ગુજરાતમાં છેલ્લા કેટલાક દિવસથી બેવડી ઋતુનો અનુભવ થઈ રહ્યો છે. રાત્રે ઠંડી લાગી રહી છે તો બપોર દરમિયાન ગરમી પણ લાગી રહી છે. ઋતુને કારણે શહેરમાં વાઇરલ બીમારીઓ ઘર કરી ગઈ છે.
વાદળછાયા વાતાવરણ વચ્ચે ગુલાબી ઠંડીનું આગમન
બેવડી ઋતુથી લોકો બેહાલ બન્યા
દિવસે ગરમી અને રાતે ઠંડીના ચમકારાથી અનેક લોકો બીમારીની ઝપટમાં
નવલી નવરાત્રિની શરૂઆતને આડે હવે ગણતરીના દિવસો બાકી રહ્યા છે ત્યારે અત્યારે રાત્રિ દરમિયાન ઠંડીનો ચમકારો જોવા મળી રહ્યો છે. સવારે વાદળછાયા વાતાવરણ વચ્ચે હળવા ખુશનૂમા પવન સાથે શિયાળાનું આગમન થઈ રહ્યું છે. જો કે અત્યારે બેવડી ઋતુથી તેની શરૂઆત થઇ છે. રાત્રે ઠંડીનો અનુભવ તેમજ દિવસ દરમિયાન તડકો તેમજ ગરમીનો અનુભવ થઇ રહ્યો છે. ગુજરાતમાં છેલ્લા કેટલાક દિવસથી બેવડી ઋતુનો અનુભવ થઈ રહ્યો છે. રાજ્યમાં ઠંડીમાં થઈ રહેલી વધઘટ વચ્ચે વધુ એક વખત વાતાવરણમાં પલટો આવ્યો છે. જેના કારણે તાપમાનમાં ગણતરીના કલાકોમાં આઠ ડિગ્રીનો ઘટાડો નોંધાયો છે.
ડબલ ઋતુને કારણે વાઇરલ બીમારીઓ ઘર કરી ગઈ
બપોર દરમિયાન ગરમી પણ લાગી રહી છે. જો કે, હજુ તો શિયાળાની શરૂઆત છે, છતાંય વહેલી સવારે ઠંડીનો ચમકારો જોવા મળી રહ્યો છે. ઠંડીનો વરતારો થતાં જ શહેરીજનો રિવરફ્રન્ટ પર કસરત કરતા જોવા મળી રહ્યા છે. હવામાં ભેજનું પ્રમાણ વધવાને કારણે હવે ધુમ્મસ સાથે ઠંડીનો ચમકારો વધવાની શક્યતા છે. સામાન્ય રીતે ભાદરવા મહિનાની શરૂઆત સાથે જ બેવડી ઋતુ પણ શરૂ થઈ જાય છે. ડબલ ઋતુને કારણે શહેરમાં વાઇરલ બીમારીઓ ઘર કરી ગઈ છે. ઘેર ઘેર વાઇરલ તાવ અને શરદીના દર્દીઓ જોવા મળી રહ્યા છે. જે ચેપી રોગ હોવાને કારણે આખે આખા પરિવાર તેમાં સપડાઈ રહ્યા છે.
સવાર અને બપોરનાં તાપમાનમાં 4થી 10 ડિગ્રીનો તફાવત
બેવડી ઋતુના કારણે શહેરમાં સરકારી, ખાનગી હોસ્પિટલમાં સારવાર લેવા આવતા દર્દીની સંખ્યામાં વધારો થયો છે. જેમાં સૌથી વધુ દર્દીને વાઇરલની અસર હોવાની બાબત ધ્યાને આવી છે. ભાદરવા મહિનામાં તથા ચોમાસામાં ભરાયેલાં પાણી, નવાં પાણીને કારણે પાણીજન્ય રોગો જેવા કે મેલેરિયા, ટાઇફોઇડ, ઝેરી મેલેરિયા, ડેન્ગ્યુ જેવા રોગોનું પ્રમાણ વધી જાય છે
સરકારી હોસ્પિટલની ઓપીડીમાં દર્દીની સંખ્યામાં વધારો
સરકારી હોસ્પિટલની ઓપીડીમાં રોજ આવતા દર્દીની સંખ્યામાં 100થી 150 દર્દીનો વધારો નોંધાયો છે. ખાનગી હોસ્પિટલમાં પણ ઓપીડીમાં લાઈન જોવા મળી રહી છે, તેમાંથી વધુ દર્દી વાઇરલનો ભોગ બનેલા જોવા મળી રહ્યા છે. આ વાઇરલ ખૂબ ઝડપથી ફેલાય છે. તેની પાછળ ખાસ કરીને હવામાન મહત્ત્વની બાબત હોવાનું મનાઈ રહ્યું છે. કારણ કે જિલ્લામાં સવારે વાતાવરણ ઠંડું હોય છે અને બપોરના સમયે ઉનાળા જેવી ગરમી લાગે છે. બપોરે એસી અને પંખાની જરૂર પડી રહી છે. ડોક્ટરોના મતે વાઇરલને ફેલાતો અટકાવવા લોકો ફરીથી માસ્ક પહેરે તે ખૂબ જરૂરી છે.
વરસાદના વધુ એક રાઉન્ડ માટે હજુ તૈયાર રહેજો!
રાજ્યમાં હજુ રાત્રે અને વહેલી સવારે ઠંડીનો આંશિક ચમકારો અનુભવાય છે. જ્યારે દિવસ દરમિયાન ઉનાળાની કાળઝાળ ગરમીનો અહેસાસ વર્તાય છે. એવામાં હવામાન વિભાગ દ્વારા વાતાવરણમાં પલટો આવવાની સંભાવના વ્યક્ત કરાઈ છે. કારણકે ચોમાસાએ હજુ પણ વિધિવત્ વિદાય લીધી નથી ત્યારે જતાં જતાં પણ વરસાદ એક રાઉન્ડમાં વરસી શકે છે. દક્ષિણ ગુજરાતના ડાંગ, તાપી અને નર્મદા સહિતના જિલ્લામાં હજુ પણ હળવા વરસાદની સંભાવના છે. જેને લઈને રાજ્યના અન્ય ભાગોમાં ઠંડો પવન ફૂંકાઈ શકે છે. જ્યારે રાજ્યના કેટલાક જિલ્લાનું વાતાવરણ શુષ્ક રહેવાની સંભાવનાઓ રહેલી છે. જેને લઈને રાજ્યના અનેક વિસ્તારોમાં મહત્તમ તાપામાન અને લઘુતમ તાપમાનનું પ્રમાણ યથાવત્ રહેવાનું અનુમાન છે.
વિવિધ રોગોથી પીડિત દર્દીઓ માટે ઠંડીનો સમયગાળો મુશ્કેલ
અત્યારે વહેલી સવારે પડી રહેલી ગુલાબી ઠંડી ઠંડક આપનારી છે, કેટલાક લોકો માટે તે આનંદ લેવાનું બહાનું છે, જ્યારે વિવિધ રોગોથી પીડિત દર્દી માટે આ ઠંડી ખૂબ જ મુશ્કેલ સમયગાળો છે, કારણ કે આ સિઝનમાં તેમના રોગો વધી શકે છે. જો સાચવવામાં ન આવે તો આ શરદી પણ ક્યારેક જીવલેણ સાબિત થઈ શકે છે. ઠંડી વધશે તેમ તેમ અસ્થમાનાં લક્ષણો વધે છે. આ સિઝનમાં લોકોને અસ્થમા થવાની પણ શક્યતા રહે છે. શિયાળાની શરૂઆત થતાંની સાથે જ ચામડી શુષ્ક થવા લાગતાં ત્વચાના રોગની સમસ્યા વધવા લાગે છે. જે લોકો આર્થરાઈટિસથી પીડિત હોય તેમના માટે આ ઋતુ મુશ્કેલ બને છે. આમાં સાંધાનો દુખાવો અને સોજો મુખ્ય લક્ષણો છે. જે ઠંડકમાં વધી જાય છે.