એક બાજુ રાજકોટ અને જામનગરના માથે પૂરનું સંકટ તોળાઈ રહ્યું છે ત્યારે આજે રાજકોટથી વધુ એક ચર્ચાસ્પદ સમાચાર આવ્યા છે. જેમાં CM ભૂપેન્દ્ર પટેલની મુલાકાત દરમ્યાન જાહેરમાં ભાજપના બે દિગ્ગજ નેતાઓ બાખડી પડ્યાં હતાં.
રાજકોટમાં ભાજપના બે નેતાઓ વચ્ચે ચકમક ઝરી
નવા CMના આગમન સમયે જ નેતાઓ જાહેરમાં બાખડ્યા
MP મોહન કુંડારિયા અને ચેતન રામાણી બાખડ્યા
રાજકોટમાં ભારે વરસાદને પગલે જળપ્રલય જેવી સ્થિતિ સર્જાઈ છે ત્યારે જામનગર અને રાજકોટમાં કેવી તારાજી સર્જાઈ છે તેનું નિરીક્ષણ કરવા નવનિયુક્ત CM ભૂપેન્દ્ર પટેલ પહોંચ્યા હતાં. જો કે તેમના આગમન સમયે જ એક એવી ઘટના બની કે વાયુવેગે તેનો વીડિયો વાયરલ થઈ ગયો હતો. ભાજપના બે મોટા નેતાઓ CMના આગમન સમયે જ જાહેરમાં ઝઘડી પડ્યાં હતાં. સાંસદ મોહન કુંડારિયા અને ચેતન રામાણી વચ્ચે ચકમક ઝરી ગઈ હતી.
કેમ થઈ બબાલ
મળતી માહિતી અનુસાર CM ભૂપેન્દ્ર પટેલના આગમન સમયે તેમનું સ્વાગત કરવા ભાજપ નેતાઓ હાજર રહ્યાં હતા. આ દરમ્યાન ચેતન રામાણીએ સાંસદ કુંડારિયાને 7 વર્ષથી કાર્યાલય ખોલ્યું ન હોવાનો ટોણો માર્યો હતો. જેના બાદ બંને વચ્ચે બોલાચાલી થઈ હતી. ચેતન રામાણીએ મોહન કુંડારિયાને ખરીખોટી સંભળાવી તેનો વીડિયો પણ સોશ્યલ મીડિયામાં વાયરલ થયો છે. આખરે સ્થાનિક આગેવાનો મધ્યસ્થી કરી મામલો થાળે પાડ્યો હતો.
CM ભૂપેન્દ્ર પટેલ જામનગર-રાજકોટની મુલાકાતે
મહત્વનું છે કે ગઈ કાલે જ CM બન્યા બાદ સૌપ્રથમ સૌરાષ્ટ્રમાં સર્જાયેલી તારાજીને પગલે ઍક્શન મોડમાં ભૂપેન્દ્ર પટેલ આવી ગયા છે. તેઓ આજે બપોરે જ જામનગર અસરગ્રસ્તોની મુલાકાતે આવી પહોંચ્યા હતા અને પરિસ્થિતિનો તાગ મેળવ્યો હતો. ત્યાર બાદ સાંજે જામનગરથી માર્ગ દ્વારા રાજકોટ પહોંચ્યા હતા અને અહીં પણ નુકસાન કેટલું છે તેનું નિરીક્ષણ કર્યુ હતું.