પહેલ / સુરતની યુનિવર્સિટીમાં શિક્ષક એવી અનોખી સજા કરે છે કે વિદ્યાર્થીઓ હોંશે હોંશે સ્વીકારે છે

સુરતની આ યુનિવર્સિટીમાં વિદ્યાર્થીને સજા ના ભાગ રૂપે વૃક્ષારોપણ કરવું પડે છે અને તેને ઉછેરવાની માવજત પણ કરવી પડે છે. શાળા કોલેજમાં વિદ્યાર્થીઓને સજાના ભાગરૂપે માર મારવાના કે ઉઠકબેઠક કરાવવાના કે કલાસરૂમમાંથી બહાર કાઢી મુકવાની શિક્ષા વારંવાર ટિકાપાત્ર બને છે.

સુરતની વીર નર્મદ યુનિવર્સિટીમાં ફેકલ્ટી ઓફ આર્કિટેક્ચરમાં વિદ્યાર્થીઓને એક અનોખી સજા કરવામાં આવી રહી છે. વિદ્યાર્થીઓ પણ આ સજાને હોંશે હોંશે સ્વીકારી રહ્યા છે, એટલું જ નહીં એકાદ બે મહિના પછી ગર્વ સાથે સાથી વિદ્યાર્થીઓને કહે છે જુઓ મેં આ પીપળો કે વડ કે લીમડો ઉછેર્યો છે.

વિદ્યાર્થીઓ શાળા કોલેજમાં પોતાને થયેલી સજાને ભૂલી જવા માંગતા હોય છે, પણ અહીંયા જે વૃક્ષારોપણની સજા કરવામાં આવે છે. તેને વિદ્યાર્થીઓ ગૌરવ સાથે યાદ રાખે છે. એટલું જ નહીં અન્ય નવા વિદ્યાર્થીઓને પણ તેની સકારાત્મક વાત પણ કરે છે.

આજથી લગભગ 12 વર્ષ પહેલાં આર્કિટેક્ચરનો વિભાગ શરૂ કરવામાં આવ્યો. ત્યારે આ આખું કેમ્પસ વેરાન વગડા જેવું હતું, આર્કિટેક્ચરના વિદ્યાર્થીઓને અનેક પ્રોજેક્ટ કરવાના હોય છે તેમ આઉટડોર એક્ટિવિટી એક મહત્વનો ભાગ હોય છે. જેને દરેક વિદ્યાર્થીઓ સાથે જોડી દેવામાં આવ્યો અને આજે આખું કેમ્પસ લગભગ 500 જેટલા વૃક્ષઓ અને જુદા જુદા ફૂલ છોડથી અસચ્છાદિત થઈ ગયું છે, માત્ર આર્કિટેકના જ નહીં સમગ્ર યુનિવર્સિટીના વિદ્યાર્થીઓ અહીંયા કેમ્પસ જોવા કે નવરાશના સમયે બેસવા માટે લન્ચ માટે આવે છે.