VTV Fact Check / ફાસ્ટેગથી પૈસા ઉપડી જવાના વીડિયો પર વિશ્વાસ કરતાં નહીં, સાયબર એક્સપર્ટે જુઓ શું કર્યો ખુલાસો

• કાચ સાફ કરવાના બહાને પૈસા ઉપડી જતાં હોવાનો VIDEO વાયરલ
• વાયરલ VIDEO પર સાયબર એક્સપર્ટે જુઓ શું કર્યો ખુલાસો
• સોશિ. મીડિયામાં વાયરલ વીડિયોનું VTV પુષ્ટી કરતું નથી

પહેલાં ટોલ પ્લાઝા પર ટોલની ચૂકવણી કરવા માટે લોકોએ અનેક સમસ્યાનો સામનો કરવો પડતો. તેમજ લોકોએ લાંબી લાઇનમાં ઊભું રહેવું પડતુ હતું. પરંતુ કેન્દ્ર સરકારે આ સમસ્યાનો ઉકેલ લાવવા માટે ફાસ્ટેગ (FASTag) ની સુવિધા શરૂ કરી. ફાસ્ટેગની મદદથી ટોલ પ્લાઝા પર ઊભા રહ્યા વિના ટોલ ટેક્સની ચૂકવણી કરી શકાય છે. પરંતુ  તાજેતરમાં જ ચાર રસ્તા પર ઉભેલો એક બાળક ગાડીના કાચની સફાઈ કરીને સ્માર્ટ વોચથી ફાસ્ટેગ સ્કેન કરતો એક વીડિયો સોશિયલ મીડિયામાં વાયરલ થયો છે. જો કે આ વાયરલ વીડિયોનું VTV પુષ્ટી કરતું નથી.

લોકોને ગેરમાર્ગે દોરવા કોઈકે વીડિયો બનાવ્યો છે: સાયબર એક્સપર્ટ

જો કે, આ વાયરલ વીડિયો મામલે સાયબર એક્સપર્ટ લક્કીરાજસિંહ ઝાલાએ નિવેદન આપતા જણાવ્યું કે, 'લોકોને ગેરમાર્ગે દોરવા કોઈકે વીડિયો બનાવ્યો છે. ફાસ્ટ ટેગથી આ રીતે પૈસા ન કપાઈ શકે. ફાસ્ટ ટેગ RFID પર કામ કરે છે. રેડિયો ફિકવન્સી ટેકનોલોજી પર ફાસ્ટ ટેગ કામ કરે છે. કેન્દ્ર સરકાર દ્વારા ફાસ્ટેગને ખૂબ જ સુરક્ષિત બનાવવામાં આવ્યું. આ રીતે જો શક્ય હોત તો પાર્કિગમાં જ ઊભેલી કારમાં સ્કેન કરીને આવા લોકો રૂપિયા સેરવી લેત. દેશમાં ફાસ્ટેગથી આ રીતે પૈસા ઉપાડ્યાનો કોઇ બનાવ નથી નોંધાયો. આ વીડિયોમાં દર્શાવાયેલી ઘડિયાળ પણ ખોટી છે.'

સ્માર્ટ વૉચ દ્વારા ફાસ્ટેગમાંથી પૈસા કટ થઇ જતા હોવાનો વાયરલ વીડિયોમાં દાવો

વાયરલ વીડિયોમાં એક બાળક કારના કાચને સાફ કરતો જોવા મળી રહ્યો છે. બાદમાં તે કાચ સાફ કરવાના બહાને પોતાનો હાથને વારંવાર કાચ પર લાગેલા ફાસ્ટેગ તરફ લઇ જાય છે. ત્યારે બાદમાં આ વીડિયોમાં કારની અંદર બેઠેલ શખ્સ દ્વારા એવું કહેવામાં આવી રહ્યું છે કે, હાલમાં એક નવું સ્કેમ શરૂ થયું છે. ભીખ માંગનારા બાળકોના હાથમાં કેટલાંક લોકોએ એવી ઘડિયાળ આપી રાખી છે કે જેમાં સ્કેનર હોય છે. ગાડી સાફ કરતી વખતે બાળક જ્યારે ફાસ્ટેગ પર હાથ લાવે છે ત્યારે ફાસ્ટેગ સ્કેન થઇ જતા જેટલાં પણ ફાસ્ટેગમાં પૈસા હશે તેટલાં પૈસા કટ થઇ જશે. જો કે, આ વીડિયો અંગે સાયબર એક્સપર્ટનું કહેવું છે કે, 'લોકોને ગેરમાર્ગે દોરવા કોઈકે વીડિયો બનાવ્યો છે.'