી નહી ?
આવા ડૉક્ટર્સ અન્ય ઇમાનદારોને બદનામ નથી કરતા ?
કેમ મેડિકલ એસોસિએશન આવા કેસમાં મૌન રહે છે ?
આ મેડિકલ એસોસિએશનની પણ બદનામી નથી ?
આવા પ્રકારના કિસ્સાઓ રોકવા ખાસ જોગવાઈ નથી ?