સોશિયલ મીડિયામાં વાયરલ થઈ રહેલા જે મેસેજની વાત કરીશું તેમાં દાવો કરવામાં આવ્યો છે કે રાજ્યસભામાં ટ્રાફિકના કડક નિયમનું એક બિલ પાસ થયું છે. અને આ બિલમાં ટ્રાફિકના નિયમનો ભંગ કરનારને ભારે રકમ દંડ પેટે ચુકવવું પડશે તેવો દાવો કરવામાં આવ્યો છે. આ દંડની રકમ એવી છે કે જો કોઈને એકથી બે વાર ભરવું પડે તો ભારે હાલાકી થઈ પડે.
આપને વાયરલ મેસેજ બતાવવામાં આવેલ છે કે જેમાં અલગ અલગ નિયમ ભંગ કરનારાઓ માટે દંડની જોગવાઈ છે. મેસેજની ઉપર લખ્યું છે સેન્ટ્રલ મોટર વિહીકલ ગવર્નમેન્ટ ઓફ ઈન્ડિયા તેમજ નીચે અલગ અલગ દંડની રકમ લખવામાં આવી છે.
સૌપ્રથમ સીટ બેલ્ટ વિના રૂ.1000નો દંડ PUC વિના રૂ.1500 ઈન્સ્યોરન્સ વિના રૂ.10 000 લાયસન્સ ન હોય તો રૂ.10 000નો દંડ અને વાહન જમા થશે. મોબાઈલ સાથે ડ્રાઈવિંગ કરશો તો રૂ.5000 અને દારૂ પીને વાહન ચલાવશો તો રૂ.25000નો દંડ ફટકારવામાં આવશે. આમ આ ભારે દંડની રકમ સાંભળીને જ ઘણાને તો ચક્કર આવી ગયા હશે.
હવે આપ જરા વિચાર કરો કે સામાન્ય નિયમ ભંગ પર જો તમને 5 હજાર રૂપિયા સુધીનો દંડ જો ચુકવવો પડે. તો સામાન્ય નાગરિકની શું સ્થિતિ થાય..? તો બીજીબાજુ ભારતમાં બિલાડીના ટોપની જેમ નવા-નવા વાહનો રસ્તા પર ફૂટી નિકળ્યા છે. શહેરોમાં દરરોજ ટ્રાફિકની સમસ્યા રહે છે.
દરરોજ થોકબંધ અકસ્માતની ઘટના બને છે. ત્યારે ટ્રાફિકના નિયમો કડક કરવાની જરૂર તો છે જ. પરંતુ દંડની આટલી મોટી રકમ ચુકવવી પડશે કે નહીં તે એક સવાલ હતો.
જો અમદાવાદમાં જો આવા નિયમ આવી ચડે તો દરરોજ કેટલી ઉઘરાણી થાય એ વિચારી શકાય છે. કારણ કે અહીં લોકો ટ્રાફિકના નિયમોને ઘોળીને પી ગયા છે. ચાર રસ્તા પર વાહનો ઉભા હોય તો ઝિબ્રા ક્રોસિંગ પણ ન જોવા મળે તેવી સ્થિતિએ નિયમ પાલન કેવી રીતે કરાવવું..!
આ દંડની રકમનો મેસેજ એટલા માટે પણ મુંઝવણમાં મુકી દે છે કારણ કે તેમાં રાજ્યસભાનો ઉલ્લેખ કર્યો છે. સંસદમાં આ મોટર વિહિકલ બિલ પાસ થયો હોવાનો દાવો હતો. આ મેસેજ તમારા વોટ્સએપ નંબર પર પણ આવ્યો જ હશે અને તમારા મનમાં પણ સવાલો થયા હશે કે આખરે આ મેસેજ સાચો હશે કે ખોટો.
વાયરલ મેસેજની પડતાલ હાથ ધરવામાં આવી અને એ જાણવાનો પ્રયાસ કરાયો કે વાસ્તવમાં આ મેસેજ સાચો છે કે ખોટો? શું રાજ્યસભામાં આવું કોઈ બિલ પાસ થયું છે? શું વાસ્તવમાં હવે કોઈ કડક ટ્રાફિકના નિયમો લાગૂ કરવામાં આવશે? આ દરેક સવાલનો જવાબ અમારી ટિમને મળી આવ્યા ખાસ તપાસમાં.
વાયરલ મેસેજમાં રાજ્યસભાનો ઉલ્લેખ કરવામાં આવ્યો હતો. માટે અમે રાજ્યસભાની વેબસાઈટ પર તપાસ કરી જોઈ. ટ્રાફિકના નિયમો બાબતે 11 માર્ચના રોજ કોઈ બિલ પાસ થયું છે કે નહીં તે જાણવાનો પ્રયાસ કરાયો. પરંતુ અમને આવી કોઈ માહિતી જાણવા મળી ન હતી.
આપને જણાવી દઈએ કે કોઈપણ કાયદો બનાવવા માટે બિલને અલગ અલગ પાંચ સ્થિતિઓમાંથી પસાર થવું પડે છે. પહેલા લોકસભા અને ત્યારબાદ રાજ્યસભામાં બિલ પાસ થતા સર્વોચ્ચ કાર્યપાલિકામાં હસ્તાક્ષર માટે મોકલવામાં આવે છે.
જે બાદ કાયદો અમલમાં આવે છે. માટે જો રાજ્યસભામાં કોઈ બિલ પાસ થાય તો કાયદો બનવાની સંભાવના વધી જાય છે. માટે જ ટ્રાફિકના આ નિયમ બાબતે લોકો વધુ ચર્ચા કરી રહ્યા છે.
આમ અમદાવાદમાં તો ઘણા યુવાનોનું માનવું છે કે જો આવા કડક નિયમો અમલમાં આવશે તો લોકો ટ્રાફિકના નિયમોનું પાલન કરતા થશે. તેમજ અકસ્માતની ઘટના પણ ઘટાડી શકાશે. પરંતુ આ તો જનતાની વાત થઈ. પરંતુ વાસ્તવમાં આ મેસેજ સાચો છે કે નહીં તેની સ્પષ્ટતા જરૂરી હતી. માટે અમે અમારી તપાસ આગળ વધારી.
વાયરલ મેસેજની સ્પષ્ટતા કરવા માટે અમારી ટીમ પહોંચી ગાંધીનગર વાહનવ્યવહાર કચેરીએ અને અહીં અમારા સંવાદદાતાએ રાજ્યના વાહનવ્યવહાર કમિશનર આર.એમ.જાદવનો સંપર્ક કર્યો હતો અને તેમને વાયરલ મેસેજ વિશે વાત કરી હતી. કમિશનર આર.એમ.જાદવે પણ વાયરલ મેસેજની તપાસ કરી અને તપાસ બાદ જે હકીકત સામે આવી તે કંઈક આ પ્રમાણે છે.
આમ વાહનવ્યવહાર કમિશનરે વાયરલ મેસેજને ખોટો સાબિત કર્યો છે. આ વાત તો સ્પષ્ટ થઈ ગઈ પરંતુ અમે એ પણ જાણવાનો પ્રયાસ કર્યો કે હાલ રાજ્યમાં કોઈ ટ્રાફિકના નિયમનું ભંગ કરે તો વાસ્તવમાં દંડની રકમ કેટલી છે.
આ સાથે આપને એ પણ જણાવી દઈએ કે જો આ દંડની જોગવાઈ કરતા વધુ રકમ કોઈ ટ્રાફિક પોલીસ વસૂલ કરે તો તેની સામે કાર્યવાહી થઈ શકે છે. આ સાથે કમિશનરે જાદવે ટ્રાફિક અવેરનેસ માટે એક મેસેજ પણ આપ્યો હતો.
આમ Vtvની પડતાલમાં વાયરલ મેસેજનો દાવો ખોટો સાબિત થયો છે. એક હજારથી વધુ રૂપિયા વસૂલવાનો કોઈ નિયમ અમલમાં નથી. માટે કોઈપણ વાહન ચાલકે વાયરલ મેસેજને લઈને ચિંતિત થવાની જરૂર નથી. તો આ સાથે જો કો પોલીસ કર્મચારી વધુ રૂપિયા વસૂલવાનો વિચાર કરે તો તેના વિરુદ્ધ કાર્યવાહી થઈ શકે તેનું પણ ધ્યાન રાખવું જરૂરી છે.